Ahmedabad News: અમદાવાદના નિકોલ વિસ્તારમાં પૂરપાટ ઝડપે આવતી ફોર્ચ્યુનર કારે ફૂટપાથ પર બેઠેલા લોકોનો જીવ જોખમમાં મૂકી દીધો (Nikol Fortuner Accident) હતો. અક્ષર હોસ્પિટલ અને દેવસ્ય સ્કૂલ નજીક બનેલી આ ઘટનામાં ચણિયાચોળી વેચીને ગુજરાન ચલાવતા શ્રમિક પરિવારના ચાર લોકોને કારચાલકે અડફેટે લીધા હતા. અકસ્માતમાં માતા અને તેના 15 વર્ષીય પુત્રનું સારવાર દરમિયાન મોત નીપજ્યું છે, જ્યારે અન્ય બે લોકો ઇજાગ્રસ્ત થતાં હોસ્પિટલમાં સારવાર હેઠળ છે. કારચાલકની ગાડીમાંથી બિયરના બે ટીન મળી આવ્યાં હોવાનું ટ્રાફિક પોલીસના અધિકારીએ જણાવ્યું છે.
Nikol Fortuner Accident: ફૂટપાથ પર બેઠેલા લોકોને ફોર્ચ્યુનર કારે અડફેટે લીધા
મળતી માહિતી અનુસાર, નિકોલમાં અક્ષર હોસ્પિટલ અને દેવસ્ય સ્કૂલ નજીક ફૂટપાથ પર કેટલાક શ્રમિક પરિવારો ચણિયાચોળી વેચીને ગુજરાન ચલાવે છે. રાત્રિના સમયે પરિવારના સભ્યો ફૂટપાથ પર આરામ કરી રહ્યા હતા. દરમિયાન રાત્રે આશરે 9:30થી 9:45 વાગ્યાની વચ્ચે નાના ચિલોડામાં રહેતો 36 વર્ષીય વિરલ સવજીભાઈ ચૌધરી પોતાની ફોર્ચ્યુનર કાર લઈને ત્યાંથી પસાર થઈ રહ્યો હતો.
આક્ષેપ છે કે કાર પૂરપાટ ઝડપે આવીને સીધી ફૂટપાથ પર ચડી ગઈ હતી અને ત્યાં બેઠેલા લોકોને અડફેટે લીધા (Fortuner Car Accident) હતા. ટક્કર એટલી જોરદાર હતી કે એક યુવક કારના બોનેટ અને દિવાલ વચ્ચે ફસાઈ ગયો હતો. ઘટનાને પગલે આસપાસના વિસ્તારમાં અફરાતફરી મચી ગઈ હતી.
માતા અને 15 વર્ષના પુત્રનાં મોત
‘આઈ’ ડિવિઝન ટ્રાફિક પોલીસ સ્ટેશનના પીઆઈ એસ.આઈ. સુમરાએ આપેલી માહિતી મુજબ, અકસ્માતમાં કુલ ચાર લોકોને ઈજા (Gujarat Road Accident) પહોંચી હતી. જેમાં પૂનમબેન જીતેન્દ્રભાઈ નગવાડિયા અને તેમના 15 વર્ષીય પુત્ર સાગરનું સારવાર દરમિયાન મોત નીપજ્યું છે. જ્યારે કાર્તિકભાઈ અને એક અજાણી મહિલાને ઈજા પહોંચતાં હોસ્પિટલમાં સારવાર આપવામાં આવી રહી છે.
કારમાંથી બિયરના બે ટીન મળ્યા
પોલીસ અધિકારીના જણાવ્યા મુજબ, અકસ્માત સર્જનાર ફોર્ચ્યુનર કારમાંથી બિયરના બે ટીન મળી આવ્યાં હતાં. અકસ્માત બાદ સ્થળ પર એકઠા થયેલા લોકોએ કારચાલકને માર માર્યો હોવાની માહિતી પણ સામે આવી છે. ત્યારબાદ કારચાલકને મેડિકલ તપાસ માટે હોસ્પિટલ લઈ જવામાં આવ્યો હતો, જેથી તેની સ્થિતિ અંગે તપાસ કરી શકાય.
કારચાલક સામે ગુનો નોંધી તપાસ શરૂ
આ મામલે ટ્રાફિક પોલીસે કારચાલક વિરલ સવજીભાઈ ચૌધરી વિરુદ્ધ ભારતીય ન્યાય સંહિતા (BNS)ની કલમ 105 અને મોટર વ્હીકલ એક્ટ હેઠળ ગુનો નોંધ્યો છે. હાલ પોલીસ દ્વારા અકસ્માતના સંજોગો, કારચાલકની સ્થિતિ અને સમગ્ર ઘટનાની વધુ તપાસ હાથ ધરવામાં આવી છે.
આ પણ વાંચો: રાજકોટના બેડી ચોકડી પાસે એકસાથે છ ટ્રકો વચ્ચે સર્જાયો અકસ્માત, અફરાતફરીનો માહોલ, વિસ્તારમાં ચકચાર
આ પણ વાંચો: હની સિંહના ભત્રીજાનું અકસ્માતમાં મોત, પરિવારમાં શોક
આ પણ વાંચો: બનાસકાંઠાના અમીરગઢ પાસે કાર અને ગેસ ટેન્કર વચ્ચે ગમખ્વાર અકસ્માતમાં એકનું ઘટનાસ્થળે મોત
