New Delhi News : ઉત્તરાખંડના હલ્દવાની (Haldwani Rally)માં કોંગ્રેસ અધ્યક્ષ મલ્લિકાર્જુન ખડગે (Mallikarjun Kharge)ની જાહેર સભા બાદ કથિત રીતે સભા સ્થળનું ‘શુદ્ધિકરણ’ (Purification Row)કરવામાં આવ્યું હોવાના મુદ્દે રાજકીય વિવાદ ઉગ્ર બન્યો છે. ખડગેએ રાજ્યસભામાં આ ઘટનાનો ઉલ્લેખ કરીને સવાલ ઉઠાવ્યો હતો કે લોકશાહીમાં કોઈ નેતાના ભાષણ બાદ મંચનું શુદ્ધિકરણ કરવું કેટલું યોગ્ય છે.
ખડગેના આ મુદ્દા બાદ હવે લોકસભામાં વિપક્ષના નેતા રાહુલ ગાંધીએ પણ આ ઘટનાને લઈને ભાજપ અને RSS પર નિશાન સાધ્યું છે.
રાહુલ ગાંધીની SC/ST એક્ટ હેઠળ FIRની માંગ
રાહુલ ગાંધીએ દાવો કર્યો કે દલિતો સામે ભેદભાવની માનસિકતા આજે પણ સમાજમાં જોવા મળે છે. તેમણે કહ્યું કે આવા કિસ્સાઓમાં કાયદા મુજબ કાર્યવાહી થવી જોઈએ અને સંબંધિત લોકો સામે SC/ST Act હેઠળ FIR નોંધાવવાની માંગ કરી.
રાહુલ ગાંધીએ ભારતની સામાજિક વિવિધતાનો ઉલ્લેખ કરતા કહ્યું કે દેશમાં અનેક જાતિ, ધર્મ, ભાષા અને સંસ્કૃતિ હોવા છતાં દલિતો સામે ભેદભાવ અને અત્યાચારના કિસ્સાઓ સામે આવે છે.
‘દેશને આ રીતે એક રાખી શકીશું?’
રાહુલ ગાંધી (Rahul Gandhi)એ દલિતો સાથે થતા ભેદભાવના ઉદાહરણો આપતાં કહ્યું કે કેટલીક જગ્યાએ પાણીના વાસણ, મૂછ રાખવા, મંદિરમાં પ્રવેશવા અથવા લગ્નમાં ઘોડા પર સવારી કરવા જેવી બાબતોને લઈને પણ દલિતોને હેરાન કરવામાં આવે છે.
તેમણે સવાલ ઉઠાવ્યો કે જો સમાજમાં આવી અસમાનતા અને ભેદભાવ ચાલુ રહેશે તો શું દેશને આ રીતે એક રાખી શકાશે?
ચાના કપનું ઉદાહરણ
રાહુલ ગાંધી (Rahul Gandhi)એ દલિત ભેદભાવ સમજાવવા માટે ચાની દુકાનનું ઉદાહરણ આપ્યું. તેમના જણાવ્યા પ્રમાણે, કેટલીક જગ્યાએ અલગ-અલગ પ્રકારના કપ રાખવામાં આવે છે અને આ વ્યવસ્થાને તેમણે સામાજિક ભેદભાવ સાથે જોડીને રજૂ કરી.
તેમણે કહ્યું કે સમાજમાં લોકો સાથે તેમની જાતિના આધારે અલગ વ્યવહાર થવો બંધારણીય સમાનતાના સિદ્ધાંત સામે છે.
ખડગેએ રાજ્યસભામાં શું કહ્યું?
રાજ્યસભામાં મલ્લિકાર્જુન ખડગે (Mallikarjun Kharge)એ જણાવ્યું હતું કે તેમણે હલ્દવાનીના રામલીલા મેદાનમાં જાહેર સભાને સંબોધિત કરી હતી. તેમના કહેવા પ્રમાણે, ભાષણ બાદ ભાજપના કેટલાક સભ્યો દ્વારા મંચનું ‘શુદ્ધિકરણ’ (Purification Row)કરવા માટે હવન કરવામાં આવ્યો હતો.
ખડગેએ આ ઘટનાને લોકશાહી અને બંધારણીય મૂલ્યો સાથે જોડીને સવાલ ઉઠાવ્યો હતો.
નડ્ડાએ તપાસનું આપ્યું આશ્વાસન
ભાજપના વરિષ્ઠ નેતા જેપી નડ્ડાએ રાજ્યસભામાં આ ઘટનાને દુઃખદ ગણાવી હતી. તેમણે કહ્યું હતું કે ભાજપ આવી પ્રવૃત્તિઓને સમર્થન આપતું નથી અને ઘટનાની તપાસ કરવામાં આવશે.
નડ્ડાએ ખડગેની લાગણીઓને ઠેસ પહોંચી હોવા અંગે પણ દુઃખ વ્યક્ત કર્યું હતું અને યોગ્ય તપાસનું આશ્વાસન આપ્યું હતું.
BJP-RSS સામે રાહુલ ગાંધીનો પ્રહાર
રાહુલ ગાંધી (Rahul Gandhi)એ આ સમગ્ર મુદ્દાને બે અલગ વિચારધારાઓ વચ્ચેના સંઘર્ષ તરીકે રજૂ કર્યો. તેમણે એક તરફ ડૉ. બાબાસાહેબ આંબેડકરના બંધારણીય વિચારો અને બીજી તરફ BJP-RSSની વિચારધારાનો ઉલ્લેખ કર્યો.
તેમણે ભારપૂર્વક કહ્યું કે ભારતની એકતા માટે સામાજિક સમાનતા, બંધારણીય અધિકારો અને દરેક નાગરિક સાથે સમાન વ્યવહાર જરૂરી છે.
