બ્રિસ્ટોલ,
ભારત અને ઇંગ્લેન્ડ વચ્ચે રમાઈ રહેલી ટી-20 સિરીઝની ત્રીજી અને અંતિમ મેચમાં વિરાટ બ્રિગેડે ઇંગ્લેન્ડને 7 વિકેટે હરાવી રોમાંચક વિજય મેળવ્યો છે. બ્રિસ્ટોલના કાઉન્ટી ક્રિકેટ ગ્રાઉન્ડ ખાતે રમાયેલી અંતિમ ટી-20માં સ્ફોટક ઓપનર બેટ્સમેન રોહિત શર્મા અને હાર્દિક પંડ્યાના ઓલરાઉન્ડર પ્રદર્શન સાથે ભારતીય ટીમે શાનદાર જીત મેળવી હતી .
WINNERS! 😎#ENGvIND pic.twitter.com/W0HdELUpzw
— BCCI (@BCCI) July 8, 2018
આ જીત સાથે ભારતીય ટીમે ત્રણ મેચની સિરીઝ 2-1થી જીતી લીધી છે, સાથે સાથે ટી- 20 ક્રિકેટમાં સતત છઠ્ઠી સિરીઝ પણ પોતાના નામે કરી છે.
ભારતના આ યાદગાર જીતના મુખ્ય હિરો ઓપનર બેટ્સમેન રોહિત શર્મા અને ઓલરાઉન્ડર ખેલાડી હાર્દિક પંડ્યા રહ્યા હતા.
રો-હિટ શર્માએ માત્ર 56 બોલમાં અણનમ 100 રન બનાવ્યા હતા. રોહિત શર્મએ સદી ફટકારતા 5 સિકસર અને 11 ફોર ફટકારી હતી અને આ 100 રનની મેચ વિનિંગ ઈનિંગ્સના કારણે મેન ઓફ ધ મેચ એવોર્ડ અપાયો હતો. જ્યારે હાર્દિક પંડ્યાએ પણ માત્ર 14 બોલમાં 33 રન બનાવ્યા હતા તેમજ 4 મહત્વપૂર્ણ વિકેટ પણ ઝડપી હતી.
ટોસ હારીને પ્રથમ બેટિંગ કરવા મેદાને ઉતરેલી યજમાન ઇંગ્લેન્ડની ટીમે 20 ઓવરમાં 9 વિકેટના નુકશાને 198 રનનો વિશાળ સ્કોર ખડકયો હતો. ઇંગ્લેન્ડ તરફથી ઓપનર બેટ્સમેન જેશન રોયે માત્ર 31 બોલમાં 7 સિકસર અને 4 ફોર સાથે 71 રનની તુફાની ઇનિંગ્સ રમી હતી.
જ્યારે વિકેટકીપર બેટ્સમેન જોસ બટલરે 34 અને એલેક્સ હેલ્સે 30 રન બનાવ્યા હતા. ભારત તરફથી હાર્દિક પંડ્યાએ 4 ઓવરમાં 38 રન આપી સૌથી વધુ 4 વિકેટ જ્યારે સિદ્ધાર્થ કોલે 2 વિકેટ ઝડપી હતી.
યજમાન ટીમ દ્વારા આપવામાં આવેલા 199 રનના ટાર્ગેટનો પીછો કરતા ભારતીય ટીમે આ સ્કોર 3 વિકેટ ગુમાવી 18.4 ઓવરમાં જ હાંસલ કર્યો હતો.
199 રનના લક્ષ્યનો પીછો કરતા ભારતની શરૂઆત ખરાબ રહી હતી અને ઓપનર બેટ્સમેન શિખર ધવન માત્ર 5 રન બનાવી આઉટ થયો હતો. જ્યારે પ્રથમ ટી-20 મેચનો હિરો કે એલ રાહુલ 19 રન બનાવી પેવેલિયનમાં ભેગો થયો હતો.
💯👏👏
HITMANNNNN!
A fine century for @ImRo45 as he now becomes the second player to score 3 T20I tons.#ENGvIND pic.twitter.com/AdPLQfWMn7
— BCCI (@BCCI) July 8, 2018
જો કે ત્યારબાદ સ્ફોટક ઓપનર બેટ્સમેન રોહિત શર્માએ ટીમનો એક છેડો સાચવી રાખી માત્ર 56 બોલમાં અણનમ સદી ફટકારી હતી. આ સાથે જ શર્માની ટી-20 ક્રિકેટમાં આ ત્રીજી સદી છે.
આ ઉપરાંત કેપ્ટન વિરાટ કોહલીએ 29 બોલમાં 43 રન બનાવ્યા હતા, જ્યારે મેચની અંતિમ ઓવરોમાં હાર્દિક પંડયાએ માત્ર 14 બોલમાં 4 ફોર અને 2 સિકસર સાથે 33 રનની તુફાની ઇનિંગ્સ રમી હતી. ઇંગ્લેન્ડની ટીમ તરફથી ડેવિડ વીલી અને જેક બોલે 1-1 વિકેટ ઝડપી હતી.
