કચ્છ જીલ્લાના માંડવીના સુપ્રસિદ્ધ વિન્ડફાર્મ બીચ નજીકના દરિયાકાંઠે સૌ પ્રથમ વખત ખૂબ જ દુર્લભ અને અતિસુંદર દરિયાઈ ગોકળગાય મળી આવી હતી. જે સી સ્લગ નામે ઓળખાય છે. અ દેખાવમાં ખુબ જ સુંદર એવી સી સ્લગ નામના દરિયાઈ જીવની લંબાઈ માત્ર ૨ સેન્ટિમીટર નોંધાઈ છે.
વિશ્વમાં માત્ર ગુજરાતમાં દક્ષિણ ભાગના મરીન નેશનલ પાર્કના પોશીત્રા વિસ્તારમાં જોવા મળે છે. પરંતુ હાલમાં આ ગોકળગાય કચ્છનાં અખાતનાં ઉત્તરીય તટ પર પ્રથમ વખત મળી આવી છે. જે માંડવી નજીક મળી આવી છે. કચ્છમાં ઓપસ ઓશિએનિક રીસર્ચ લેબોરેટરી નામક મરીન રીસર્ચ લેબોરેટરી ધરાવતા બંદરીય શહેરના દંપતી યશેશ શાહ અને નિકી રામી શાહને ગત ડિસેમ્બરમાં માંડવી વિન્ડફાર્મ બીચ નજીકના દરિયાઈ પાણીના ખાબોચિયામાં અત્યંત દુર્લભ દરિયાઈ ગોકળ ગાય ( સી સ્લગ ) જોવા મળી હતી.
આ અંગે નિકી શાહે જણાવ્યું કે,ઓખા નજીક આવેલા પોશિત્રા વિસ્તારમાં ૫૦૦ ચોરસ મીટર વિસ્તારમાં આ જીવ દેખાય છે,જો કે કચ્છના દરિયાકિનારે આ જીવ દેખાતા સૌ આશ્ચર્ય પામ્યા હતા. અને સાથે જ તેના વસવાટ અને નિવાસસ્થાનને લઈને સંશોધકોએ રાહતનો શ્વાસ પણ લીધો હતો. બોમ્બે નેચરલ હિસ્ટ્રી સોસાયટીના જર્નલમાં તાજેતરમાં આ મુદ્દે લેખ પ્રકાશિત થયો હતો. નોંધનીય બાબત છે કે,સી સ્લગને સામાન્ય ગોકળ ગાય જેમ શરીર પર શેલ નથી હોતા, પણ સુંદર રંગબેરંગી દોરા જેવા રૂછડા હોય છે.
