Rajkot News: સોશિયલ મીડિયા પર ક્યારે અને કોણ વાયરલ થઈ જાય તે કહી શકાય નહીં. રાજકોટના એક દાદીનો(Rajkot Viral Dadi) કાળા રંગની લક્ઝુરિયસ કારમાંથી સ્વેગ સાથે ઉતરતો વીડિયો છેલ્લા કેટલાક દિવસોથી સોશિયલ મીડિયા પર ભારે વાયરલ થઈ રહ્યો છે. આ વીડિયોમાં 70 વર્ષીય દાદીનો અંદાજ જોઈને લોકો પણ આશ્ચર્યચકિત થઈ ગયા હતા.
વીડિયોમાં દાદી જે રીતે કારનો દરવાજો ખોલીને આત્મવિશ્વાસ સાથે બહાર આવે છે, તે જોઈને ઘણા લોકોને લાગ્યું કે તેઓ કોઈ ખાસ વ્યક્તિ હશે. જોકે, હવે આ વાયરલ વીડિયોની પાછળની સાચી કહાની ખુદ દાદીએ મીડિયા સામે આવીને જણાવી છે.
વાયરલ વીડિયો પાછળની હકીકત શું છે?
રાજકોટના આ વાયરલ વીડિયોમાં (Rajkot Viral Dadi) જોવા મળતા દાદીનું નામ મંજુબેન છે. તેમણે જણાવ્યું કે તેઓ કોઈ મોટા પરિવાર કે વૈભવી જીવન સાથે જોડાયેલા નથી. તેઓ સામાન્ય જીવન જીવે છે અને મહેનત કરીને પોતાનું ગુજરાન ચલાવે છે.
મંજુબેને જણાવ્યું કે તેઓ રાજકોટમાં એક સ્કૂલની બહાર નાના બાળકો માટે નાસ્તો વેચવાનું કામ કરે છે. રોજિંદા જીવનમાં મહેનત કરીને તેઓ પોતાનું જીવન ચલાવી રહ્યા છે.
લિફ્ટ માગી હતી, અચાનક બની ગઈ રીલ
મંજુબેને(Rajkot Viral Dadi) મીડિયા સાથેની વાતચીતમાં જણાવ્યું કે તેમને એક સ્થળેથી બીજા સ્થળે જવાનું હતું. તે સમયે રસ્તામાંથી પસાર થતી એક કાળા રંગની કારમાં તેમણે લિફ્ટ લીધી હતી.તેમણે કહ્યું કે જ્યારે તેઓ કારમાંથી ઉતરવા માટે દરવાજો ખોલી રહ્યા હતા, ત્યારે કારમાં રહેલા યુવકોએ અચાનક વીડિયો બનાવવાનું શરૂ કરી દીધું હતું. તેમને ત્યારે ખ્યાલ પણ નહોતો કે આ નાનો વીડિયો સોશિયલ મીડિયા પર આટલો વાયરલ થઈ જશે.
ઉંમર 70 વર્ષ, પરંતુ હિંમત યુવાનો જેવી
મંજુબેને પોતાની જિંદગી વિશે વાત કરતા જણાવ્યું કે તેઓ એકલા રહે છે અને જીવનમાં અનેક મુશ્કેલીઓ હોવા છતાં હિંમત હારી નથી. આ ઉંમરે પણ તેઓ રોજ મહેનત કરે છે અને સ્વાભિમાનથી જીવન જીવે છે.તેમની સાદગી, આત્મવિશ્વાસ અને જીવન પ્રત્યેના સકારાત્મક વલણને કારણે સોશિયલ મીડિયા પર લોકો હવે માત્ર તેમના વાયરલ વીડિયોની નહીં પરંતુ તેમની સંઘર્ષભરી સફરની પણ પ્રશંસા કરી રહ્યા છે.રાજકોટની ‘રીલ દાદી’નો(Rajkot Viral Dadi) આ વીડિયો હવે માત્ર એક વાયરલ રીલ નથી રહ્યો, પરંતુ મહેનત, આત્મવિશ્વાસ અને સ્વાભિમાનની પ્રેરણાદાયક કહાની બની ગયો છે.
‘રીલ દાદી’ના વીડિયો બાદ પોલીસ એક્શનમાં, સ્કોર્પિયો કાર કબજે
સોશિયલ મીડિયા પર ભારે ચર્ચામાં રહેલી 72 વર્ષીય ‘રીલ દાદી’ના વાયરલ વીડિયો મામલે રાજકોટ પોલીસે કાર્યવાહી કરી છે. કાળા રંગની સ્કોર્પિયો કારના ખુલ્લા દરવાજા સાથે બનાવવામાં આવેલા વીડિયોને ગંભીરતાથી લઈને ‘એ’ ડિવિઝન પોલીસે કારને કબજે કરી છે.પોલીસના જણાવ્યા મુજબ, જાહેર માર્ગ પર ટ્રાફિક સુરક્ષાના નિયમોનું ઉલ્લંઘન થતું હોવાનું સામે આવતા તાત્કાલિક તપાસ હાથ ધરવામાં આવી હતી. તપાસ દરમિયાન વીડિયોમાં જોવા મળતી સ્કોર્પિયો કારની ઓળખ કરવામાં આવી અને ત્યારબાદ તેના સામે કાયદેસરની કાર્યવાહી કરવામાં આવી.આ મામલે ટ્રાફિક નિયમોના ભંગ બદલ વાહનચાલકને મેમો પણ ફટકારવામાં આવ્યો છે. પોલીસનું કહેવું છે કે સોશિયલ મીડિયા માટે બનાવાતા જોખમી વીડિયો અન્ય લોકો માટે પણ જોખમ ઉભું કરી શકે છે, તેથી આવા કિસ્સાઓમાં નિયમ મુજબ કાર્યવાહી કરવામાં આવશે.
આ પણ વાંચો: રાજકોટમાં હાઇટેક કાર ચોરી કરતી ગેંગનો પર્દાફાશ, મોબાઇલ એપથી સ્ટાર્ટ કરતા હતા કાર
આ પણ વાંચો: માંજલપુર પેટાચૂંટણી: ભાજપના ઉમેદવાર સતીશ પટેલે ભર્યું ઉમેદવારી ફોર્મ, ભવ્ય જીતનો વ્યક્ત કર્યો વિશ્વાસ
