Ahmedabad News: અમદાવાદમાં મ્યુનિસિપાલિટીની બેદરકારીનો વધુ એક કિસ્સો પ્રકાશમાં આવ્યો છે. તેના લીધે વાહનચાલકનો જીવ જતાં બચ્યો છે. અમદાવાદમાં વાડજ પાસે ચંદ્રભાગા પુલ પર કામ ચાલે છે અને બીજો છેડે કામ થવાનું બાકી હોવાથી આ છેડો છે જ નહી. આ સમયે બ્રિજ પર બેરિકેડ મૂકેલા ન હોવાથી રાત્રિના ત્રણ વાગ્યે વાહનચાલક તેના મિત્ર સાથે પસાર થતાં નીચે ખાબક્યો હતો, પરંતુ સદનસીબે વાહનચાલક અને તેનો મિત્ર બંને બચી ગયા હતા. આમ કોર્પોરેશનની આ બેદરકારી કાર ચલાવનારા માટે જીવલેણ બની શકી હોત.
મોડી રાત્રે કાર નહેરમાં ખાબકી
મોડી રાત્રે કાર નહેરમાં ખાબકતા અકસ્માત સ્થળની આસપાસ લોકોના ટોળેટોળા વળ્યા હતા. અકસ્માતમાં ડ્રાઇવર અને તેનો મિત્રો ઇજા પામ્યા હતા અને તેમને સારવાર માટે હોસ્પિટલ લઈ જવાયા હતા. ઘટનાની માહિતી મળતા ટ્રાફિક પોલીસ ઘટનાસ્થળે પહોંચી ગઈ હતી અને વધુ તપાસ શરૂ કરી હતી. ક્રેનની મદદથી કારને નહેરમાંથી બહાર કઢાઈ હતી. બી ડિવિઝન ટ્રાફિક પોલીસે કેસ નોંધ્યો છે અને વધુ તપાસ કરી રહી છે.
ચાર જૂનના રોજ શહેરના ચંદ્રભાગા બ્રિજ પર નવરંગપુરા વિસ્તારનો રહેવાસી વિશાલ શાહ પોતાની કાર ચલાવી રહ્યો હતો તે કાર પુલ પૂરો થતાં સીધી ચંદ્રભાગા કેનાલમાં ખાબકી ગઈ. પુલ પર બેરિકેડ ન મૂકવાના લીધે કારચાલકને ખબર પડી ન હતી કે પુલ પૂરો થઈ ગયો છે તેથી, રસ્તો પૂરો થતાં જ કાર પુલ પરથી સીધી નહેરમાં પડી ગઈ. કાર નહેરમાં પડી ગયા પછી, જોરદાર ધડાકો સાંભળીને લોકો નજીકમાં ભેગા થઈ ગયા.
રાણીપમાં ડી-માર્ટથી નવા બનેલા કેનાલ રોડ તરફ જઈ રહ્યા હતા
પોલીસ કંટ્રોલ રૂમને સવારે 4 વાગ્યાની આસપાસ માહિતી મળી હતી કે ચંદ્રભાગા પુલ નજીક પુલ પરથી એક ફોર વ્હીલર વાહન નહેરમાં પડી ગયું છે. પોલીસ તાત્કાલિક ઘટનાસ્થળે પહોંચી હતી. પ્રાથમિક તપાસમાં જાણવા મળ્યું છે કે વિશાલ શાહ 5 જૂનના રોજ સવારે 2:30 વાગ્યે ડી-માર્ટથી નવા બનેલા કેનાલ રોડ તરફ પોતાની કાર ચલાવી રહ્યા હતા. ચંદ્રભાગા પુલ નજીક પહોંચતા જ વિશાલે કાર પરનો કાબુ ગુમાવ્યો અને તે નવા બનેલા કેનાલ નીચે ખાડામાં પડી ગઈ.
ગંભીર ઇજા નહીં
જોકે, અકસ્માતમાં કાર ચાલક અને તેના મિત્રને સામાન્ય ઈજાઓ થઈ હતી અને તેમને સારવાર માટે હોસ્પિટલમાં લઈ જવામાં આવ્યા હતા. ડ્રાઇવર અને તેના મિત્ર સાથેની મુલાકાતમાં જાણવા મળ્યું કે વિશાલ શાહ નવરંગપુરામાં એવન કૈલાશ સોસાયટીમાં રહે છે, જ્યારે પ્રણવકુમાર પટેલ મીરા પાર્ક સોસાયટીમાં રહે છે. નાની ઇજાઓ માટે હોસ્પિટલમાં પ્રાથમિક સારવાર આપ્યા બાદ તેમને રજા આપવામાં આવી હતી. ઘટનાની ગંભીરતાને ધ્યાનમાં રાખીને, બી-ડિવિઝન ટ્રાફિક પોલીસે પોતાના અથવા બીજાના જીવનને જોખમમાં મૂકે તેવી રીતે વાહન ચલાવવા બદલ ફરિયાદ દાખલ કરી છે. ટ્રાફિક પોલીસ અકસ્માત સમયે બંને વ્યક્તિઓ ક્યાં મુસાફરી કરી રહ્યા હતા અને અકસ્માત કેવી રીતે થયો તે અંગે વધુ તપાસ કરી રહી છે.
