Rajkot News: રાજકોટ ગ્રામ્ય પોલીસે (Rajkot Rural Police) વ્યાજખોરી સામે કાર્યવાહી કરતાં બે વ્યાજખોરો પાસેથી કબજે કરાયેલી રૂ.1 કરોડ 5 લાખ 79 હજાર 450ની કિંમતની મિલકત 90 અરજદારોને પરત અપાવી છે. ‘તેરા તુજકો અર્પણ’ કાર્યક્રમ અંતર્ગત સોના-ચાંદીના દાગીના, જમીન-મકાન અને પ્લોટના દસ્તાવેજો, RC બુક તેમજ કોરા ચેક સહિતનો મુદ્દામાલ મૂળ માલિકોને સોંપવામાં આવ્યો હતો.
પોલીસની આ કાર્યવાહી બાદ વ્યાજખોરીનો ભોગ બનેલા અનેક લોકો સામે આવ્યા હતા. પોલીસ સમક્ષ અરજદારોએ વ્યાજખોરો દ્વારા કરવામાં આવતી કથિત પઠાણી ઉઘરાણી અને ધમકી અંગે પણ પોતાની રજૂઆત કરી હતી.
Rajkot Rural Police: 3 ટકા વ્યાજે રૂ.44 હજાર લીધા, બાદમાં ધમકીનો આરોપ
ગોંડલ તાલુકાના મોવિયા ગામના રહેવાસી લલિત ઉર્ફે નિલેશ મોહનભાઈ ટારીયાએ વાસાવડના બે ભાઈઓ સોહીલ રફીક ઉર્ફે બાબુ સલાટ અને ઈરફાન સામે વ્યાજખોરી અંગે ફરિયાદ નોંધાવી હતી. ફરિયાદ મુજબ, લલિતભાઈએ બંને પાસેથી રૂ.44 હજાર 3 ટકા વ્યાજે લીધા હતા. તેમાંથી રૂ.22 હજાર ચૂકવી દીધા હોવા છતાં બાકીની રકમ ચૂકવવામાં મુશ્કેલી પડતી હતી.
આ દરમિયાન બંને ભાઈઓ દ્વારા કથિત રીતે પઠાણી ઉઘરાણી કરવામાં આવતી અને પૈસા નહીં ચૂકવાય તો પગ ભાંગી નાખવા તેમજ જાનથી મારી નાખવાની ધમકી આપવામાં આવતી હોવાનો આક્ષેપ કરવામાં આવ્યો હતો. ફરિયાદના આધારે પોલીસે (Rajkot Rural Police) બંને ભાઈઓની ધરપકડ કરી કાયદેસરની કાર્યવાહી હાથ ધરી હતી.
એક પછી એક 90 લોકો પોલીસના સંપર્કમાં આવ્યા
વ્યાજખોરો સામે પોલીસ કાર્યવાહી શરૂ થયા બાદ વધુ લોકો પણ સામે આવ્યા હતા. કુલ 90 અરજદારોએ સુલતાનપુર પોલીસનો સંપર્ક કરીને તેઓ પણ આ વ્યાજખોરોના શિકાર બન્યા હોવાની રજૂઆત કરી હતી. અરજદારોએ પોલીસ સમક્ષ વ્યાજખોરો પાસે પોતાની કિંમતી વસ્તુઓ, દસ્તાવેજો અને અન્ય સામાન હોવાની વિગતો આપી હતી. પોલીસ કાર્યવાહી બાદ આરોપીઓએ અરજદારોની વસ્તુઓ પરત કરવાની સહમતી દર્શાવી હતી. ત્યારબાદ પોલીસે (Rajkot Rural Police) કબજે કરેલો મુદ્દામાલ મૂળ અરજદારોને પરત કરવાનો નિર્ણય લીધો હતો.
‘તેરા તુજકો અર્પણ’ કાર્યક્રમમાં મિલકત પરત
રાજકોટ જિલ્લા પોલીસ વડા વિજયસિંહ ગુર્જરની અધ્યક્ષતામાં સુલતાનપુર પોલીસ દ્વારા ‘તેરા તુજકો અર્પણ’ કાર્યક્રમનું આયોજન કરવામાં આવ્યું હતું. આ કાર્યક્રમ દરમિયાન 90 અરજદારોને તેમની પાસેથી કબજે થયેલી અથવા વ્યાજખોરો પાસે રહેલી વસ્તુઓ પરત કરવામાં આવી હતી. લાંબા સમય બાદ પોતાની કિંમતી વસ્તુઓ પરત મળતાં અરજદારોને મોટી રાહત મળી હતી.
18 તોલાથી વધુ સોનું અને 19 કિલોથી વધુ ચાંદી પરત
પોલીસ દ્વારા રિકવર કરવામાં આવેલા મુદ્દામાલમાં મોટી માત્રામાં સોના-ચાંદીના દાગીના પણ સામેલ હતા. પોલીસ (Rajkot Rural Police)ના જણાવ્યા મુજબ, રૂ.27,48,450ના સોનાના દાગીના પરત કરાયા, સોનાનું કુલ વજન 180.65 ગ્રામ હતું, રૂ.49.31 લાખની કિંમતની ચાંદીના દાગીના પરત કરાયા, ચાંદીનું કુલ વજન 19 કિલો 724 ગ્રામ હતું, આશરે રૂ.29 લાખની કિંમતના જમીન, મકાન અને પ્લોટના દસ્તાવેજો પરત કરાયા
વાહનોની RC બુક પણ પરત કરવામાં આવી, 6 કોરા ચેક પણ અરજદારોને સોંપવામાં આવ્યા આ તમામ વસ્તુઓની કુલ કિંમત રૂ.1,05,79,450 હોવાનું પોલીસે (Rajkot Rural Police) જણાવ્યું છે.
વ્યાજખોરી સામે પોલીસની કાર્યવાહીથી લોકોને રાહત
રાજકોટ ગ્રામ્ય પોલીસ (Rajkot Rural Police)ની કાર્યવાહીથી વ્યાજખોરીનો ભોગ બનેલા 90 અરજદારોને પોતાની કિંમતી વસ્તુઓ પરત મળી છે. ખાસ કરીને સોના-ચાંદીના દાગીના અને મિલકતના દસ્તાવેજો પરત મળતા અરજદારોને મોટી રાહત મળી છે. વ્યાજખોરીના કિસ્સામાં લોકો પર કથિત દબાણ, ધમકી અને પઠાણી ઉઘરાણીના આક્ષેપો વચ્ચે પોલીસ દ્વારા કરવામાં આવેલી આ કાર્યવાહીથી અન્ય પીડિતોને પણ ફરિયાદ કરવા માટે આગળ આવવાનો સંદેશ મળ્યો છે.
આ પણ વાંચો:રાજકોટમાં વ્યાજખોરોના ત્રાસથી પોલીસ એક્શનમાં આવી, જીવલેણ હુમલાના આરોપીને ઝડપ્યો
આ પણ વાંચો:રાજકોટના જસદણમાં યુવાનનો મૃતદેહ મળ્યો, વ્યાજખોરો પર હત્યાનો આરોપ
