National News : સરકારી યોજનાઓનો લાભ મેળવવા માટે હવે મતદાર ઓળખપત્ર (Voter ID) ફરજિયાત કરવાની જાહેરાતને પગલે રાજકીય વિવાદ શરૂ થયો છે. કોંગ્રેસના વરિષ્ઠ નેતા અને લોકસભામાં વિપક્ષના નેતા રાહુલ ગાંધીએ કેન્દ્ર સરકારના આ નિર્ણય સામે સવાલો ઉઠાવ્યા છે. તેમણે ચેતવણી આપતાં કહ્યું કે, જો કોઈ વ્યક્તિનું મતદાર યાદીમાંથી નામ દૂર થઈ જશે તો તેને સરકારી યોજનાઓના લાભથી પણ વંચિત રાખવાનું જોખમ ઊભું થઈ શકે છે. રાહુલ ગાંધીએ આ નિર્ણયને સામાન્ય નાગરિકોના અધિકારો સાથે જોડાયેલો ગંભીર મુદ્દો ગણાવ્યો છે.

1. Voter ID મુદ્દે રાહુલ ગાંધીનો કેન્દ્ર સરકાર પર પ્રહાર

રાહુલ ગાંધીએ (Rahul Gandhi)સોશિયલ મીડિયા પ્લેટફોર્મ X પર પોસ્ટ કરીને કેન્દ્ર સરકારની જાહેરાત સામે નારાજગી વ્યક્ત કરી હતી. તેમણે દાવો કર્યો હતો કે સરકારી યોજનાઓના લાભાર્થીઓની ઓળખ માટે આધાર કાર્ડને બદલે મતદાર ઓળખપત્ર (Voter ID)નો ઉપયોગ કરવાની જાહેરાત પાછળ મોટું ષડયંત્ર હોઈ શકે છે.

તેમના જણાવ્યા અનુસાર, સ્પેશિયલ ઇન્ટેન્સિવ રિવિઝન દ્વારા મતદાર યાદીમાંથી લાખો લોકોનાં નામ દૂર કરવાની પ્રક્રિયા (SIR Process)ચાલી રહી છે. ખાસ કરીને ભાજપ સરકારથી નારાજ લોકોને નિશાન બનાવવામાં આવતા હોવાનો પણ તેમણે દાવો કર્યો હતો. તેમણે કહ્યું કે, ‘વોટ જશે તો અધિકારો પણ જશે.’

2. ચૂંટણી પંચની કામગીરી સામે પણ ઉઠાવ્યા સવાલો

રાહુલ ગાંધીએ ભારતીય ચૂંટણી પંચ (Election Commission)ની કામગીરી પર પણ સવાલો ઉઠાવ્યા હતા. તેમણે મુખ્ય ચૂંટણી કમિશનર જ્ઞાનેશ કુમારને નિશાન બનાવીને દાવો કર્યો હતો કે મતદાર યાદીઓની પ્રક્રિયા હવે નિષ્પક્ષ રીતે ચાલી રહી નથી.

તેમણે આશંકા વ્યક્ત કરી હતી કે એવી મતદાર યાદી તૈયાર થઈ રહી છે, જેમાં ભાજપને રાજકીય ફાયદો થાય. આ જ યાદીના આધારે જો સરકારી યોજનાઓના લાભ નક્કી કરવામાં આવશે તો અનેક નાગરિકો મુશ્કેલીમાં મુકાઈ શકે છે.

3. રાશનથી પેન્શન સુધીના લાભો પર અસર થવાની ભીતિ

કોંગ્રેસ નેતાએ ચિંતા વ્યક્ત કરી હતી કે જો આ વ્યવસ્થા આગળ વધશે તો ભવિષ્યમાં રાશન, પેન્શન, મનરેગાની મજૂરી, આવાસ સહાય, શિષ્યવૃત્તિ અને અનામત જેવી સુવિધાઓ માટે પણ મતદાર ઓળખપત્ર ફરજિયાત કરવામાં આવી શકે છે.

રાહુલ ગાંધીએ (Rahul Gandhi)સ્પષ્ટ કર્યું હતું કે મતદાન કરવું એ નાગરિકનો અધિકાર છે, કોઈ સરકારી યોજનાનો લાભ મેળવવાની શરત નથી. ગરીબ અને જરૂરિયાતમંદ લોકોના પેન્શન કે અન્ય લાભોને મતદાર ઓળખપત્ર સાથે જોડવા સામે પણ તેમણે વાંધો વ્યક્ત કર્યો હતો.

4. કેન્દ્રીય મંત્રીની જાહેરાતથી રાજકીય ચર્ચા તેજ

ઉલ્લેખનીય છે કે કેન્દ્રીય મંત્રી રાજીવ રંજન સિંહ (લલ્લન સિંહ) દ્વારા પંચાયતી રાજ મંત્રાલયની યોજનાઓ હેઠળ નાણાકીય સહાય અને કલ્યાણકારી લાભો મેળવતા લાભાર્થીઓ માટે મતદાર ફોટો ઓળખપત્ર (EPIC Card) નંબર અને બાયોમેટ્રિક ઓથેન્ટિકેશનની જોગવાઈ અંગે જાહેરાત કરવામાં આવી હતી.

જોકે, આ જાહેરાત બાદ યોજનાઓના અમલીકરણ અને લાભાર્થીઓની ઓળખ અંગે સવાલો ઊભા થયા છે. પંચાયતી રાજ મંત્રાલયની ભૂમિકા અને વ્યક્તિગત લાભાર્થીઓને સીધી સહાય આપતી યોજનાઓ વચ્ચેનો તફાવત પણ ચર્ચાનો વિષય બન્યો છે. બીજી તરફ, પીએમ-કિસાન, ગ્રામીણ આવાસ અને સામાજિક સુરક્ષા પેન્શન જેવી યોજનાઓમાં આધાર કાર્ડનો ઉપયોગ કરવામાં આવે છે.

આ સમગ્ર મામલે હવે સરકારની જાહેરાત અને તેના વાસ્તવિક અમલીકરણ અંગે સ્પષ્ટતા થવી જરૂરી બની છે.

આ પણ વાંચો: ‘આધાર, રેશનકાર્ડ, મતદાર ઓળખપત્રને પુરાવા તરીકે ગણો’, બિહારમાં મતદાર યાદી સુધારણા પર SCનું સૂચન

આ પણ વાંચો: ગુજરાતમાં છે 60 લાખ શંકાસ્પદ મતદારો ?

આ પણ વાંચો: મતદાર યાદી સુધારણા ગુજરાતમાં પાંચ કરોડ મતદારોની ચકાસણી કઈ રીતે થશે તે જાણો!