Gujarat News: ગુજરાતમાં તહેવારોની સિઝન વચ્ચે રાશનકાર્ડ ધારકો માટે ચિંતાજનક સ્થિતિ ઊભી થઈ છે. રાજ્યની સસ્તા અનાજની અંદાજે 17 હજાર દુકાનોમાંથી લગભગ 35 ટકા દુકાનધારકો સપ્ટેમ્બર મહિનાના ખાંડના જથ્થા (Sugar Distribution Gujarat) માટે ઓનલાઈન પ્રક્રિયા પૂર્ણ કરી ઈ-ચલણ ભરી શક્યા ન હોવાનો દાવો કરવામાં આવી રહ્યો છે. જેના કારણે રાજ્યના લાખો લાભાર્થીઓને જન્માષ્ટમી અને દિવાળી જેવા તહેવારો દરમિયાન રાશન દુકાન (Fair Price Shop) પરથી મળતી ખાંડથી વંચિત રહેવાની શક્યતા વ્યક્ત કરવામાં આવી છે.
35% દુકાનધારકો ઈ-ચલણ ભરી શક્યા નહીં
ઓલ ગુજરાત ફેર પ્રાઈઝ એસોસિએશનના મહામંત્રી હિતુભા જાડેજાના જણાવ્યા મુજબ, ખાંડના વિતરણ માટે સામાન્ય રીતે અગાઉથી પરમીટ, ઈ-ચલણ અને ચુકવણીની પ્રક્રિયા પૂર્ણ કરવામાં આવે છે. સપ્ટેમ્બર મહિનાના ખાંડના જથ્થા માટે 21થી 25 ઓગસ્ટ દરમિયાન (Ration Shop Gujarat) આ પ્રક્રિયા કરવાની હતી. જોકે, સમય ઓછો મળવાને કારણે રાજ્યના આશરે 35 ટકા સસ્તા અનાજના દુકાનધારકો ઈ-ચલણ ભરી શક્યા ન હોવાનું એસોસિએશનનું કહેવું છે.
Sugar Distribution Gujarat: મુદત વધારી, પરંતુ ખાંડને બાકાત રાખવાનો આક્ષેપ
દુકાનધારકોની મુશ્કેલીને ધ્યાનમાં રાખીને રાશન વિતરણ માટે ચલણ જનરેટ કરવાની સમયમર્યાદા 25 ઓગસ્ટથી વધારીને 31 ઓગસ્ટ કરવામાં આવી હતી. જોકે, એસોસિએશનનો દાવો છે કે આ વધારાની મુદતમાં ખાંડના જથ્થાને સામેલ કરવામાં આવ્યો નથી. આ કારણે જે દુકાનદારો સમયસર પ્રક્રિયા પૂર્ણ કરી શક્યા નથી ત્યાં સપ્ટેમ્બરમાં ખાંડનું વિતરણ થઈ શકશે કે નહીં તે અંગે અનિશ્ચિતતા ઊભી થઈ છે.
રાજકોટની 700માંથી 250થી વધુ દુકાનો પર અસરની શક્યતા
એસોસિએશનના જણાવ્યા મુજબ રાજકોટ શહેર અને જિલ્લામાં આશરે 700 સસ્તા અનાજની દુકાનો પરથી ખાંડનું વિતરણ કરવામાં આવે છે. જો 35 ટકાનો આંકડો લાગુ પડે તો રાજકોટ જિલ્લામાં 250થી વધુ દુકાનો પર ખાંડના વિતરણને અસર થવાની શક્યતા છે. એસોસિએશનનો દાવો છે કે રાજકોટ જિલ્લામાં આશરે 50 હજાર રાશનકાર્ડ ધારકોને આ સમસ્યાનો સામનો કરવો પડી શકે છે.
ગોડાઉનમાં જથ્થો હોવા છતાં વિતરણનો પ્રશ્ન
દુકાનદારોના સંગઠનનો વધુ એક દાવો છે કે ગોડાઉનમાં ખાંડનો પૂરતો જથ્થો ઉપલબ્ધ છે. તેથી તમામ પાત્ર દુકાનદારોને ખાંડનો જથ્થો આપવામાં આવે તો લાભાર્થીઓને તહેવારો પહેલાં ખાંડ મળી શકે છે. એક જ વિસ્તારમાં કેટલીક દુકાનો પર ખાંડ ઉપલબ્ધ હોય અને અન્ય દુકાનો પર ન મળે તો રાશનકાર્ડ ધારકો અને દુકાનદારો વચ્ચે વિવાદ સર્જાવાની પણ શક્યતા વ્યક્ત કરવામાં આવી છે.
ખાંડના વિતરણની સમસ્યાનો ઉકેલ લાવવા ફેર પ્રાઈઝ શોપ એસોસિએશન દ્વારા પુરવઠા વિભાગના અધિકારીઓ સમક્ષ રજૂઆત કરવાની તૈયારી કરવામાં આવી છે. એસોસિએશન સરકાર પાસે બાકી રહેલા દુકાનદારો માટે પ્રક્રિયા પૂર્ણ કરવાની તક આપવા અને પાત્ર રાશનકાર્ડ ધારકોને સમયસર ખાંડ મળે તેવી વ્યવસ્થા કરવાની માંગ કરશે.
ખાંડના ભાવ વધતાં સસ્તા દરે વિતરણની માંગ
એસોસિએશનના હોદ્દેદારોનું કહેવું છે કે બજારમાં ખાંડના ભાવમાં વધારો થયો છે ત્યારે ગરીબ અને જરૂરિયાતમંદ પરિવારોને સરકારી વ્યવસ્થા મારફતે સસ્તા દરે ખાંડ ઉપલબ્ધ કરાવવી જરૂરી છે. હાલમાં અંત્યોદય યોજનાના લાભાર્થીઓને (Ration Card Holders) રૂ.15 અને BPL લાભાર્થીઓને રૂ.22ના દરે ખાંડ આપવામાં આવતી હોવાનું એસોસિએશન તરફથી જણાવાયું છે. હવે સપ્ટેમ્બર મહિનામાં તમામ પાત્ર રાશનકાર્ડ ધારકોને ખાંડનો જથ્થો મળી રહે છે કે નહીં તે અંગે આગામી દિવસોમાં સ્થિતિ સ્પષ્ટ થશે.
આ પણ વાંચો: નાગરિકો માટે રાહતના સમાચાર! ડુંગળી અને ખાંડના વધતા ભાવોને લઈને દિલ્હી સરકારનો મહત્વનો નિર્ણય.
આ પણ વાંચો: સુરત: દેશમાં ખાંડના ભાવ વધવાની આશંકા, કેન્દ્ર સરકારે નિકાસ પર લગાવ્યો સંપૂર્ણ પ્રતિબંધ
આ પણ વાંચો: ખાંડ બાદ હવે ડુંગળી રડાવશે! 15 દિવસમાં ભાવ રૂ.40થી વધીને રૂ.70, આગામી દિવસોમાં વધુ ભડકો
