પાકિસ્તાન તહરીક-એ-ઈન્સાફ (પીટીઆઈ)ના વડા અને પૂર્વ વડાપ્રધાન ઈમરાન ખાન નેશનલ એસેમ્બલીની ખાલી પડેલી તમામ 9 બેઠકો પર ચૂંટણી લડવાના છે. લાહોર હાઈકોર્ટે તેની સામે દાખલ કરવામાં આવેલી અરજીને ફગાવી દીધી છે. ઈમરાનના નિર્ણયને પડકારતી અરજીની સુનાવણી લાહોર હાઈકોર્ટના જસ્ટિસ શાહિદ જમીલ ખાને કરી હતી.
સુનાવણી દરમિયાન, જસ્ટિસ ખાને પૂછ્યું કે, શું નામાંકન પત્રો પાકિસ્તાનના ચૂંટણી પંચ (ECP)ના કાર્યાલયમાં દાખલ કરવામાં આવ્યા છે, જેના વિશે અરજદારે ચિંતા વ્યક્ત કરી છે. જો નહીં, તો અરજદારે હવે રાહ જોવી પડશે. ઉમેદવારી પત્રો સબમિટ કર્યા પછી જ ફરિયાદ માન્ય ગણાશે. તે પછી તમે ચૂંટણી પંચ અને પછી કોર્ટનો સંપર્ક કરી શકો છો.
અરજદારે ‘રાષ્ટ્રીય હિત’નો ઉલ્લેખ કર્યો
કોર્ટના આ અવલોકન બાદ અરજદારના વકીલે તેમની અરજી પાછી ખેંચી લીધી હતી. આ સાથે જસ્ટિસ ખાને અરજી ફગાવી દીધી હતી. નોંધનીય છે કે, અરજદારે કોર્ટમાં અરજી કરી હતી કે ઈમરાન ખાનને તમામ નવ બેઠકો પર પેટાચૂંટણી લડતા અટકાવવામાં આવે. આ માટે ‘રાષ્ટ્રીય હિત’ ટાંકવામાં આવ્યું હતું.
25 સપ્ટેમ્બરે પેટાચૂંટણી યોજાવાની છે
પાકિસ્તાનના ચૂંટણી પંચે ગયા અઠવાડિયે જાહેરાત કરી હતી કે 25 સપ્ટેમ્બરે નવ નેશનલ એસેમ્બલી (NA) સીટો માટે પેટાચૂંટણી યોજાશે. વાસ્તવમાં, પાર્ટીના વડાને હટાવ્યા બાદ પીટીઆઈ એમએનએ દ્વારા આપવામાં આવેલા 131 રાજીનામામાંથી, પંચે 11ને સ્વીકારી લીધા હતા. આ નિર્ણય બાદ તરત જ ઈમરાન ખાને સીટો પર પોતાની ઉમેદવારી જાહેર કરી હતી.
આ પણ વાંચો:વર્લ્ડ રેકોર્ડ બનાવવા માટે તૈયાર, આજે 1 કરોડ બાળકો એક સાથે દેશભક્તિના ગીતો ગાશે
