મણિપુર હિંસાની આગમાં સળગી રહ્યું છે. બુધવારે, મ્યાનમારની સરહદે આવેલા તેંગનોપલ જિલ્લાના મોરેહ શહેરમાં એક ટોળાએ સુરક્ષા દળોના ટ્રાન્ઝિટ કેમ્પ પર હુમલો કર્યો હતો. જે બાદ ફાયરિંગ શરૂ થયું હતું. ટોળાએ વન વિભાગની ઇમારતને પણ આગ ચાંપી દીધી હતી. સુરક્ષા દળોએ ભીડને કાબૂમાં લેવા માટે ટીયર ગેસના શેલ પણ છોડ્યા હતા.હજુ સુધી કોઈ જાનહાનિની માહિતી સામે આવી નથી. કોલોઈ મણિપુરના સોશિયલ મીડિયા એકાઉન્ટે વીડિયો પોસ્ટ કર્યો છે. એવો દાવો કરવામાં આવ્યો છે કે ટોળાએ લગભગ 30 ઘરો અને દુકાનોને આગ લગાવી દીધી છે. જેમાં આકાશમાં ઉંચી જ્વાળાઓ અને ધુમાડાના ગોટેગોટા જોવા મળ્યા હતા.
સમાજના જૂથોએ દાવો કર્યો હતો કે મોરેહ માર્કેટ વિસ્તારમાં કર્ફ્યુમાં રાહત આપવામાં આવી છે. તો કેટલીક મહિલાઓ જરૂરી ચીજવસ્તુઓ ખરીદવા બજારમાં ગઈ હતી. સુરક્ષા દળોના કેટલાક જવાનો દ્વારા તેમની પર કથિત રીતે હુમલો કરવામાં આવ્યો હતો અને માર મારવામાં આવ્યો હતો. જેના કારણે ભારે ચર્ચા જાગી હતી અને મહિલાઓએ વિરોધમાં બજારનો રસ્તો બ્લોક કરી દીધો હતો.સુરક્ષા દળોની કાર્યવાહીથી ગુસ્સે થઈને, લોકોના એક જૂથે કેટલાક મકાનોને આગ લગાડી દીધી હતી જેનો ઉપયોગ કેટલાક કર્મચારીઓ આ વિસ્તારમાં તેમની તૈનાતી દરમિયાન આવાસ તરીકે કરી રહ્યા હતા.પોલીસ સૂત્રોએ જણાવ્યું હતું કે ભીડને વિખેરવા માટે ટીયર ગેસના શેલનો ઉપયોગ કરવામાં આવ્યો હતો અને હંગામા વચ્ચે કેટલાક સુરક્ષાકર્મીઓએ ગોળીબાર કર્યો હતો. તેમણે કહ્યું કે ટોળામાં રહેલા લોકોએ દળો પર જવાબી કાર્યવાહી કરી.
