વરસાદની મોસમ ભલે વાતાવરણને ખુશનુમા બનાવી દેતી હોય, પણ ગૃહિણીઓ માટે આ ઋતુ કપડાં ધોવા અને તેને સૂકવવાની બાબતમાં માથાનો દુખાવો સાબિત થાય છે. સતત રહેતા ભેજ અને વાદળછાયા આકાશને કારણે કપડાં દિવસો સુધી સૂકાતા નથી અને તેમાંથી એક અજીબ પ્રકારની ભેજવાળી દુર્ગંધ આવવા લાગે છે. આવા અડધા ભીના કપડાં લાંબા સમય સુધી પહેરી રાખવાથી સ્કીન એલર્જી અને ફંગલ ઇન્ફેક્શન થવાનો ખતરો પણ બમણો થઈ જાય છે. જો તમે પણ આ ચોમાસે આ જ સમસ્યાનો સામનો કરી રહ્યા હોવ, તો સૂર્યપ્રકાશના અભાવે પણ કપડાંને ફટાફટ કોરા રાખવાના કેટલાક અદભુત અને સ્માર્ટ ઉપાયો અહીં દર્શાવ્યા છે.
ચોમાસામાં કપડાંને ત્વરિત સૂકવવા માટેના 6 રામબાણ ઉપાયો
સ્પિન ડ્રાયરનો સ્માર્ટ ઉપયોગ: કપડાં ધોયા પછી તેમાંથી પાણીનો છેલ્લો ટીપો પણ નીકળી જાય તે જોવું ખૂબ જરૂરી છે. જો તમે વોશિંગ મશીન વાપરતા હોવ, તો કપડાંને સામાન્ય રીતે ધોયા પછી વધુ એક વખત ‘સ્પિન ડ્રાય‘ મોડ પર ફેરવી લો. આમ કરવાથી કપડાંમાં રહેલો 80% જેટલો ભેજ મશીનમાં જ સુકાઈ જશે.
ડ્રાય ટુવાલની મેજિક ટ્રીક:જો કોઈ મોંઘું કે ખાસ કપડું તાત્કાલિક સૂકવવું હોય, તો એક કોરો અને જાડો ટુવાલ જમીન પર પાથરો. તેના પર એ ભીનું કપડું મૂકીને ટુવાલને રોલ વાળી દો અને હળવા હાથે દબાવો. ટુવાલ કપડાનો બધો જ વધારાનો ભેજ ક્ષણભરમાં સોસી લેશે અને કપડું ઝડપથી સુકાઈ જશે.
હવાની અવરજવર અને ફૂલ સ્પીડ પંખો:વરસાદના દિવસોમાં કપડાંને ક્યારેય બંધ રૂમમાં ન સૂકવવા જોઈએ. ઘરના એવા રૂમની પસંદગી કરો જ્યાં બારી-બારણાં ખુલ્લા હોય અને હવાની અવરજવર (Ventilation) સારી હોય. ત્યાં કપડાં ફેલાવીને પંખો ફૂલ સ્પીડ પર ચાલુ કરી દેવાથી હવાનું સતત પરિભ્રમણ ભેજને ઉડાડી દે છે.
કપડાં સૂકવવા હેંગર્સનો જાદુ:દોરડા પર કપડાંને ગૂંચળું વાળીને કે એકબીજાની ઉપર લટકાવવાની ભૂલ ક્યારેય ન કરવી. તેના બદલે શર્ટ, ટી-શર્ટ કે કુર્તાને પ્લાસ્ટિક કે સ્ટીલના ‘હેંગર્સ’માં ભરાવીને લટકાવો. હેંગરના કારણે કપડાં અંદરથી એકદમ ખુલ્લા રહે છે અને હવા તેના દરેક ખૂણે સરળતાથી પહોંચી શકે છે.
બે કપડાં વચ્ચે પરફેક્ટ ડિસ્ટન્સ:કપડાં લટકાવતી વખતે તેમની વચ્ચે પૂરતી જગ્યા રાખવી અનિવાર્ય છે. જો તમે કપડાંને એકબીજાની અડોઅડ ગોઠવશો, તો હવા પસાર થવાનો માર્ગ બંધ થઈ જશે અને કપડાં ક્યારેય નહિ સૂકાય. દરેક જોડી વચ્ચે થોડું અંતર રાખવાથી સુકાવાની પ્રક્રિયા ઝડપી બને છે.
ઇસ્ત્રીનો સ્માર્ટ ટચ:ઘણીવાર પંખા નીચે લાંબો સમય રાખ્યા પછી પણ કપડાંમાં થોડી ઘણી ભીનાશ કે ઠંડક રહી જતી હોય છે.આવા સમયે કપડાંને હળવી ગરમ ઇસ્ત્રી (Iron) કરી લેવી જોઈએ. ઇસ્ત્રીની ગરમી કપડાંના રેસામાં છુપાયેલા ભેજને વરાળ બનાવીને ઉડાડી દેશે અને કપડાં તરત પહેરવા લાયક બની જશે.
આ સરળ અને ઘરેલું પદ્ધતિઓનો ઉપયોગ કરીને તમે વરસાદની મોસમમાં પણ તમારા પરિવારના કપડાંને એકદમ તાજા, કડક અને દુર્ગંધ મુક્ત રાખી શકો છો.
