America News: 27 ઓગસ્ટ, 2025ના રોજ અમેરિકી રાષ્ટ્રપતિ ડોનાલ્ડ ટ્રમ્પે ભારતીય નિકાસ પર 50% ટેરિફ લાગુ કરવાની ઘોષણા કરી, જેનાથી બંને દેશોના સંબંધોમાં તણાવ વધ્યો છે. આ નિર્ણય રશિયા પાસેથી ભારત દ્વારા ક્રૂડ ઓઇલની ખરીદીને લઈને અમેરિકાના આક્ષેપોના પગલે આવ્યો છે. ટ્રમ્પનો દાવો છે કે ભારત રશિયન તેલ ખરીદીને રિફાઇન કરી આંતરરાષ્ટ્રીય બજારમાં વેચે છે, જેનાથી રશિયાને આર્થિક ફાયદો થઈ રહ્યો છે અને યુક્રેન યુદ્ધ રોકવાના પ્રયાસોમાં અડચણ આવી રહી છે. જોકે, ભારતે આ દબાણને નમાવવાનો સ્પષ્ટ ઇનકાર કરી દીધો છે, અને વિદેશ મંત્રી એસ. જયશંકરના એક નિવેદનથી અમેરિકામાં ખળભળાટ મચી ગયો છે.
રશિયન તેલ ખરીદવાના આક્ષેપોના જવાબમાં જયશંકરે કહ્યું, “જો અમેરિકાને ભારત દ્વારા રશિયન તેલ ખરીદવામાં વાંધો હોય, તો તે ભારતમાંથી રિફાઇન્ડ તેલ ખરીદવાનું બંધ કરી દે.” આ નિવેદનથી અમેરિકી મીડિયામાં હડકંપ મચી ગયો. ફોક્સ ટીવી ચેનલ પર એક એન્કરે અમેરિકી નાણામંત્રી સ્કોટ બેસેન્ટને આ નિવેદન અંગે સવાલ કર્યો, જેના જવાબમાં બેસેન્ટે કહ્યું, “ભારત વિશ્વનું સૌથી મોટું લોકતંત્ર છે, અને અમેરિકા વિશ્વની સૌથી મોટી અર્થવ્યવસ્થા. આખરે અમે એકસાથે આવી જઈશું.” આ નિવેદનથી સ્પષ્ટ થાય છે કે અમેરિકા ભારત સાથે દુશ્મની મોલવાનું જોખમ લેવા માગતું નથી.
અમેરિકાએ 7 ઓગસ્ટથી ભારતીય નિકાસ પર 25% ટેરિફ લાગુ કર્યું હતું, જેને 27 ઓગસ્ટથી વધારીને 50% કરવામાં આવ્યું. ટ્રમ્પે ભારતને વેપાર સમજૂતી માટે 21 દિવસનો સમય આપ્યો હતો, પરંતુ પ્રધાનમંત્રી નરેન્દ્ર મોદીએ અમેરિકી શરતો સ્વીકારવાનો ઇનકાર કરી દીધો. સોમવારે એક નિવેદનમાં મોદીએ સ્પષ્ટ કહ્યું, “અમે ખેડૂતો, પશુપાલકો અને નાના ઉદ્યોગોના હિતો સાથે કોઈ સમજૂતી નહીં કરીએ. દબાણ વધશે, પરંતુ અમે અડગ રહીશું.”
અમેરિકાના આ દબાણ સામે ભારતે વૈકલ્પિક બજારો શોધવાનું શરૂ કરી દીધું છે. ભારતની આ આત્મનિર્ભર નીતિએ ટ્રમ્પને તેમના જ દેશમાં ટીકાનો સામનો કરવો પડી રહ્યો છે. ભારતના આ કડક વલણથી અમેરિકા પર દબાણ વધ્યું છે, કારણ કે ભારત અમેરિકા માટે મહત્વનું બજાર છે. કેન્દ્રીય મંત્રી પીયૂષ ગોયલે લોકસભામાં કહ્યું, “રાષ્ટ્રીય હિતોનું રક્ષણ કરવા અને આગળ વધવા માટે અમે તમામ જરૂરી પગલાં લઈશું.”
ટ્રમ્પનો આ ટેરિફ નિર્ણય ભારત સાથેની વેપાર વાટાઘાટોમાં ફાયદો મેળવવાની રણનીતિ હોવાનું કોંગ્રેસના સાંસદ શશિ થરૂરે જણાવ્યું. તેમણે કહ્યું, “આ માત્ર સોદાબાજીની રણનીતિ હોઈ શકે છે, પરંતુ જો સારો સોદો નહીં થાય, તો આપણે પાછળ હટવું પડી શકે છે.” ભારતે F-35 ફાઇટર જેટ ખરીદવાની અમેરિકી દરખાસ્તને પણ નકારી કાઢી, જેનાથી અમેરિકાનું દબાણ નિષ્ફળ થયું છે.
ગુજરાત, જે ભારતનું આર્થિક પાવરહાઉસ છે, તેના ઉદ્યોગો અને નિકાસકારો પર આ ટેરિફની અસર થઈ શકે છે. ખાસ કરીને ટેક્સટાઇલ, ફાર્માસ્યુટિકલ્સ અને રસાયણ ઉદ્યોગોને નુકસાન થવાની શક્યતા છે. જોકે, ગુજરાતના ઉદ્યોગપતિઓ અને નિકાસકારો નવા બજારો જેવા કે આફ્રિકા, એશિયા અને યુરોપમાં તકો શોધી રહ્યા છે, જે ભારતની આત્મનિર્ભર ભારત નીતિને મજબૂતી આપશે.
આ પણ વાંચો:ચીન-રશિયાની જાપાન સમુદ્રમાં ગુપ્ત લશ્કરી કવાયત, પુતિન-શીની યોજના, US સબમરીનનો જવાબ!
આ પણ વાંચો: અમેરિકામાં અભ્યાસ કરતા લોકો માટે ખરાબ સમાચાર!સમાપ્ત થઈ શકે છે OPT પ્રોગ્રામ,નહીં મળે નોકરી
