ડોલર સામે ભારતીય રૂપિયો સતત નબળો પડી રહ્યો છે. જોકે, નાણામંત્રી નિર્મલા સીતારમણે તાજેતરમાં નિવેદન આપ્યું હતું કે રૂપિયો નથી તૂટી રહ્યો, પરંતુ ડૉલર મજબૂત થઈ રહ્યો છે. આ અંગે પક્ષ-વિપક્ષ વચ્ચે ભારે ચર્ચા જાગી હતી. હવે બુધવારે રૂપિયો રેકોર્ડ નીચી સપાટીએ પહોંચ્યો હતો. તે ડોલર સામે 61 પૈસા ઘટીને રૂ. 83.01 પર બંધ થયો હતો, જે તેનું અત્યાર સુધીની સૌથી નીચી સપાટીએ પહોંચ્યો છે.
આ પહેલીવાર છે જ્યારે રૂપિયો 83ને પાર થયો છે. આ પહેલા મંગળવારે પણ રૂપિયામાં ઘટાડાનો ટ્રેન્ડ જોવા મળ્યો હતો. તે ડોલર સામે રૂ.82.36 પ્રતિ ડોલર પર બંધ રહ્યો હતો. બુધવારે બપોરે કારોબાર દરમિયાન રૂપિયામાં નજીવો સુધારો જોવા મળ્યો હતો, પરંતુ સાંજ સુધીમાં તેમાં ઘટાડો થવા લાગ્યો હતો. ટ્રેડિંગના અંતે, તે ડોલર સામે ખરાબ રીતે તૂટી ગયો હતો અને પ્રતિ ડોલર 83 રૂપિયાને પાર કર્યા પછી બંધ થયો હતો.
શેરબજારમાં પણ દિવસભર ઉતાર-ચઢાવ ચાલુ રહ્યો હતો. પરંતુ કારોબારના અંત સુધીમાં તેજી સાથે બંધ થયું છે. બુધવારે BSE સેન્સેક્સ 146.59 પોઈન્ટના વધારા સાથે 59,107.19ની સપાટી પર બંધ રહ્યો હતો. તે જ સમયે, NSE નિફ્ટી પણ 25.30 પોઈન્ટની મજબૂતાઈ સાથે 17,521.25ની સપાટી પર બંધ રહ્યો હતો.
ઉલ્લેખનીય છે કે તાજેતરમાં નાણામંત્રી અમેરિકાના પ્રવાસે હતા. ત્યાં પત્રકારો સાથેની પ્રેસ કોન્ફરન્સ દરમિયાન જ્યારે તેમને રૂપિયાના ઘટાડાને લઈને સવાલ કરવામાં આવ્યો ત્યારે તેમણે કહ્યું, “રૂપિયો ગગડી રહ્યો નથી, પરંતુ ડૉલર મજબૂત થઈ રહ્યો છે. ડૉલરની સામે અન્ય તમામ કરન્સીની હાલત પણ આવી જ છે. નાણામંત્રીના આ નિવેદન પર ભારે હોબાળો થયો હતો. તેમના નિવેદન માટે વિપક્ષે તેમના પર પ્રહારો કર્યા હતા, જ્યારે સોશિયલ મીડિયા પર પણ તેની પ્રતિક્રિયા જોવા મળી હતી.
