Sports News : ભારતીય ક્રિકેટ ટીમના અનુભવી બેટ્સમેન રોહિત શર્મા (Rohit Sharma)એ ફરી એકવાર પોતાના બેટથી વિવેચકોને જવાબ આપ્યો છે. નિવૃત્તિની અટકળો વચ્ચે ઇંગ્લેન્ડ સામેની ત્રીજી વનડેમાં માત્ર 84 બોલમાં શાનદાર સદી (Century)ફટકારી તેમણે પોતાની કારકિર્દીની 34મી ODI સદી નોંધાવી. આ ઇનિંગ્સ માત્ર સદી પૂરતી મર્યાદિત રહી નહોતી, પરંતુ તેની સાથે રોહિતે એક એવો વિશ્વ રેકોર્ડ પણ પોતાના નામે કર્યો, જે અત્યાર સુધી કોઈ પણ વિદેશી બેટ્સમેન કરી શક્યો નહોતો.
ઇંગ્લેન્ડમાં સૌથી વધુ ODI સદી ફટકારનાર વિદેશી બેટ્સમેન
રોહિત શર્મા (Rohit Sharma)હવે ઇંગ્લેન્ડની ધરતી પર 8 ODI સદી (Century)ફટકારનાર પ્રથમ વિદેશી બેટ્સમેન બન્યા છે. આ સાથે તેમણે સચિન તેંડુલકર, સઈદ અનવર, એબી ડી વિલિયર્સ અને ક્વિન્ટન ડી કોક જેવા દિગ્ગજોને પાછળ છોડી દીધા છે, જેમણે એક જ દેશમાં 7-7 સદી નોંધાવી હતી.
વર્લ્ડ કપમાં રોહિતનો દબદબો યથાવત
વનડે વર્લ્ડ કપમાં રોહિત શર્મા (Rohit Sharma)નું પ્રદર્શન હંમેશા ખાસ રહ્યું છે. અત્યાર સુધી રમાયેલી 28 મેચોમાં તેમણે 1,575 રન બનાવ્યા છે. લગભગ 61ની એવરેજ અને 106થી વધુના સ્ટ્રાઈક રેટ સાથે તેઓ વર્લ્ડ કપના સૌથી સફળ ઓપનરોમાં સ્થાન ધરાવે છે.
2019 વર્લ્ડ કપમાં રચ્યો હતો ઇતિહાસ
2019નો વર્લ્ડ કપ રોહિત શર્મા (Rohit Sharma)ની કારકિર્દીનો સુવર્ણ અધ્યાય માનવામાં આવે છે. તેમણે એક જ વર્લ્ડ કપમાં પાંચ સદી ફટકારી વિશ્વ ક્રિકેટમાં નવો ઇતિહાસ રચ્યો હતો. નવ મેચમાં 648 રન બનાવી તેઓ ટૂર્નામેન્ટના સૌથી વધુ રન બનાવનાર બેટ્સમેન રહ્યા હતા.
2023માં તોડ્યો સચિનનો મોટો રેકોર્ડ
ભારતમાં યોજાયેલા 2023ના વર્લ્ડ કપમાં રોહિતે પોતાની સાતમી વર્લ્ડ કપ સદી ફટકારી સચિન તેંડુલકરના છ સદીના રેકોર્ડને પાછળ છોડી દીધો હતો. આ સાથે તેઓ વર્લ્ડ કપ ઇતિહાસમાં સૌથી વધુ સદી ફટકારનાર બેટ્સમેન બન્યા હતા. આ ટૂર્નામેન્ટમાં તેમણે 11 મેચમાં 597 રન બનાવી ભારતને ફાઇનલ સુધી પહોંચાડવામાં મહત્વની ભૂમિકા ભજવી હતી.
સૌથી ઝડપી ભારતીય વર્લ્ડ કપ સદીનો પણ રેકોર્ડ
2023ના વર્લ્ડ કપ દરમિયાન અફઘાનિસ્તાન સામે દિલ્હીમાં માત્ર 63 બોલમાં સદી ફટકારી રોહિત શર્માએ ભારતીય ખેલાડી તરીકે વર્લ્ડ કપની સૌથી ઝડપી સદીનો રેકોર્ડ પણ પોતાના નામે કર્યો હતો. તેમની આ સિદ્ધિ આજે પણ અતૂટ છે.
2027 વર્લ્ડ કપ રમશે?
રોહિત શર્માની શાનદાર ફોર્મ બાદ હવે ક્રિકેટ ચાહકોમાં એક જ ચર્ચા છે કે શું તેઓ 2027ના વનડે વર્લ્ડ કપમાં ભારતનું પ્રતિનિધિત્વ કરશે? જો તેઓ આ મેગા ટૂર્નામેન્ટનો ભાગ નહીં બને તો ભારતીય ટીમ માટે તે મોટું નુકસાન સાબિત થઈ શકે છે.
