Mehsana News: મહેસાણાની મહાવીર સોસાયટીમાં રહેતા સાસરિયા પક્ષ સામે પરિણીતાને દહેજ (Siddhpur Dowry Case) માટે શારીરિક અને માનસિક ત્રાસ આપ્યાનો કિસ્સો સામે આવ્યો છે. પરિણીતાનો આક્ષેપ છે કે સાસરિયાઓ દ્વારા પિયરમાંથી રૂ.3 લાખ દહેજ (Siddhpur Dowry Case) લાવવા માટે દબાણ કરવામાં આવતું હતું અને અંતે તેને દીકરી સાથે ઘરમાંથી કાઢી મૂકવામાં આવી હતી. આ મામલે સિદ્ધપુર પોલીસ સ્ટેશનમાં પતિ સહિત સાત સાસરિયા સામે ફરિયાદ નોંધાઈ છે.
2017માં થયા હતા લગ્ન
ફરિયાદ મુજબ, સિદ્ધપુરના ખળી (ઉગમણો વાસ) ગામની યુવતીના લગ્ન 8 જુલાઈ, 2017ના રોજ મહેસાણાની મહાવીર સોસાયટીમાં રહેતા જાલમસિંહ બકાજી ઠાકોર સાથે થયા હતા. લગ્નજીવન દરમિયાન દંપતીને એક દીકરી છે. પરિણીતાના જણાવ્યા મુજબ, લગ્નના શરૂઆતના સમયગાળામાં સાસરિયા પક્ષ દ્વારા તેને સારી રીતે રાખવામાં આવતી હતી. જોકે, ત્યારબાદ ઘરકામ સહિતની બાબતોને લઈને મેણાં-ટોણાં મારી હેરાનગતિ શરૂ થઈ હતી.
Siddhpur Dowry Case: રૂ.3 લાખ દહેજ લાવવાનું દબાણ
ફરિયાદમાં આક્ષેપ કરવામાં આવ્યો છે કે પરિણીતાને પિયરમાંથી રૂ.3 લાખ દહેજ (Siddhpur Dowry Case) પેટે લાવવા માટે દબાણ કરવામાં આવતું હતું. દહેજની માંગણીને લઈને તેને શારીરિક તેમજ માનસિક ત્રાસ આપવામાં આવતો હોવાનો પણ આક્ષેપ છે. પરિણીતાએ સંસાર ન બગડે તે હેતુથી શરૂઆતમાં આ બાબતો સહન કરી હોવાનું ફરિયાદમાં જણાવાયું છે.
દીકરીના જન્મ બાદ પણ ત્રાસ આપ્યાનો આક્ષેપ
પરિણીતાના જણાવ્યા મુજબ, 2 સપ્ટેમ્બર, 2019ના રોજ દીકરીનો જન્મ થયા બાદ સાસરિયા પક્ષ નારાજ થયો હતો. દીકરીના જન્મને લઈને તેને ‘અભાગણી’ કહીને વારંવાર ઝઘડા કરવામાં આવતા હોવાનો આક્ષેપ કરવામાં આવ્યો છે. આ પરિસ્થિતિ વચ્ચે પણ પરિણીતાએ પરિવાર જળવાઈ રહે તે માટે ત્રાસ સહન કર્યો હોવાનો ફરિયાદમાં ઉલ્લેખ છે.
દીકરી સાથે ઘરમાંથી કાઢી મૂક્યાનો આક્ષેપ
ફરિયાદ મુજબ, 4 જાન્યુઆરી, 2026ના રોજ પતિ અને સાસરિયા પક્ષ દ્વારા પરિણીતા તથા તેની દીકરીને ઘરમાંથી કાઢી મૂકવામાં આવ્યા હતા. ત્યારબાદ પરિણીતા પોતાની દીકરી સાથે પિયરમાં પરત ફરી હતી. બાદમાં સમગ્ર મામલે કાયદેસરની કાર્યવાહી કરવા માટે સિદ્ધપુર પોલીસનો સંપર્ક કરવામાં આવ્યો હતો.
પતિ સહિત 7 સામે પોલીસ ફરિયાદ
પરિણીતાએ પતિ જાલમસિંહ બકાજી ઠાકોર, સાસુ બસબાબેન બકાજી ઠાકોર, સસરા બકાજી રાજભા ઠાકોર, જેઠ વિનુજી બકાજી ઠાકોર, જેઠાણી પૂજાબેન વિનુજી ઠાકોર, નણંદ જશીબેન સંદીપ ઠાકોર અને નણંદ ગીતાબેન વિનયકુમાર ઠાકોર સામે ફરિયાદ નોંધાવી છે.
આ પણ વાંચો:ખંડણી કેસ બાદ જય ડાંગરની મુશ્કેલી વધી, પત્નીએ નોંધાવી દહેજ અને ઘરેલુ હિંસાની ફરિયાદ
આ પણ વાંચો:સુપ્રીમ કોર્ટનો મોટો નિર્ણય, દહેજ આપવાની કબૂલાતથી પત્ની કે પરિવાર સામે કેસ નહીં થાય
આ પણ વાંચો:દહેજ કંપનીમાં કામ કરતી વખતે મૃત્યુ પામેલા કર્મચારીનો મૃતદેહ સ્વીકારવાનો પરિવારે કર્યો ઇનકાર
