Ahmedabad News : અમદાવાદ ખાતે 16 જૂન, 2026ના રોજ નાર્કોટિક્સ કંટ્રોલ બ્યુરો (NCB) દ્વારા આયોજિત મહત્વપૂર્ણ સંમેલનમાં કેમિકલ અને ફાર્માસ્યુટિકલ ઉદ્યોગને પ્રિકર્સર કેમિકલ્સના ગેરકાયદે ઉપયોગને રોકવા માટે કાયદા અમલવારી એજન્સીઓ સાથે સક્રિય ભાગીદારી કરવાની અપીલ કરવામાં આવી હતી.
NCBના મહાનિર્દેશક અનુરાગ ગર્ગ (IPS) દ્વારા કેમિકલ ઉદ્યોગ માટે Voluntary Code of Conduct (VCC) જાહેર કરવામાં આવ્યો
કાર્યક્રમ દરમિયાન NCBના મહાનિર્દેશક અનુરાગ ગર્ગ (IPS) દ્વારા કેમિકલ ઉદ્યોગ માટે Voluntary Code of Conduct (VCC) જાહેર કરવામાં આવ્યો. આ માર્ગદર્શિકા ઉદ્યોગોને જવાબદાર કેમિકલ વ્યવસ્થાપન, સપ્લાય ચેઇનની સુરક્ષા અને શંકાસ્પદ વ્યવહારોની વહેલી ઓળખ તથા જાણ કરવા પ્રોત્સાહિત કરશે.
આ સંમેલનમાં NCB અને સેન્ટ્રલ બ્યુરો ઓફ નાર્કોટિક્સ (CBN)ના વરિષ્ઠ અધિકારીઓ ઉપરાંત કેમિકલ અને ફાર્મા ક્ષેત્રની અગ્રણી સંસ્થાઓ તથા કંપનીઓના પ્રતિનિધિઓ હાજર રહ્યા હતા. કાર્યક્રમમાં 250થી વધુ ઉદ્યોગ પ્રતિનિધિઓએ ભાગ લીધો હતો.
સંમેલન દરમિયાન અધિકારીઓએ સિન્થેટિક ડ્રગ્સના ઝડપથી બદલાતા જોખમો, ગુપ્ત રીતે થતું ગેરકાયદે ઉત્પાદન અને ડ્રગ્સ માફિયાઓ દ્વારા પ્રિકર્સર તથા આવશ્યક કેમિકલ્સના વધતા દુરુપયોગ અંગે વિસ્તૃત માહિતી આપી હતી. ઉદ્યોગોને સમજાવવામાં આવ્યું કે ગુનાહિત નેટવર્ક્સ નિયમનકારી નિયંત્રણોથી બચવા માટે સતત નવા અને વૈકલ્પિક કેમિકલ્સનો ઉપયોગ કરે છે, જેના કારણે ઉદ્યોગોની સતર્કતા અત્યંત જરૂરી બની ગઈ છે.
અનુરાગ ગર્ગે જણાવ્યું કે માત્ર કાયદા અમલવારી એજન્સીઓના પ્રયાસોથી સિન્થેટિક ડ્રગ્સ સામેની લડાઈ જીતી શકાશે નહીં. ઉત્પાદકો, આયાતકારો, નિકાસકારો, વિતરકો, ટ્રાન્સપોર્ટરો અને વેપારીઓ શંકાસ્પદ ઓર્ડર, અસામાન્ય ખરીદી પેટર્ન, અંતિમ ઉપયોગની માહિતી છુપાવવાના પ્રયાસો અને અન્ય સંકેતો ઓળખવામાં મહત્વપૂર્ણ ભૂમિકા ભજવી શકે છે.
તેમણે ઉદ્યોગોને VCCમાં સમાવિષ્ટ માર્ગદર્શિકાઓ અપનાવી આંતરિક અનુપાલન વ્યવસ્થાઓ, ગ્રાહક ચકાસણી પ્રક્રિયા, ટ્રાન્ઝેક્શન મોનિટરિંગ અને રેકોર્ડ જાળવણીને વધુ મજબૂત બનાવવા અપીલ કરી હતી. સાથે જ શંકાસ્પદ પૂછપરછ, અસામાન્ય વ્યવહારો અથવા ગેરકાયદે ડ્રગ્સ ઉત્પાદન માટે કેમિકલ્સ મેળવવાના પ્રયાસોની જાણ તાત્કાલિક NCBને કરવા જણાવ્યું હતું.
આ સ્વૈચ્છિક આચારસંહિતા માત્ર NDPS કાયદા હેઠળ નિયંત્રિત કેમિકલ્સ પૂરતી મર્યાદિત નથી, પરંતુ ભવિષ્યમાં સિન્થેટિક ડ્રગ્સ (Synthetic Drugs) અને નવા સાયકો-એક્ટિવ પદાર્થોના ઉત્પાદનમાં ઉપયોગ થઈ શકે એવા અન્ય કેમિકલ્સ માટે પણ લાગુ પડે છે.
ઉદ્યોગ પ્રતિનિધિઓએ આ પહેલનું સ્વાગત કર્યું અને સપ્લાય ચેઇન સુરક્ષા, ગ્રાહક ચકાસણી તથા સ્વૈચ્છિક સ્વ-નિયમન અંગેના પોતાના અનુભવો શેર કર્યા. તેમણે સ્વીકાર્યું કે કાયદેસર કેમિકલ સપ્લાય ચેઇનની સુરક્ષા એક સામૂહિક જવાબદારી છે અને NCB તથા CBN સાથે મળીને દેશના ડ્રગ્સ વિરોધી અભિયાનને વધુ મજબૂત બનાવવામાં સહકાર આપવાની પ્રતિબદ્ધતા વ્યક્ત કરી.
કાર્યક્રમ દરમિયાન યોજાયેલા ઇન્ટરએક્ટિવ સત્રમાં ઉદ્યોગ અને વેપાર સંગઠનોએ અનુપાલન સંબંધિત પડકારો, નિયમનકારી મુદ્દાઓ અને સહકાર વધારવાના ઉપાયો પર ચર્ચા કરી હતી. સાથે જ દેશમાં અન્ય વિસ્તારોમાં પણ આવા સંમેલનો વધુ વાર યોજવાની માંગ કરવામાં આવી હતી.
Voluntary Code of Conductનું લોન્ચિંગ ગેરકાયદે સિન્થેટિક ડ્રગ્સ (Synthetic Drugs)ના ઉત્પાદન સામે જાહેર-ખાનગી ભાગીદારીને મજબૂત બનાવવાનું મહત્વપૂર્ણ પગલું માનવામાં આવી રહ્યું છે. જવાબદાર વ્યવસાયિક પ્રથાઓ, સ્વૈચ્છિક સતર્કતા અને સમયસર માહિતી વહેંચણી દ્વારા આ પહેલ ‘નશામુક્ત ભારત’ના રાષ્ટ્રીય લક્ષ્યને આગળ વધારવામાં મહત્વપૂર્ણ સાબિત થશે.
