Jamnagar News : જામનગરમાં કાયદાના સંઘર્ષમાં આવનાર સગીરને પોલીસે માર મારતા ભોગ બનનારની માતાએ હાઈકોર્ટમાં અરજી કરી છે. જેમાં પ્રાથમિક સુનાવણીમાં હાઈકોર્ટે સરકારી વકીલનો ઉધડો લેતા જણાવ્યું હતું કે, હાર્ડકોર અપરાધીઓ સામે પોલીસ બળ વાપરે તે યોગ્ય, પરંતુ 14 વર્ષના છોકરાને મારી શકાય નહિ.કોર્ટે એવી પણ ટકોર કરી હતી કે, આજે 14 વર્ષિય સગીર પર અત્યાચાર થયો છે, આવતીકાલે તમારા કે મારા બાળક સાથે પણ આવું થશે. બીજી તરફ સરકારી તરફે એવો બચાવ રજૂ કરવામાં આવ્યો હતો કે, ભોગ બનનાર અને પરિવારનો ગુનાઈત ઈતિહાસ છે અને આ મામલે એસ.પી. તપાસ કરી રહ્યાં છે. આ અંગે આગામી દિવસોમાં વધુ સુનાવણી યોજવામાં આવશે.

હાઈકોર્ટમાં એક 14 વર્ષના સગીરને પોલીસ દ્વારા માર મારવાના કિસ્સામાં તેની માતા મારફતે હાઈકોર્ટમાં અરજી દાખલ કરવામાં આવી છે. જેમાં એવી રજૂઆત કરવામાં આવી છે કે, સગીર ધોરણ 8માં અભ્યાસ કરે છે. જામનગરના ઇ ડિવિઝન પોલીસ સ્ટેશને સગીરના પરિવાર સહિત કુલ 15 લોકો સામે માર્ચ મહિનામાં કલમ 307, 326, 325,324, 323, 504, 143, 147, 148, 149, 427 અને ગુજરાત પોલીસ એક્ટની કલમ 135 મુજબ હોળીના દિવસે કેટલાક લોકો સાથે ઝઘડો અને મારામારીની ફરિયાદ નોંધાઈ હતી.તે દિવસે મોટેથી હોર્ન વગાડવા બાબતે બે પક્ષો વચ્ચે ઝઘડો થયો હતો. જેમાં એક પક્ષ બીજા પક્ષ ઉપર તીક્ષણ હથિયારથી હુમલો કર્યો હતો. જેમાં કુલ ચાર વ્યક્તિઓ ગંભીર રીતે ઘવાયા હતા. ચાર પૈકી કેટલાક લોહીલુહાણ અને કેટલાકને ફેક્ચર પણ થયું હતું. મહિલાઓએ પણ મરચું ઉડાડીને ભોગ બનનારાઓને માર માર્યો હતો. ભોગ બનનાર પૈકી એક હોમગાર્ડ જવાન પણ હતો.

તેમણે વધુમાં રજૂઆત કરી છે કે, આ કેસમાં હુમલો કરનાર સગીરના પિતાની ધરપકડ કરવામાં આવી હતી. આ ઉપરાંત તેના કેટલાક કુટુંબીજનોની પણ ધરપકડ કરવામાં આવી હતી. જ્યારે સગીરને જુવેનાઈલ આરોપી બનાવાયો હતો. આક્ષેપ મુજબ સગીરને તેની માતા દ્વારા પોલીસે પોલીસ સ્ટેશન બોલાવ્યો હતો. જ્યાં પહેલા તેને બેસાડી રાખ્યો હતો.બાદમાં સગીરને પોલીસ સ્ટેશનના જુદા જુદા રૂમમાં બોલાવીને માર માર્યો હતો. તેમજ તેના આધાર કાર્ડ જેવા ઓરિજનલ દસ્તાવેજો લઈ લીધા હતા. સગીરને માર મરાતા તેની માતા તેને જામનગરની સિવિલ હોસ્પિટલમાં લઈ ગઈ હતી.

