Nipah Virus: ભારતનું દક્ષિણ રાજ્ય કેરળ ફરી એકવાર નિપાહ વાયરસની ઝપેટમાં આવ્યુ છે. કેરળમાં તાજેતરમાં નિપાહ વાયરસના કારણે 24 વર્ષીય યુવકના મોત બાદ સરકાર એક્શનમાં આવી છે. કેરળ સરકારે મલપ્પુરમમાં ઘણા કન્ટેઈનમેન્ટ ઝોન બનાવ્યા છે અને નિયંત્રણો લાદ્યા છે. મલપ્પુરમ જિલ્લાની બે પંચાયતોના પાંચ વોર્ડને કન્ટેઈનમેન્ટ ઝોન જાહેર કરવામાં આવ્યા છે અને લોકોને મોટી સંખ્યામાં ભેગા ન કરવા સૂચના આપવામાં આવી છે.

નિપાહ વાયરસના ઝડપી પ્રસારને જોતા, જિલ્લા અધિકારીઓએ કન્ટેનમેન્ટ ઝોનમાં આવેલી દુકાનોને સાંજે 7 વાગ્યા સુધી બંધ રાખવા જણાવ્યું છે. કન્ટેઈનમેન્ટ ઝોનમાં સિનેમા હોલ, શાળા, કોલેજ, મદરેસા, આંગણવાડી અને ટ્યુશન સેન્ટર બંધ રહેશે.

મલપ્પુરમ જિલ્લાની એક ખાનગી હોસ્પિટલમાં નિપાહ વાયરસના ચેપથી 24 વર્ષીય વ્યક્તિનું મૃત્યુ થયું હતું. કેરળના સ્વાસ્થ્ય મંત્રી વીણા જ્યોર્જે રવિવારે આ જાણકારી આપી. જ્યોર્જે કહ્યું કે પ્રાદેશિક તબીબી અધિકારીએ મૃત્યુના કારણની તપાસ કર્યા પછી નિપાહ ચેપની શંકા હતી. મંત્રીએ એક વિડિયો સંદેશમાં જણાવ્યું હતું કે ઉપલબ્ધ નમૂનાઓ તરત જ પરીક્ષણ માટે મોકલવામાં આવ્યા હતા અને પરિણામોએ ચેપની પુષ્ટિ કરી હતી.

માહિતી અનુસાર, મલપ્પુરમ નિવાસી, જે બેંગલુરુથી રાજ્ય પહોંચ્યો હતો, તેનું 9 સપ્ટેમ્બરના રોજ મૃત્યુ થયું હતું, ત્યારબાદ તેના ઉપલબ્ધ નમૂનાઓ કોઝિકોડ મેડિકલ કોલેજ અને હોસ્પિટલની લેબોરેટરીમાં પરીક્ષણ માટે મોકલવામાં આવ્યા હતા. મલપ્પુરમના આરોગ્ય અધિકારીઓએ જણાવ્યું હતું કે કોઝિકોડ મેડિકલ કોલેજના પરિણામોમાં ચેપ જોવા મળ્યો હતો, જેના પગલે આરોગ્ય પ્રધાને શનિવારે રાત્રે જ એક ઉચ્ચ સ્તરીય બેઠક યોજી હતી અને પ્રોટોકોલ મુજબ જરૂરી પગલાં લીધા હતા.

દરમિયાન, રવિવારે, NIV, પુણે સ્થિત નેશનલ ઇન્સ્ટિટ્યૂટ ઓફ વાયરોલોજીના પરિણામોમાં ચેપની પુષ્ટિ થઈ હતી. મંત્રીએ કહ્યું કે શનિવારે રાત્રે જ 16 સમિતિઓની રચના કરવામાં આવી હતી અને ચેપગ્રસ્ત વ્યક્તિના સંપર્કમાં આવેલા 151 લોકોની યાદી પણ બનાવવામાં આવી હતી. તેણે કહ્યું કે તે વ્યક્તિ તેના મિત્રો સાથે વિવિધ સ્થળોએ ગયો હતો અને જે લોકો તેના નજીકના સંપર્કમાં આવ્યા હતા તેમને એકાંતમાં રાખવામાં આવ્યા છે. કેન્દ્રીય ટીમ રોગચાળા સાથે વાયરસના જોડાણને ઓળખવા ઉપરાંત તકનીકી મદદ પૂરી પાડશે. છેલ્લી વખત આ વાયરલ પ્રકોપ વર્ષ 2023 માં કોઝિકોડ જિલ્લામાં જોવા મળ્યો હતો.

આ પણ વાંચો: ઉપરાષ્ટ્રપતિએ હસતા મોઢે કહ્યું-યોગીએ જેટલું મારા પર હોમવર્ક કર્યું એટલું તો મારા સસરાએ પણ કર્યું નથી

આ પણ વાંચો: ચાલતી એમ્બ્યુલન્સમાં મહિલા પર બળાત્કારનો પ્રયાસ, ઓક્સિજન માસ્ક કાઢી બીમાર પતિને બહાર ફેંક્યો અને…

આ પણ વાંચો: નવી વંદે ભારતનું ભાડું નક્કી, બુકિંગ શરૂ, શનિવારે પીએમ મોદી વર્ચ્યુઅલ રીતે ફ્લેગ ઓફ કરશે