Maharashtra Parbhani Maruti Temple Accident: મહારાષ્ટ્રના (Maharashtra)પરભણી જિલ્લામાંથી એક અત્યંત દર્દનાક અને મોટા સમાચાર સામે આવ્યા છે. પરભણી જિલ્લાના માનવત તાલુકામાં આવેલા પ્રસિદ્ધ યશવાડી મારુતિ (હનુમાન) મંદિર પરિસરમાં શનિવારે એક ભયાનક અકસ્માત સર્જાયો છે. અહીં મંદિરની સામે બનેલા સભા મંડપની છત અચાનક પત્તાના મહેલની જેમ ધરાશાયી થઈ ગઈ હતી. આ દુર્ઘટનામાં અત્યાર સુધીમાં 5 શ્રદ્ધાળુઓના કરૂણ મોત નીપજ્યા છે, જ્યારે 30 થી 40 લોકો કાટમાળ નીચે દબાયા હોવાની આશંકા છે. આ અકસ્માતને પગલે સમગ્ર વિસ્તારમાં અરેરાટી વ્યાપી ગઈ છે.

શનિવાર અને કીર્તનના કારણે મંડપમાં ભારે ભીડ હતી

શનિવારનો પવિત્ર દિવસ હોવાથી હનુમાન મંદિરમાં(Maharashtra)  દર્શન કરવા માટે વહેલી સવારથી જ મોટી સંખ્યામાં ભક્તો ઉમટ્યા હતા. મંદિરમાં કીર્તન સહિતના વિવિધ ધાર્મિક કાર્યક્રમોનું આયોજન કરવામાં આવ્યું હતું, જેના કારણે સભા મંડપ શ્રદ્ધાળુઓથી ખીચોખીચ ભરેલો હતો. કાર્યક્રમ પૂરા ઉત્સાહ સાથે ચાલુ હતો તે દરમિયાન જ અચાનક સભા મંડપની છત તૂટી પડી હતી. મંડપ ધરાશાયી થતાં જ આસપાસના વિસ્તારમાં મોટો અવાજ થયો હતો અને સ્થળ પર ભારે ચીસાચીસ, નાસભાગ અને અફરાતફરી મચી ગઈ હતી.

Maharashtra માં યુદ્ધના ધોરણે રેસ્ક્યૂ ઓપરેશન શરૂ

દુર્ઘટનાની જાણ થતાં જ આસપાસના સ્થાનિક નાગરિકો સૌથી પહેલા બચાવ કામગીરી માટે દોડી આવ્યા હતા. ત્યારબાદ જિલ્લા પ્રશાસન, પોલીસ કાફલો અને આપત્તિ વ્યવસ્થાપનની રાહત-બચાવ ટીમો તાત્કાલિક ઘટનાસ્થળે પહોંચી ગઈ હતી અને યુદ્ધના ધોરણે રેસ્ક્યૂ ઓપરેશન શરૂ કર્યું હતું. કાટમાળ ખૂબ જ ભારે હોવાથી જેસીબી (JCB) અને અન્ય મશીનોની મદદથી સિમેન્ટ અને લોખંડના પતરા હટાવવાની કામગીરી ચાલુ કરવામાં આવી છે જેથી અંદર ફસાયેલા લોકોને વહેલી તકે ઓક્સિજન અને મદદ પહોંચાડી શકાય.

ઇજાગ્રસ્તોને હોસ્પિટલ ખસેડાયા, મૃત્યુઆંક વધવાની ભીતિ

કાટમાળમાંથી અત્યાર સુધીમાં અનેક લોકોને બહાર કાઢવામાં આવ્યા છે. ગંભીર રીતે ઈજાગ્રસ્ત થયેલા મુસાફરો અને ભક્તોને તાત્કાલિક ધોરણે એમ્બ્યુલન્સ મારફતે આર.પી. (R.P.) હોસ્પિટલ અને અન્ય નજીકની સરકારી હોસ્પિટલોમાં ખસેડાયા છે. હોસ્પિટલના સત્તાધીશોના જણાવ્યા મુજબ, દાખલ કરાયેલા દર્દીઓમાંથી 10 થી વધુ લોકોની હાલત અત્યંત નાજુક છે, જેના કારણે મૃત્યુઆંક (Maharashtra) હજુ પણ વધવાની ભીતિ સેવાઈ રહી છે. પ્રશાસને સમગ્ર વિસ્તારની ઘેરાબંધી કરી લીધી છે અને વરિષ્ઠ અધિકારીઓ પરિસ્થિતિ પર સતત નજર રાખી રહ્યા છે.

આ પણ વાંચો:અંબાજી મંદિરમાં દારૂ, ચિકન પાર્ટીનો વિવાદ, 11 પૂજારીઓ અને કર્મચારીઓને સસ્પેન્ડ

આ પણ વાંચો:આંધ્રપ્રદેશના શ્રીકાકુલમમાં વેંકટેશ્વર સ્વામી મંદિરમાં ભાગદોડ, 9 લોકોના મોત, અનેક ઘાયલ

આ પણ વાંચો:ભદ્રકાળી મંદિરમાં ‘સનાતન ધર્મના લોકોએ જ બનાવેલી પ્રસાદી લાવવી’ના લાગ્યા બોર્ડ