Uttar Pradesh News: ઉત્તર પ્રદેશના કૌશાંબી જિલ્લામાં મનૌરી વિસ્તારમાં આવેલી ફટાકડા બનાવવાની ફેક્ટરીમાં સોમવારે બપોરે ભીષણ આગ બાદ થયેલા સતત વિસ્ફોટોથી ભારે (Kaushambi Firecracker Factory Blast) અફરાતફરી મચી ગઈ હતી. વિસ્ફોટની તીવ્રતા એટલી હતી કે આસપાસના કેટલાક મકાનોને પણ નુકસાન થયું અને કેટલાક મકાનો ધરાશાયી થયા હતા. અત્યાર સુધીમાં 10 લોકોનાં મોતની પુષ્ટિ થઈ છે, જ્યારે 22થી વધુ લોકો ઘાયલ થયા હોવાનું સામે આવ્યું છે.
એક કલાક સુધી થતા રહ્યા વિસ્ફોટ
મળતી માહિતી પ્રમાણે બપોરે આશરે 12 વાગ્યાની આસપાસ ફટાકડા ફેક્ટરીમાંથી ધુમાડો નીકળતો જોવા મળ્યો હતો. ત્યારબાદ અચાનક વિસ્ફોટ શરૂ થયા હતા. લગભગ એક કલાક સુધી એક પછી એક વિસ્ફોટ થતા રહેતાં આસપાસના વિસ્તારમાં ભયનો માહોલ સર્જાયો હતો.
Kaushambi Firecracker Factory Blast: આસપાસના મકાનો પણ ધરાશાયી
વિસ્ફોટ એટલા શક્તિશાળી હતા કે ફેક્ટરી નજીક આવેલા કેટલાક મકાનોને ભારે નુકસાન થયું હતું અને કેટલાક મકાનો ધરાશાયી થયા હતા. કાટમાળ નીચે કેટલાક લોકો દટાયા હોવાની આશંકાને પગલે બચાવ કામગીરીને વધુ ઝડપી બનાવવામાં આવી છે. શરૂઆતમાં પાંચ લોકોનાં મોત અને 22 લોકો ઘાયલ થયાની માહિતી સામે આવી હતી. જોકે, સાંજ સુધીમાં મૃતકોની સંખ્યા વધી હોવાનું અધિકારીઓ તરફથી જણાવાયું છે. ઘાયલોને સારવાર માટે પ્રયાગરાજની એસઆરએન હોસ્પિટલ સહિતની હોસ્પિટલોમાં ખસેડવામાં આવ્યા છે.
ફાયર બ્રિગેડની અનેક ટીમો ઘટનાસ્થળે
ઘટનાની જાણ થતાં જ પોલીસ અને ફાયર બ્રિગેડની ટીમો ઘટનાસ્થળે પહોંચી હતી. આગ પર કાબૂ મેળવવા માટે ફાયર બ્રિગેડની અનેક ગાડીઓ કામે લાગી હતી. આગ સંપૂર્ણપણે કાબૂમાં આવ્યા બાદ જ નુકસાનનો ચોક્કસ અંદાજ મળી શકશે.
આગની સ્થિતિ નિયંત્રણમાં આવ્યા બાદ કાટમાળ હટાવવાની કામગીરી શરૂ કરવામાં આવી છે. બુલડોઝરની મદદથી ધરાશાયી થયેલા મકાનોનો કાટમાળ દૂર કરવામાં આવી રહ્યો છે. કાટમાળમાંથી વધુ લોકો મળી આવે તેવી શક્યતાને ધ્યાનમાં રાખીને રેસ્ક્યૂ ટીમો સઘન તપાસ કરી રહી છે.
રહેણાંક વિસ્તારથી દૂર મકાનમાં બનતા હતા ફટાકડા
પ્રાથમિક માહિતી અનુસાર મનૌરી ગામમાં બસ્તીથી થોડે દૂર આવેલા એક મકાનમાં ફટાકડા બનાવવાનું કામ કરવામાં આવતું હતું. આ ફેક્ટરી મનૌરીના રહેવાસી આદિલની હોવાનું જણાવવામાં આવી રહ્યું છે. મકાનની ઉપરથી વીજળીના તાર પસાર થતા હોવાનું પણ સામે આવ્યું છે. જોકે, આગનું ચોક્કસ કારણ તપાસ બાદ જ સ્પષ્ટ થશે.
આસપાસની દુકાનો અને મકાનોમાં પણ અસર
ફટાકડાના વિસ્ફોટ દરમિયાન નજીક આવેલા એક કારખાના અને આટા ચક્કીમાં પણ લોકો હાજર હોવાનું જાણવા મળ્યું છે. વિસ્ફોટના કારણે આસપાસના વિસ્તારમાં પણ નુકસાન થયું હોવાનું સામે આવ્યું છે. ઘટનાની જાણ થતાં ગ્રામજનો મોટી સંખ્યામાં સ્થળ પર એકત્ર થઈ ગયા હતા.
DM-SP સહિતના અધિકારીઓ ઘટનાસ્થળે
ઘટનાની ગંભીરતાને ધ્યાનમાં રાખીને કૌશાંબીના જિલ્લા કલેક્ટર અને પોલીસ અધિક્ષક સહિતના ઉચ્ચ અધિકારીઓ ઘટનાસ્થળે પહોંચ્યા હતા. અધિકારીઓએ રાહત અને બચાવ કામગીરીનું નિરીક્ષણ કર્યું હતું અને કાટમાળમાં કોઈ વ્યક્તિ ફસાઈ છે કે નહીં તે અંગે તપાસ કરવામાં આવી રહી છે.
આગનું કારણ શોધવા તપાસ શરૂ
હાલ આગ કેવી રીતે લાગી અને ત્યારબાદ આટલા મોટા પાયે વિસ્ફોટ કેવી રીતે થયા તે અંગે તપાસ શરૂ કરવામાં આવી છે. ફેક્ટરીમાં તે સમયે કેટલા લોકો હાજર હતા અને સુરક્ષાના નિયમોનું પાલન કરવામાં આવ્યું હતું કે નહીં તે સહિતના મુદ્દાઓની પણ તપાસ કરવામાં આવી રહી છે. આ ઘટનાએ ફટાકડાના ગેરકાયદેસર અથવા અસુરક્ષિત ઉત્પાદન અને સંગ્રહ અંગે પણ ગંભીર સવાલો ઊભા કર્યા છે. અધિકૃત તપાસ પૂર્ણ થયા બાદ જ દુર્ઘટનાના કારણો અને જવાબદારી અંગે સ્પષ્ટ સ્થિતિ સામે આવશે.
