અમેરિકાની ચૂંટણી બાદ ડેમોક્રેટનાં ઉમેદવારો વિજયની નજીક પહોંચી ગયા છે. તેમની જીત પર સત્તાવાર મહોરની રાહ હવે જોવાઇ રહી છે. વિજયને જોતા, જો બિડને શુક્રવારે ગૃહ નગર વિલ્મિંગ્ટનમાં કહ્યું કે રાષ્ટ્રપતિ તરીકે, સમગ્ર દેશનું પ્રતિનિધિત્વ કરવાની જવાબદારી તેમના પર રહેશે. બિડને જાહેરમાં લોકોને વિભાજનનાં બીજ વાવનારી વાતોને પાછળ છોડવાની વાત કરી હતી.
શનિવારે તેમના સમર્થકોને સંબોધન કરતાં ડેમોક્રેટનાં ઉમેદવાર જો બિડને કહ્યું હતું કે, અમે કોરોના વાયરસને નિયંત્રણમાં રાખવાની અમારી યોજના એ જ દિવસથી લાગુ કરીશું. તેમણે કહ્યું, “અમેરિકન નાગરિકોએ કોરોના વાયરસ સંકટ, આર્થિક મંદી અને જાતિવાદ પર કાર્યવાહી કરવા માટે ડેમોક્રેટ્સની પસંદગી કરી છે અને અમે તેના પર પ્રથમ દિવસથી કામ કરીશું.”
જો બિડનની આ જાહેરાત સ્પષ્ટ રીતે સંકેત આપે છે કે કોરોના વાયરસને ફરીથી કાબૂમાં લેવા યુ.એસ. માં કેટલીક કડક જોગવાઈઓ લાગુ કરી શકાય છે. જેમ જેમ કોરોના કેસ વધી રહ્યા છે, શહેરોને કાં તો ફરીથી લોક કરી શકાય છે અથવા માસ્ક અને સામાજિક અંતરને લગતા કડક નિયમો લાગુ કરી શકાય છે. તેનું એક કારણ એ છે કે સતત ત્રણ દિવસથી યુ.એસ.માં કોરોના વાયરસનાં નવા કેસો જોવા મળી રહ્યા છે.
જો આપણે આજનાં આંકડા જોઈએ, તો કોરોનાએ અમેરિકામાં બધા રેકોર્ડ તોડી નાખ્યા છે. એક જ દિવસમાં કોરોનાના 1.28 લાખથી વધુ નવા કેસ નોંધાયા છે, જે રોગચાળો શરૂ થયા પછી એક દિવસમાં સૌથી વધુ કેસ છે. યુ.એસ. માં સતત ત્રીજા દિવસે એક લાખથી વધુ કોરોનાનાં કેસ નોંધાયા છે.