ઉત્તર પ્રદેશમાં આજે (રવિવારે) એટલે કે 28 નવેમ્બરે યોજાનારી ઉત્તર પ્રદેશ શિક્ષક પાત્રતા પરીક્ષા (UPTET)નું પેપર લીક થયું હતુ. જેના કારણે પરીક્ષા રદ કરવામાં આવી છે.રાજ્ય સરકારે ઉત્તર પ્રદેશ શિક્ષક પાત્રતા પરીક્ષા રદ કરી છે. મૂળભૂત શિક્ષણ વિભાગના નિયામક સર્વેન્દ્ર વિક્રમ સિંહે કહ્યું કે પ્રશ્નપત્ર સોશિયલ મીડિયા પર વાયરલ થયા બાદ પરીક્ષા રદ કરવાનો નિર્ણય લેવામાં આવ્યો છે.લીક મામલે અનેક લોકોની ધરપકડ કરવામાં આવી છે અને તપાસનો ધમધમાટ ચાલી રહ્યો છે.
વોટ્સએપ પર પ્રશ્નપત્ર લીક થયું. મીડિયા રિપોર્ટ્સ અનુસાર, પેપર લીક થયા બાદ STFએ રાજ્યભરમાં દરોડા પાડ્યા છે, પ્રયાગરાજ, મેરઠ અને ગાઝિયાબાદમાંથી ઘણા લોકોની અટકાયત કરવામાં આવી છે. બાદમાં પરીક્ષાની તારીખ જાહેર કરવામાં આવશે.મૂળભૂત શિક્ષણ વિભાગના અગ્ર સચિવ દીપક કુમારે જણાવ્યું હતું કે પ્રશ્નપત્ર લીક મામલે પ્રયાગરાજમાં FIR દાખલ કરવામાં આવી છે. તેમણે કહ્યું કે કેસની તપાસ એસટીએફને સોંપવામાં આવી છે.ADG કાયદો અને વ્યવસ્થા પ્રશાંત કુમારે કહ્યું કે પેપર લીક કરનારા કેટલાક લોકોની ધરપકડ કરવામાં આવી છે. તેની પૂછપરછ ચાલી રહી છે, ટૂંક સમયમાં સમગ્ર મામલો બહાર આવશે.
ઉત્તર પ્રદેશ શિક્ષક પાત્રતા કસોટી 2021 (UPTET) આજે રાજ્યના તમામ જિલ્લાઓમાં 2554 કેન્દ્રો પર યોજાવાની હતી. પ્રથમ પાળીની પરીક્ષા સવારે 10 થી 12:30 દરમિયાન યોજાવાની હતી. પ્રથમ પાળીમાં પ્રાથમિક કક્ષાની પરીક્ષામાં 1291628 ઉમેદવારો હતા. બીજી પાળીમાં ઉચ્ચ પ્રાથમિક કક્ષાની પરીક્ષા બપોરે 2.30 થી 5 દરમિયાન યોજાવાની હતી. જેમાં કુલ 873553 ઉમેદવારો હતા. પ્રથમ પાળી માટે 2554 અને બીજી શિફ્ટની પરીક્ષા માટે 1747 કેન્દ્રો બનાવવામાં આવ્યા હતા.