મહિનાઓની રાહ જોયા બાદ આજે સરકારી વીમા કંપની LICના શેર ઓપન માર્કેટમાં લિસ્ટ થયા હતા. જોકે, શેરબજારમાં LICની શરૂઆત સારી રહી ન હતી. ગ્રે માર્કેટમાં શૂન્યથી નીચે પ્રીમિયમ પર ટ્રેડિંગ કર્યા પછી, BSE પર પ્રી-ઓપન સેશનમાં LICના શેર 12 ટકાથી વધુના ઘટાડા સાથે ટ્રેડ થઈ રહ્યા હતા. પ્રી-ઓપનમાં, LICના શેરે પ્રથમ દિવસની શરૂઆત 12.60 ટકા અથવા રૂ. 119.60ના નુકસાન સાથે રૂ. 829 પર કરી હતી.
LICનો આ પ્રથમ ઈશ્યુ ભારતના ઈતિહાસમાં અત્યાર સુધીનો સૌથી મોટો આઈપીઓ સાબિત થયો છે. આ IPO માટે પ્રાઇસ બેન્ડ 902-949 રૂપિયા નક્કી કરવામાં આવી હતી. પ્રથમ વખત, IPO બંને સપ્તાહના અંતે ખુલ્લું રહ્યું. એલઆઈસીના આઈપીઓ, જે રેકોર્ડ 6 દિવસ સુધી ખુલ્લા હતા, તેને લગભગ દરેક કેટેગરીમાં સારો પ્રતિસાદ મળ્યો હતો. જોકે, ગ્રે માર્કેટ (LIC IPO GMP)માં LIC IPOનું પ્રીમિયમ લિસ્ટિંગ પહેલા શૂન્યથી નીચે ગયું છે, જેના કારણે રોકાણકારોને પહેલા જ દિવસે નુકસાનના સંકેત દેખાઈ રહ્યા છે.
સરકારી વીમા કંપનીનો લિસ્ટિંગ સમારોહ સવારે 08:45 વાગ્યે શરૂ થયો હતો. લિસ્ટિંગ સેરેમનીમાં BSEના CEO અને MD આશિષ કુમાર ચૌહાણ, DIPAM સેક્રેટરી તુહિન કાંત પાંડે સહિત તમામ LIC અધિકારીઓ હાજર હતા.
લિસ્ટિંગના એક દિવસ પહેલા, LIC IPOનો GMP માઈનસ 25 રૂપિયા થઈ ગયો હતો. આજે તેમાં થોડો સુધારો જોવા મળ્યો છે, પરંતુ તે હજુ પણ રૂ.20ના નેગેટિવમાં ટ્રેડ થઈ રહ્યો છે. એક સમયે તે ગ્રે માર્કેટમાં રૂ. 92ના પ્રીમિયમ સાથે ટ્રેડ થઈ રહ્યો હતો. ટોપ શેર બ્રોકરના ડેટા અનુસાર, હાલમાં LIC IPOનું ગ્રે માર્કેટ પ્રીમિયમ માઈનસ 20 રૂપિયા છે. GMP તરફથી આ સંકેત છે કે રોકાણકારોને પહેલા જ દિવસે નુકસાન સહન કરવું પડી શકે છે. વિશ્લેષકો એવું પણ માની રહ્યા છે કે LICનું લિસ્ટિંગ ડિસ્કાઉન્ટ સાથે થશે.
ઉલ્લેખનીય છે કે દેશના સૌથી મોટા IPOમાં 16,20,78,067 શેરની ઓફર કરવામાં આવી હતી અને તેના માટે 47,83,25,760 બિડ મળી હતી. પોલિસીધારકોની શ્રેણીમાં IPO 6.12 વખત સબસ્ક્રાઇબ થયો હતો. એ જ રીતે, LIC કર્મચારીઓ માટે આરક્ષિત ભાગ 4.4 ગણો સબસ્ક્રાઇબ કરવામાં આવ્યો હતો. રિટેલ રોકાણકારોનો શેર પણ 1.99 ગણો સબસ્ક્રાઇબ થયો હતો. આ સિવાય, QIB માટે નિર્ધારિત ભાગ 2.83 વખત સબ્સ્ક્રાઇબ થયો હતો અને NII ભાગ 2.91 વખત સબ્સ્ક્રાઇબ થયો હતો. એકંદરે, LIC IPO ને 2.95 ગણું સબસ્ક્રિપ્શન મળ્યું.
