મોસ્કો,

રશિયામાં રમાઈ રહેલા ફુટબોલનો મહાકુંભ ફિફા વર્લ્ડકપ ૨૦૧૮ અંતિમ દોર તરફ આગળ વધી રહ્યો છે. વર્લ્ડકપમાં ટોચની આઠ ટીમો વચ્ચે ક્વાર્ટર ફાઈનલનો જંગ સમાપ્ત થયા બાદ હવે અંતિમ ૪ ટીમો વચ્ચે સેમિફાઈનલ જામશે. આ વર્લ્ડકપની અંતિમ – ૪ ટીમોમાં બેલ્જિયમ, ક્રોએશિયા, ઈંગ્લેંડ અને ફ્રાંસની ટીમનો સમાવેશ થાય છે, ત્યારે આ ટીમો વચ્ચે જોરદાર ટક્કર થવાની સંભાવના છે.

ફિફા વર્લ્ડકપમાં અત્યારસુધી રમાયેલી મેચોમાં આર્જેન્ટીના, ગત ચેમ્પિયન જર્મની, પોર્ટુગલ, સ્પેન, પાંચ વારની વર્લ્ડ ચેમ્પિયન ટીમ બ્રાઝિલ, યજમાન રશિયા જેવી ચેમ્પિયન ટીમો પહેલેથી જ ટુર્નામેન્ટમાંથી બહાર થઈ ચુકી છે, જયારે આ અંતિમ ૪ ટીમો વચ્ચે વર્લ્ડ ચેમ્પિયનનો તાજ પોતાના નામે કરવા માટે એડી ચોટીનું જોર અજમાવશે.

ફૂટબોલના વર્લ્ડકપની અંતિમ ચાર ટીમોની વાત કરવામાં આવે તો પ્રથમ ક્વાર્ટર ફાઈનલમાં ફ્રાંસની ટીમે ઉરુગ્વેને ૨-૦થી, બીજી ક્વાર્ટર ફાઈનલમાં બેલ્જિયમની ટીમે બ્રાઝિલને ૨-૧થી, ત્રીજી ક્વાર્ટર ફાઈનલમાં ઈંગ્લેંડની ટીમે સ્વીડનને ૨-૦થી અને અંતિમ ક્વાર્ટર ફાઈનલ મેચમાં ક્રોએશિયાએ યજમાન રશિયાને પેનલ્ટી શૂટ આઉટમાં ૪-૩થી હરાવી અંતિમ-૪માં પોતાનું સ્થાન હાંસલ કર્યું છે.

ફૂટબોલ મહાકુંભની આ ૪ ટીમો વચ્ચે જામશે સેમિ ફાઈનલ જંગ :

 (૧). પ્રથમ સેમિ-ફાઈનલ :  બેલ્જિયમ  v/s  ફ્રાંસ

તારીખ : ૧૦ જુલાઈ

સમય : રાત્રે ૧૧:૩૦ વાગ્યે

(૨). બીજી સેમિ-ફાઈનલ :  ક્રોએશિયા v/s ઈંગ્લેંડ 

તારીખ : ૧૧ જુલાઈ

સમય : રાત્રે ૧૧.૩૦ વાગ્યે