Kheda News: ખેડા નજીક આવેલી ખાનગી ઈલાઈટ સ્કૂલ (Kheda Elite School)માં ધોરણ-6ના વિદ્યાર્થીને સસ્પેન્ડ કરવાના નિર્ણયને લઈને વિવાદ ઊભો થયો છે. વિદ્યાર્થીની બેગમાંથી સિગારેટ, લાઈટર અને પડીકી મળી આવ્યાના મામલે શાળાએ તેને 10 દિવસ માટે સસ્પેન્ડ કર્યો હતો. હવે વિદ્યાર્થીને ફરી પ્રવેશ આપતી વખતે શું માંગવામાં આવ્યું હતું તે મુદ્દે વાલી અને શાળા સંચાલન વચ્ચે મતભેદ સામે આવ્યો છે.
વિદ્યાર્થીની બેગમાંથી સિગારેટ અને લાઈટર મળ્યાનો મામલો
માહિતી મુજબ, શાળા (Kheda Elite School)માં તપાસ દરમિયાન ત્રણ વિદ્યાર્થીઓમાંથી એક વિદ્યાર્થીની બેગમાંથી સિગારેટ, લાઈટર અને પડીકી મળી આવી હતી. શાળા પ્રશાસને આ ઘટનાને ગંભીર શિસ્તભંગ ગણાવી સંબંધિત વિદ્યાર્થીને 10 દિવસ માટે સસ્પેન્ડ કરવાનો નિર્ણય લીધો હતો.શાળાના જણાવ્યા મુજબ, આ કાર્યવાહીનો હેતુ વિદ્યાર્થીને પોતાની ભૂલ સમજાવવાનો અને ભવિષ્યમાં આવી પ્રવૃત્તિઓથી દૂર રહેવા પ્રેરિત કરવાનો હતો.
વાલીનો ગંભીર આક્ષેપ
સસ્પેન્શન પૂર્ણ થયા બાદ વિદ્યાર્થી જ્યારે ફરી શાળા (Kheda Elite School)માં ગયો ત્યારે તેના પિતા કેયુર પટેલે આક્ષેપ કર્યો કે શાળાના પ્રિન્સિપાલે બાળકને વર્ગખંડમાં બેસાડતા પહેલાં માનસિક સ્વસ્થતાનું (મેન્ટલ ફિટનેસ) સર્ટિફિકેટ રજૂ કરવાની શરત મૂકી હતી.વાલીનું કહેવું છે કે આવી માંગ બાળકના આત્મવિશ્વાસ અને માનસિક સ્થિતિ પર નકારાત્મક અસર કરી શકે છે.
શાળાએ શું સ્પષ્ટતા કરી?
વાલીના આક્ષેપો બાદ ઈલાઈટ સ્કૂલના કોઓર્ડિનેટર લીના સઈઝે શાળાનો પક્ષ રજૂ કર્યો હતો. તેમણે જણાવ્યું કે, વિદ્યાર્થી દ્વારા થયેલી ભૂલ ગંભીર હતી. સસ્પેન્શન વિદ્યાર્થીના હિત અને શિસ્ત જાળવવા માટે અપાયું હતું. શાળાએ મેન્ટલ ફિટનેસ સર્ટિફિકેટ માંગ્યું નહોતું. વિદ્યાર્થીનું યોગ્ય કાઉન્સિલિંગ કરાયું હોવાનો પુરાવો અથવા પત્ર રજૂ કરવા કહેવામાં આવ્યું હતું. શાળાના જણાવ્યા પ્રમાણે, કાઉન્સિલિંગનો હેતુ વિદ્યાર્થીના વર્તનમાં સકારાત્મક સુધારો લાવવાનો હતો.
Kheda Elite School: બંને પક્ષના દાવા અલગ
હાલ આ સમગ્ર મામલે વાલી અને શાળા સંચાલન બંને પોતપોતાનો પક્ષ રજૂ કરી રહ્યા છે.
વાલીનો દાવો: બાળક પર અનાવશ્યક માનસિક દબાણ કરવામાં આવ્યું.
શાળાનો દાવો: સમગ્ર કાર્યવાહી વિદ્યાર્થીના હિત અને સુધારણા માટે કરવામાં આવી.
આ ઘટનાએ સ્થાનિક સ્તરે તેમજ અન્ય વાલીઓમાં પણ ચર્ચા જગાવી છે.
આ પણ વાંચો:સ્કૂલના વોશરૂમમાં વિદ્યાર્થી સાથે અયોગ્ય વર્તન! અમદાવાદની LDR સ્કૂલમાં કર્મચારી સસ્પેન્ડ
આ પણ વાંચો:ભાવનગર સર ટી હોસ્પિટલ રેગિંગ કેસ: 6 મેડિકલ વિદ્યાર્થીઓ સસ્પેન્ડ, પોલીસ ફરિયાદની તૈયારી
