Us News: ભારત અને અમેરિકા વચ્ચેની વ્યૂહાત્મક ભાગીદારીને વધુ મજબૂત બનાવતી એક મહત્વપૂર્ણ બેઠક વોશિંગ્ટનમાં યોજાઈ હતી. ભારત-અમેરિકા વેપાર સમજૂતી પર હસ્તાક્ષર કરતા પહેલા ભારતના વિદેશ મંત્રી ડૉ. એસ. જયશંકર (Dr. S. Jaishankar) અને અમેરિકાના વિદેશ મંત્રી માર્કો રૂબિયો (Marco Rubio)એ દ્વિપક્ષીય ચર્ચા કરી હતી. આ બેઠક દરમિયાન વેપારથી લઈને ઊર્જા, પરમાણુ સહકાર, સંરક્ષણ, મહત્વપૂર્ણ ખનિજો અને ટેકનોલોજી જેવા વ્યાપક મુદ્દાઓ પર ચર્ચા થઈ હતી.
દુર્લભ ખનિજોને લઈ સહકારની તૈયારી
આ બેઠકનું એક મહત્વપૂર્ણ પાસું દુર્લભ અને મહત્વપૂર્ણ ખનિજોના સંશોધન, ખાણકામ અને પ્રક્રિયા (processing) પર દ્વિપક્ષીય સહકારને ઔપચારિક બનાવવાનો પ્રયાસ હતો. વૈશ્વિક પુરવઠા શૃંખલામાં દુર્લભ ખનિજોની વધતી માંગને ધ્યાનમાં રાખીને ભારત અને અમેરિકા બંને દેશો આ ક્ષેત્રમાં પરસ્પર સહકાર વધારવા ઈચ્છે છે. ખાસ કરીને સેમિકન્ડક્ટર, રિન્યુએબલ એનર્જી અને અદ્યતન ટેકનોલોજી માટે આ ખનિજોને વ્યૂહાત્મક માનવામાં આવે છે.
વ્યાપક વ્યૂહાત્મક ભાગીદારી પર ચર્ચા- જયશંકર (Jaishankar)
વિદેશ મંત્રી એસ. જયશંકરે (Dr. S. Jaishankar) સોશિયલ મીડિયા પ્લેટફોર્મ ‘એક્સ’ પર પોસ્ટ કરીને માહિતી આપી હતી કે વાતચીત દરમિયાન વેપાર, ઊર્જા, પરમાણુ સહકાર, સંરક્ષણ, મહત્વપૂર્ણ ખનિજો અને ટેકનોલોજી સહિત ભારત-યુએસ વ્યૂહાત્મક ભાગીદારીના અનેક પાસાઓ પર ચર્ચા કરવામાં આવી. બંને નેતાઓએ સહિયારા હિતોને આગળ વધારવા માટે વિવિધ તંત્રની વહેલી બેઠકો યોજવા પર પણ સંમતિ વ્યક્ત કરી હતી.
Delighted to meet US @SecRubio this afternoon.
A wide ranging conversation that covered our bilateral cooperation agenda, regional and global issues.
Facets of India – US Strategic Partnership discussed included trade, energy, nuclear, defence, critical minerals and… pic.twitter.com/1rbXJHgEQY
— Dr. S. Jaishankar (@DrSJaishankar) February 3, 2026
ટ્રમ્પની જાહેરાતને મોદીનું સ્વાગત
અમેરિકાના સ્ટેટ ડિપાર્ટમેન્ટના પ્રમુખ નાયબ પ્રવક્તા ટોમી પિગોટે એક નિવેદનમાં જણાવ્યું હતું કે સચિવ માર્કો રૂબિયો (Marco Rubio)અને મંત્રી એસ. જયશંકરે (Dr. S. Jaishankar) રાષ્ટ્રપતિ ડોનાલ્ડ ટ્રમ્પ (Donald Trump અને વડા પ્રધાન નરેન્દ્ર મોદી (Narendra Modi) દ્વારા ભારત-યુએસ વેપાર કરાર પર હસ્તાક્ષર કરવાના નિર્ણયને આવકાર્યો હતો. બંને નેતાઓએ નવી આર્થિક તકો ઊભી કરવા અને સહિયારા ઊર્જા સુરક્ષા લક્ષ્યાંકોને આગળ વધારવા માટે લોકશાહી દેશો સાથે મળીને કામ કરવાની જરૂરિયાત પર ભાર મૂક્યો હતો.
