Ahmedabad News: નારોલમાં ઘરફોડ ચોરી ( burglary)ના કેસમાં અમદાવાદ ક્રાઈમ બ્રાન્ચે બે યુવકો અને એક કિશોરની ધરપકડ કરી છે. પોલીસે તેમની પાસેથી રૂ. 14.35 લાખનો મુદ્દામાલ કબજે કર્યો છે. નારોલ વિસ્તારમાં 19 ઓક્ટોબરે મકાનનું તાળું તોડીને ચોરી થઈ હતી, જેનો ગણતરીના દિવસોમાં ભેદ ઉકેલાયો છે.

નારોલ ઘરફોડ ચોરી (burglary)નો ભેદ ઉકેલાયો

અમદાવાદ ક્રાઈમ બ્રાન્ચ (Ahmedabad Crime Branch)એ શહેરમાં વધતા ચોરીના બનાવો સામે કડક કાર્યવાહી હાથ ધરી છે. નારોલમાં મકાનનું તાળું તોડીને લાખો રૂપિયાની ચોરી થઈ હતી, અને આ ગુનાનો પર્દાફાશ કરવામાં ટીમને મોટી સફળતા મળી છે.

રૂ. 14,35,570નો મુદ્દામાલ કબજે

પોલીસે આરોપીઓ પાસેથી કુલ રૂ. 14,35,570નો મુદ્દામાલ જપ્ત (seized property) કર્યો છે. તેમાં રૂ. 13.02 લાખના સોના-ચાંદી અને ધાતુના દાગીના, રૂ. 22,770 રોકડ, એક એક્સેસ સ્કૂટર, બે મોબાઈલ ફોન તથા ચોરીના દાગીનાના 14 બિલ સહિતની અન્ય ચીજવસ્તુઓ સામેલ છે. આ ગુનામાં કુલ રૂ. 19.10 લાખની ચોરી થઈ હતી. તેમાંથી પોલીસે મોટો હિસ્સો રિકવર કર્યો છે.

બે યુવકો અને કિશોરની ધરપકડ

ક્રાઈમ બ્રાન્ચની ટીમે બાતમી અને ટેક્નિકલ સર્વેલન્સ (technical surveillance)ના આધારે બે યુવકો અને કાયદાના સંઘર્ષમાં આવેલા કિશોર (juvenile in conflict with law)ને ઝડપી લીધા છે.

પોલીસ પૂછપરછમાં જાણવા મળ્યું છે કે પકડાયેલા આરોપીઓ સામે અગાઉ પણ જુદા જુદા પોલીસ સ્ટેશનોમાં ગુના નોંધાયેલા છે. એક આરોપી વટવા GIDC પોલીસ સ્ટેશનના ઘરફોડ ચોરીના ગુનામાં વોન્ટેડ હતો, જ્યારે બીજો અમરાઈવાડી પોલીસ સ્ટેશનના મારામારીના ગુનામાં વોન્ટેડ હતો.

વધુ તપાસ માટે નારોલ પોલીસને સોંપણી

આગળની તપાસ અને પૂછપરછ માટે ક્રાઈમ બ્રાન્ચે ત્રણેયને નારોલ પોલીસ સ્ટેશનને સોંપ્યા છે. પોલીસે તેઓ અન્ય કોઈ ગુનામાં સંડોવાયેલા છે કે નહીં તે દિશામાં પણ સઘન તપાસ હાથ ધરી છે.

આ પણ વાંચો: ઘરફોડ અને વાહન ચોરીના 3 આરોપી અમદાવાદ ગ્રામ્ય LCBના સકંજામાં

આ પણ વાંચો: અમદાવાદમાં નવરાત્રિના છેલ્લા નોરતે ચોરોનો તરખાટ, બંધ મકાનમાંથી 35 તોલા સોનું ગાયબ

આ પણ વાંચો: અમદાવાદમાં 1.66 કરોડના સોનાના દાગીનાની ચોરી, જ્વેલર્સની સેલ્સ ગર્લ શોરૂમમાંથી ફરાર