Kolkata Howrah Municipal Election BJP NCPI: પશ્ચિમ બંગાળ વિધાનસભા ચૂંટણી બાદ રાજ્યના રાજકારણમાં વધુ એક મહત્વપૂર્ણ ઘટનાક્રમ સામે આવ્યો છે. તૃણમૂલ કોંગ્રેસ છોડીને દિલ્હીમાં ભાજપની આગેવાની હેઠળના NDA સાથે જોડાયેલા બાગી સાંસદો સાથે જોડાણની અટકળો વચ્ચે ભાજપે કોલકાતા મ્યુનિસિપલ કોર્પોરેશન અને હાવડા મ્યુનિસિપલ કોર્પોરેશનની આગામી ચૂંટણી પોતાના દમ પર લડવાનો નિર્ણય જાહેર કર્યો છે. સાથે જ ભાજપે નેશનાલિસ્ટ સિટિઝન્સ પાર્ટી ઓફ ઇન્ડિયા એટલે કે NCPI સાથે ગઠબંધનની શક્યતાઓને નકારી કાઢી છે.

પોતાના સંગઠનના દમ પર ચૂંટણી લડશે ભાજપ

બંગાળ ભાજપના(BJP) પ્રદેશ અધ્યક્ષ સમિક ભટ્ટાચાર્યે સ્પષ્ટ કર્યું છે કે રાજ્યમાં ભાજપનો કોઈ ચૂંટણી ગઠબંધન સાથી નથી. તેમના જણાવ્યા અનુસાર કોલકાતા અને હાવડા નગર નિગમની ચૂંટણીમાં પાર્ટી એકલા હાથે મેદાનમાં ઉતરશે. તેમણે એમ પણ કહ્યું કે દિલ્હીમાં રાજકીય સમજૂતી અલગ બાબત છે, પરંતુ તેનો અર્થ એ નથી કે પશ્ચિમ બંગાળમાં પણ સમાન ગઠબંધન કરવામાં આવે. બંને નગર નિગમોમાં વોર્ડ પરિસીમનની પ્રક્રિયા પૂર્ણ થયા બાદ દુર્ગાપૂજા પછી ચૂંટણી યોજાવાની શક્યતા છે.

વિધાનસભા જીતથી ભાજપનો આત્મવિશ્વાસ વધ્યો

વિધાનસભા ચૂંટણીમાં મળેલી સફળતા બાદ ભાજપ (BJP) હવે શહેરી વિસ્તારોમાં પણ પોતાનું સંગઠન વધુ મજબૂત કરવા ઉત્સુક છે. કોલકાતા મ્યુનિસિપલ કોર્પોરેશનની ચૂંટણીની જવાબદારી સંભાળતા ભાજપ નેતા રિતેશ તિવારીએ પાર્ટી તમામ 209 બેઠકો પર ઉમેદવારો ઉતારશે અને મોટી જીત મેળવવાનો દાવો કર્યો છે. આ નિવેદનથી સ્પષ્ટ થાય છે કે ભાજપ આ ચૂંટણીને સંગઠન શક્તિ દર્શાવવાની મોટી તક તરીકે જોઈ રહ્યું છે.

NCPI હજુ પણ ગઠબંધનની આશામાં

બીજી તરફ TMCના બાગી સાંસદો દ્વારા રચાયેલી NCPI હજુ પણ ભાજપ સાથે ચૂંટણી જોડાણની આશા રાખી રહી છે. NCPI નેતા કાકોલી ઘોષ દસ્તીદારે પક્ષને NDAના મહત્વપૂર્ણ સહયોગી તરીકે ગણાવીને ગઠબંધનના ભાગરૂપે ચૂંટણી લડવાની ઇચ્છા વ્યક્ત કરી છે. TMCના ખરાબ પ્રદર્શન બાદ સયોની ઘોષ અને યુસુફ પઠાણ સહિતના કેટલાક નેતાઓ NCPIમાં જોડાયા હોવાનું જણાવાયું છે. પશ્ચિમ બંગાળ ભાજપનું માનવું છે કે સ્થાનિક ચૂંટણી પોતાના કાર્યકરો અને સંગઠનના બળ પર લડવી જોઈએ. પાર્ટીના નેતાઓનું કહેવું છે કે જે પૂર્વ TMC નેતાઓ સામે ભાજપના કાર્યકરોએ વર્ષો સુધી રાજકીય લડાઈ લડી છે, તેમની સાથે અચાનક ગઠબંધન કરવાથી કાર્યકરોમાં અસંતોષનો સંદેશ જઈ શકે છે. સાથે જ અગાઉ લગાવવામાં આવેલા ભ્રષ્ટાચારના આરોપોને કારણે આવા નેતાઓ સાથે રાજકીય જોડાણ કરવાથી મતદારોમાં પણ સવાલ ઊભા થઈ શકે છે.

ચૂંટણીમાં બહુકોણીય મુકાબલાની શક્યતા

ભાજપના(BJP) એકલા હાથે ચૂંટણી લડવાના નિર્ણયથી કોલકાતા અને હાવડામાં મુકાબલો વધુ રસપ્રદ બની શકે છે. આગામી ચૂંટણીમાં ભાજપ અને મમતા બેનર્જીની TMC ઉપરાંત NCPI, ડાબેરી પક્ષો અને કોંગ્રેસ પણ મેદાનમાં રહેવાની શક્યતા છે. આવી સ્થિતિમાં વિપક્ષી મતોનું વિભાજન થાય તો તેનો રાજકીય લાભ ભાજપને મળી શકે છે. હવે જોવાનું રહેશે કે નગર નિગમની ચૂંટણીમાં ભાજપનો આ એકલા હાથે લડવાનો દાવ કેટલો સફળ સાબિત થાય છે.

આ પણ વાંચો:BJPએ મોરચાના પ્રભારીઓની કરી જાહેરાત, સંગઠનને ચૂંટણી માટે વધુ મજબૂત કરવાની કવાયત

આ પણ વાંચો:બંગાળમાં ભાજપ સરકારના શપથ ગ્રહણ, પીએમ મોદીએ નતમસ્તક થઈ જનતાનો માન્યો આભાર

આ પણ વાંચો:PM મોદી આજે લખનૌમાં અટલ જયંતિ પર ભવ્ય કાર્યક્રમ ‘રાષ્ટ્ર પ્રેરણા સ્થળ’નું ઉદ્ઘાટન કરશે