Huston News: અમેરિકાના ટેક્સાસ રાજ્યમાં એક દુકાનમાં લૂંટારુઓએ 32 વર્ષીય ભારતીય નાગરિકની ગોળી મારીને હત્યા કરી નાખી હતી. જેના કારણે વિસ્તારમાં ભયનો માહોલ છે. મૃતકની ઓળખ દશારી ગોપીકૃષ્ણ તરીકે થઈ છે અને તે આંધ્રપ્રદેશના બાપટલા જિલ્લાનો રહેવાસી હતો. ટેક્સાસ પોલીસના જણાવ્યા અનુસાર ભારતીય નાગરિક 8 મહિના પહેલા જ અમેરિકા આવ્યો હતો. આ ઘટના 21 જૂને ડલાસના પ્લેઝન્ટ ગ્રોવમાં એક સ્ટોરમાં બની હતી.
કોન્સ્યુલ જનરલ ડીસી મંજુનાથે, જેઓ રવિવારે યોગ દિવસના કાર્યક્રમ માટે ડલાસમાં હતા, જણાવ્યું હતું કે આ ઘટના અરકાનસાસમાં થયેલા ગોળીબાર સાથે સંબંધિત નથી, જેમ કે અગાઉ વિવિધ સ્ત્રોતો દ્વારા અહેવાલ આપવામાં આવ્યો હતો. ગોપીકૃષ્ણના પરિવાર પ્રત્યે સંવેદના વ્યક્ત કરતા મંજુનાથે કહ્યું કે, “અમને પ્લીઝન્ટ ગ્રોવ, ડલાસ, ટેક્સાસમાં લૂંટ દરમિયાન ગોળીબારની ઘટનામાં ભારતીય નાગરિક દાસારી ગોપીકૃષ્ણના મૃત્યુ વિશે જાણીને ખૂબ જ દુઃખ થયું છે અને અમે તેમના પરિવારના સભ્યોના સંપર્કમાં છીએ. “
ભારતીય સંસ્થાઓ સાથે મળીને કોન્સ્યુલેટ પોસ્ટમોર્ટમ અને મૃત્યુ પ્રમાણપત્ર સહિત સ્થાનિક ઔપચારિકતાઓ બાદ ગોપીકૃષ્ણના મૃતદેહને ભારત પરત લાવવા માટે તમામ શક્ય સહાય પૂરી પાડી રહ્યું છે. લૂંટ દરમિયાન ગોપીકૃષ્ણને ગંભીર ઈજાઓ થઈ હતી અને તેને નજીકની હોસ્પિટલમાં લઈ જવામાં આવ્યો હતો, જ્યાં તેનું સારવાર દરમિયાન મોત થયું હતું.
આ પણ વાંચો: વિદેશમંત્રી જયશંકર દ્વી-પક્ષીય વાટાઘાટો માટે UAE પહોંચ્યા, હિન્દુ મંદિરની લીધી મુલાકાત
આ પણ વાંચો: ગાઝામાં ખોરાક-પાણી માટે એકઠા થયેલાં પેલેસ્ટિનિયનો પર બોમ્બમારો, મૃત્યુઆંક 37600ને પાર