Surat News: સુરત મ્યુનિસિપલ કોર્પોરેશન (SMC) વહીવટીતંત્રની ઘોર બેદરકારીને કારણે, મિલકત વેરા અને ટેન્ડર સંબંધિત 9,900 ફાઇલો (Files) રેકોર્ડ રૂમ (Record Room)માંથી ગાયબ થઈ ગઈ છે.
સુરત મ્યુનિ.(SMC)માં ફાઇલ ગુમ થતાં 170 કરોડના ચેક અટક્યા
આ ફાઇલો ખોવાઈ જવાથી કોન્ટ્રાક્ટરોના ₹170 કરોડના સુરક્ષા ચેક અટકી ગયા છે. કોર્ટ કેસ અને ટેક્સ વસૂલાતને પણ અસર થઈ રહી છે. સ્પેશિયલ ઓપરેશન ગ્રુપ આ મામલાની તપાસ કરી રહ્યું છે. કોન્ટ્રાક્ટરો દ્વારા પૂરી પાડવામાં આવતી સિક્યોરિટી ડિપોઝિટના ચેક મ્યુનિસિપલ કોર્પોરેશન દ્વારા વર્ષોથી રોકી રાખવામાં આવી છે. કોન્ટ્રાક્ટરોએ તેમની પરત માંગણી કરી ત્યારે આ મામલો પ્રકાશમાં આવ્યો.
સુરત મ્યુનિ.(SMC)ના રેકોર્ડ રૂમમાંથી 1980થી બધી ફાઇલો ગાયબ
સુરત મ્યુનિસિપલ કોર્પોરેશન(SMC)ના અત્યંત સંવેદનશીલ રેકોર્ડ રૂમમાંથી 1980 થી ચાલી આવતી બધી ફાઇલો ગાયબ થઈ જવાથી વહીવટીતંત્રમાં ખળભળાટ મચી ગયો છે. આમ આદમી પાર્ટી (AAP) એ આ મુદ્દો ઉઠાવ્યો છે અને મ્યુનિસિપલ કોર્પોરેશન વહીવટીતંત્ર અને શાસક ભાજપને દોષી ઠેરવ્યા છે.
દસ હજાર ગુમ ફાઇલોનો એક સીસીટીવી ફૂટેજ પણ નહીં
આ ફાઇલો મિલકત વેરા, મકાન પરમિટ અને ટેન્ડર સંબંધિત હોવાનું કહેવાય છે. આનાથી કોર્ટ કેસ અને ટેક્સ વસૂલાતમાં પણ અવરોધ ઉભો થયો છે. આના કારણે કેટલાય કેસો અટકી પડે તેમ મનાય છે. તેની સાથે કેટલીય વસૂલાતો પણ અટકી પડે તેમ છે. આશ્ચર્યની વાત એ છે કે એક વસ્તુ ખોવાય તેનું સીસીટીવી ફૂટેજ મળી આવે છે, પરંતુ સુરત મ્યુનિસિપલ કોર્પોરેશનની દસ હજાર ફાઇલ ગુમ થઈ તેનો સમખાવા પૂરતો સીસીટીવી ફૂટેજ પણ મળતો નથી. આ બતાવે છે કે કેટલી સફાઈથી કામ થયું છે.