ક્વાડ અને ઇન્ડો-પેસિફિક પર ભાર
બેઠકના અંતે જયશંકર(Jaishankar)અને રૂબિયો (Rubio)એ ક્વાડ (QUAD) મંચ દ્વારા દ્વિપક્ષીય તેમજ બહુપક્ષીય સહકાર વધારવા માટે પોતાની પ્રતિબદ્ધતાની પુષ્ટિ કરી. બંને નેતાઓએ સ્વીકાર્યું કે સમૃદ્ધ અને સ્થિર ઇન્ડો-પેસિફિક (Indo-Pacific) પ્રદેશ ભારત અને અમેરિકાના સહિયારા હિતોને આગળ વધારવા માટે અત્યંત મહત્વપૂર્ણ છે.
ભારત-અમેરિકા વચ્ચે તણાવની પૃષ્ઠભૂમિ
ઉલ્લેખનીય છે કે છેલ્લા કેટલાક સમયથી ભારત અને અમેરિકા વચ્ચે વેપાર મુદ્દે તણાવ જોવા મળ્યો હતો. વેપાર વાટાઘાટોમાં મડાગાંઠ અને અમેરિકા દ્વારા ભારતીય ઉત્પાદનો પર લાદવામાં આવેલા ઊંચા ટેરિફ, કેટલાક કિસ્સામાં 50 ટકા સુધી, આ તણાવનું મુખ્ય કારણ રહ્યા હતા.
આ ઉપરાંત વોશિંગ્ટનમાં પાકિસ્તાન માટે ટ્રમ્પ વહીવટીતંત્રનું મહત્વ અને ભારતના ઇનકાર છતાં ભારત-પાકિસ્તાન યુદ્ધના અંત અંગે ટ્રમ્પ દ્વારા કરવામાં આવેલા વારંવારના દાવાઓએ પણ ભારતમાં ચિંતા ઊભી કરી હતી.
પાકિસ્તાનને આમંત્રણ ન મળવું મહત્વપૂર્ણ સંકેત
જો કે, તાજેતરમાં અમેરિકાની આગેવાની હેઠળ યોજાયેલી મહત્વપૂર્ણ ખનિજોને લગતી નિર્ણાયક બેઠકમાં પાકિસ્તાનને આમંત્રણ આપવામાં આવ્યું નથી. આને એક સ્પષ્ટ સંકેત તરીકે જોવામાં આવી રહ્યું છે કે અમેરિકા ભારતની સંવેદનશીલતાઓને સમજી રહ્યું છે અને ભારત સાથેની વ્યૂહાત્મક ભાગીદારીને પ્રાથમિકતા આપી રહ્યું છે.
નવી દિશામાં ભારત-યુએસ સંબંધો (India-US relations)
જયશંકર (Jaishankar)અને રૂબિયો (Rubio)ની આ બેઠકને ભારત-અમેરિકા સંબંધોમાં નવી દિશા તરીકે જોવામાં આવી રહી છે. વેપાર સમજૂતી, વ્યૂહાત્મક ખનિજો, ઊર્જા સુરક્ષા અને ઇન્ડો-પેસિફિકમાં સહકાર જેવા મુદ્દાઓ પર સહમતિ બંને દેશોને લાંબા ગાળે ફાયદાકારક સાબિત થઈ શકે છે. વેપાર તણાવ બાદ હવે બંને દેશો વ્યાવહારિક અને સહયોગી અભિગમ તરફ આગળ વધી રહ્યા છે, જે વૈશ્વિક રાજનીતિ અને અર્થવ્યવસ્થામાં મહત્વપૂર્ણ ફેરફાર લાવી શકે છે.
આ પણ વાંચો:અમેરિકાના 50% ટેરિફ સામે ભારતનો કડક જવાબ,જયશંકરનું નિવેદન વૈશ્વિક ચર્ચાનો વિષય
આ પણ વાંચો:“અમે સંમત છીએ કે…” અમેરિકા સાથેના તણાવ વચ્ચે જયશંકર રુબિયો સાથે મળ્યા,જાણો શું શું થયું!
