શકીરા (Shakira)નો મેગા કોન્સર્ટ? 2026 માટે ચર્ચાઓ શરૂ

Shakira concert Ahmedabad: અમદાવાદનું નરેન્દ્ર મોદી સ્ટેડિયમ ટૂંક સમયમાં વધુ એક આંતરરાષ્ટ્રીય મેગા કોન્સર્ટનું સાક્ષી બની શકે છે. આ વર્ષે બ્રિટિશ રોક બેન્ડ કોલ્ડપ્લેના હાઉસફૂલ શો બાદ હવે વૈશ્વિક પોપ આઈકોન શકીરા (Shakira) અમદાવાદમાં પરફોર્મ કરે તેવી સંભાવના છે. સૂત્રોના જણાવ્યા અનુસાર, વર્ષ 2026માં શકીરાના કોન્સર્ટ માટે તેમની ટીમે રાજ્ય સરકારનો સંપર્ક કર્યો છે.

શકીરા (Shakira)નો મેગા કોન્સર્ટ અમદાવાદમાં કેમ?

આ ડેવલપમેન્ટ સાથે સંકળાયેલા સૂત્રો મુજબ, શકીરા (Shakira)ના કોન્સર્ટને અમદાવાદ લાવવા માટે પ્રારંભિક ચર્ચાઓ શરૂ થઈ ચૂકી છે. કોલ્ડપ્લેના બે ભવ્ય અને હાઉસફૂલ શો બાદ નરેન્દ્ર મોદી સ્ટેડિયમ (Narendra Modi Stadium) આંતરરાષ્ટ્રીય કલાકારો માટે આકર્ષક વેન્યુ બની ગયું છે. આ જ કારણોસર શકીરાની ટીમ અમદાવાદને કોન્સર્ટ વેન્યુ તરીકે પસંદ કરવાની વિચારણા કરી રહી છે.

હાલમાં શકીરા (Shakira)એ તેની ‘Las Mujeres Ya No Lloran World Tour’ અથવા અન્ય કોઈ ટૂરના ભાગરૂપે ભારત માટે સત્તાવાર તારીખોની જાહેરાત કરી નથી. પરંતુ અહેવાલો અનુસાર, તેની ટીમ કોલ્ડપ્લે જેવી જ ભવ્ય વ્યવસ્થાઓ સાથે અમદાવાદમાં કોન્સર્ટ આયોજિત કરવા માટે ઉત્સાહ દર્શાવી રહી છે.

રાજ્ય સરકારનો સહયોગ

સૂત્રોના જણાવ્યા મુજબ, ગુજરાત સરકાર આ મેગા ઇવેન્ટ માટે તમામ પ્રકારનો સહયોગ આપવા તૈયાર છે. જોકે, અંતિમ નિર્ણય સંપૂર્ણપણે શકીરાની ટીમ પર નિર્ભર છે. શકીરાની ટીમ તરફથી પણ સકારાત્મક પ્રતિસાદ મળ્યો હોવાથી અમદાવાદમાં કોન્સર્ટ યોજાવાની શક્યતા મજબૂત બની છે.

આસામ પણ રેસમાં

અમદાવાદ સાથે-સાથે આસામ પણ શકીરાના કોન્સર્ટ માટે રેસમાં છે. આસામના મુખ્યમંત્રી હિમંતા બિસ્વા સરમાએ આ મહિનાની શરૂઆતમાં જાહેર કર્યું હતું કે તેમનું રાજ્ય આગામી વર્ષે શકીરાને ગુવાહાટી, ડિબ્રુગઢ અને સિલ્ચર લાવવાના પ્રયાસ કરી રહ્યું છે.

ભારતમાં શકીરાનો વિશાળ ચાહકવર્ગ

“Hips Don’t Lie”, “Whenever, Wherever”, અને “Waka Waka” જેવા ગ્લોબલ હિટ ગીતોથી દુનિયાભરમાં ઓળખાયેલી 47 વર્ષીય કોલંબિયન સિંગર શકીરાનો ભારતમાં પણ વિશાળ ચાહકવર્ગ છે. તેણે અત્યાર સુધી 4 ગ્રેમી એવોર્ડ્સ અને 15 લેટિન ગ્રેમી એવોર્ડ્સ જીત્યા છે. સાથે જ, વિશ્વભરમાં હિસ્પેનોફોન (સ્પેનિશ ભાષી) સંગીતને લોકપ્રિય બનાવવામાં તેનો મહત્વપૂર્ણ ફાળો રહ્યો છે.

જો શકીરાનું કોન્સર્ટ અમદાવાદમાં યોજાય છે, તો તે શહેર માટે એક વધુ ઐતિહાસિક સંગીત મહોત્સવ સાબિત થશે.