એન્ટિગુઆઃ ICC મેન્સ T20 વર્લ્ડ કપ 2024માં સુપર 8 મેચો રમાઈ રહી છે. 24 જૂન (સોમવાર) ના રોજ, નોર્થ સાઉન્ડના સર વિવિયન રિચર્ડ્સ સ્ટેડિયમમાં વેસ્ટ ઈન્ડિઝ અને દક્ષિણ આફ્રિકા વચ્ચે મેચ રમાઈ હતી. આ મેચમાં દક્ષિણ આફ્રિકાએ DLS નિયમ હેઠળ 3 વિકેટે જીત મેળવી હતી. મેચમાં, DLS નિયમો હેઠળ, દક્ષિણ આફ્રિકાને જીતવા માટે 17 ઓવરમાં 123 રન બનાવવાના હતા, જે તેણે પાંચ બોલ બાકી રહેતા હાંસલ કર્યા હતા. આ જીત સાથે દક્ષિણ આફ્રિકાએ સેમીફાઈનલમાં પ્રવેશ કરી લીધો છે. ઈંગ્લેન્ડ પહેલા જ સેમીફાઈનલમાં પહોંચી ગયું છે. દક્ષિણ આફ્રિકા 6 પોઈન્ટ સાથે ગ્રુપ-2માં ટોચ પર છે. જ્યારે ઈંગ્લિશ ટીમ 4 પોઈન્ટ સાથે બીજા ક્રમે રહી હતી.
દક્ષિણ આફ્રિકાની ઇનિંગ્સમાં બે ઓવર હતી ત્યારે વરસાદ પડ્યો હતો. તે સમયે આફ્રિકન ટીમનો સ્કોર બે વિકેટે 15 રન હતો અને તે મુશ્કેલીમાં જોવા મળી હતી. વરસાદ બંધ થયા પછી જ્યારે રમત ફરી શરૂ થઈ, ત્યારે મેચ ટૂંકી કરવામાં આવી અને આફ્રિકાને સુધારેલું લક્ષ્ય મળ્યું.
ટોસ હારીને પ્રથમ બેટિંગ કરતા વેસ્ટ ઈન્ડિઝે 20 ઓવરમાં આઠ વિકેટે 135 રન બનાવ્યા હતા. વેસ્ટ ઈન્ડિઝ માટે નિકોલસ પૂરને 42 બોલમાં 52 રનની શાનદાર ઈનિંગ રમી જેમાં ત્રણ ચોગ્ગા અને બે છગ્ગાનો સમાવેશ થાય છે. જ્યારે ઓપનર બેટ્સમેન કાયલ મેયર્સે 34 બોલમાં 3 ફોર અને 2 સિક્સરની મદદથી 35 રન બનાવ્યા હતા. આન્દ્રે રસેલ (15) અને અલ્ઝારી જોસેફ (11*) પણ ડબલ ફિગર સુધી પહોંચવામાં સફળ રહ્યા હતા. આફ્રિકા તરફથી ચાઈનામેન બોલર તબરેઝ શમ્સીએ 27 રનમાં ત્રણ વિકેટ ઝડપી હતી. જ્યારે કેશવ મહારાજ, માર્કો જાનસેન, કાગીસો રબાડા અને એડન માર્કરામે એક-એક વિકેટ લીધી હતી.
આ પણ વાંચો: ભારતીય મહિલા ક્રિકેટ ટીમે સાઉથ આફ્રિકાનો કર્યો ક્લીન સ્વીપ, વન-ડે શ્રેણી 3-0થી જીતી
આ પણ વાંચો: બજરંગ પુનિયાને લાગ્યો મોટો ઝટકો, NADAએ તેને ફરી કર્યો સસ્પેન્ડ
આ પણ વાંચો: ક્રિકેટના ઈતિહાસમાં પ્રથમ વખત: અફઘાનિસ્તાને ઓસ્ટ્રેલિયાને હરાવી સર્જ્યો મોટો અપસેટ
આ પણ વાંચો: T20 વર્લ્ડ કપમાં ઐતિહાસિક જીતની નજીક આવેલી ટીમ ઈન્ડિયા બાંગ્લાદેશને હરાવી વર્લ્ડ રેકોર્ડની કરશે બરાબરી