કલેક્ટર સમક્ષ પણ આરોપી પોલીસ કર્મચારીઓ સામે ફરિયાદ નોંધવા રજૂઆત કરવામાં આવી હતી. સગીર દ્વારા ચાર પોલીસ કર્મચારીઓ પર આક્ષેપ કરાયો હતો. અરજીમાં જામનગર પોલીસ કમિશનર અને જામનગર શહેર ઇ ડિવિઝનના PI ને પક્ષકાર બનાવવામાં આવ્યા હતા. આમ છતાં કોઈ જ કાર્યવાહી કરવામાં આવી નથી.સગીરને માર મારવાની અરજી ગુજરાત હાઈકોર્ટમાં આવતા હાઈકોર્ટે સરકારી વકીલનો ઉધડો લઈ લીધો હતો. હાઈકોર્ટે સીધું જ પૂછ્યું હતું કે જવાબદાર પોલીસ કર્મચારીઓ સામે ફરિયાદ નોંધાશે કે કેમ ? હાર્ડકોર અપરાધીઓ સામે પોલીસ બળ વાપરે તે બરોબર છે, પરંતુ 14 વર્ષના છોકરાને મારી શકાય નહિ.

સગીરના માતા-પિતા આરોપી હોય તો કાયદા મુજબ જે થતું હોય તે કરી શકાય. પોલીસે ઉદાહરણ સેટ કરવું જોઈએ કે જ્યારે તેના કર્મચારીઓ વાંકમાં હોય ત્યારે પણ તે પગલાં લેતા ખચકાતી નથી. નિર્દય પોલીસ ફોર્સને છૂટા હાથે કામ કરવા મંજૂરી આપી શકાય નહીં. આવી ફરિયાદ દરરોજ કોર્ટમાં આવતી હોય છે.અરજદારે સગીરને માર્યાના પુરાવા રૂપે કોર્ટ સમક્ષ ફોટા મૂક્યા હતા. જેથી કોર્ટે કહ્યું હતું કે, કોઈએ તો સગીરને માર માર્યો છે તો તેની તો તપાસ થવી જોઈએ. સરકારી વકીલે જણાવ્યું હતું કે, પોલીસ ઉપર દબાણ ઊભું કરવા માટે આ અરજી કરવામાં આવી છે.

સગીરને શીખવાડીને તૈયાર કરવામાં આવ્યો છે. સગીરનો ઉપયોગ તેના પિતા અને પરિવારને બચાવવા માટે કરવામાં આવી રહ્યો છે. અહીં રાઈનો પહાડ કરવાની કોશિશ કરાઈ છે. જોકે, અરજદારે જણાવ્યું હતું કે, પોલીસે હોસ્પિટલના CCTV કોર્ટ સમક્ષ મૂક્યા છે.જ્યારે પોલીસ સ્ટેશનના મૂક્યા નથી. જે સંદર્ભે સરકારી વકીલે કહ્યું હતું કે, તેને પરત મેળવવાની કાર્યવાહી હાથ ધરાઈ છે. જોકે, તેને ક્યાં સુધી પરત મેળવી શકાશે તેની સ્પષ્ટતા કરાઈ નહોતી.

આથી કોર્ટે હળવી શૈલીમાં કહ્યું હતું કે તે નહીં મળે! ખોટું પોલીસને તકલીફમાં મૂકશો નહિ! પોલીસ સામે જ્યારે આક્ષેપ હોય ત્યારે પોલીસ સ્ટેશનના CCTV નથી મળતા. જે એક ઓફિસર સરકારી વકીલે રજૂ કરેલા CCTVમાં નથી દેખાતો તેનો સામે પગલાં ભરવામાં આવે. સરકારી વકીલે જણાવ્યું હતું કે, જઙ આ અંગે તપાસ કરી રહ્યા છે. આ મુદ્દે વધુ આગામી દિવસોમાં હાથ કરવામાં આવશે.

આ પણ વાંચો: મોરબી બ્રિજ દુર્ઘટનામાં માતા-પિતા ગુમાવનારી દીકરીઓની ભણવા-લગ્નની જવાબદારી કંપનીની, ગુજરાત હાઇકોર્ટનો આદેશ

આ પણ વાંચો: પ્રદૂષણ નિયંત્રણ બોર્ડના નિયંત્રણમાં કશું નથીઃ દ્વારકામાં સોડાએશના મામલે ઝાટકણી કાઢતી ગુજરાત હાઇકોર્ટ

આ પણ વાંચો: વાડી સ્વામિનારાયણ મંદિર દુષ્કર્મ કેસમાં ગુજરાત હાઇકોર્ટમાં પિટિશન નામંજૂર