ICC T20 વર્લ્ડ કપમાં સુપર 12 સ્ટેજ શરૂ થઈ ગયો છે. આ ટૂર્નામેન્ટમાં આજે ભારત અને પાકિસ્તાનની ટીમો પોતાની પ્રથમ મેચમાં સામસામે ટકરાશે. T20 વર્લ્ડ કપમાં બંને ટીમો છઠ્ઠી વખત ટકરાશે. બંને કટ્ટર હરીફ ટીમો વચ્ચે આ T20 મુકાબલો દુબઈના ઈન્ટરનેશનલ ક્રિકેટ સ્ટેડિયમમાં સાંજે 7:30 વાગ્યાથી રમાશે.
UAE અને ઓમાનમાં ભારત દ્વારા યોજાઈ રહેલા વર્લ્ડ કપમાં આ વખતે ભારત અને પાકિસ્તાનને એક જ ગ્રુપમાં રાખવામાં આવ્યા છે. બંને વચ્ચેની આ મેચ દુબઈ ઈન્ટરનેશનલ ક્રિકેટ સ્ટેડિયમમાં રમાશે.
ટોસની ભૂમિકા
અત્યાર સુધી આ મેદાન પર 61 ટી 20 આંતરરાષ્ટ્રીય મેચ રમાઈ છે, જેમાં પ્રથમ બેટિંગ કરનારી ટીમે 34 જીત મેળવી છે જ્યારે બાદમાં બેટિંગ કરનાર ટીમે 26 મેચ જીતી છે. IPL 2021 દરમિયાન પણ અહીં 13 મેચ રમાઈ હતી, જેમાં રનનો પીછો કરતી ટીમે સૌથી વધુ 9 મેચ જીતી હતી, જ્યારે પ્રથમ બેટિંગ કરનારી ટીમ માત્ર 4 મેચમાં જ સફળતા મેળવી શકી હતી.
અત્યારે અહીં ઝાકળની ભૂમિકા વધુ રહેવાની છે, જે પ્રેક્ટિસ મેચ અને IPL માં પણ જોવા મળી હતી. ઝાકળ અહીં હોવાથી રન ચેસ કરવા માટે સરળ બને છે , આવી સ્થિતિમાં, અહીં બંને ટીમો ટોસ જીતીને પ્રથમ બોલિંગ કરવા માંગશે.
શા માટે ટોસ મહત્વપૂર્ણ રહેશે?
ભારત અને પાકિસ્તાન વચ્ચે વનડે અને ટી 20 વર્લ્ડ કપ સહિત કુલ 12 મેચ રમાઈ છે. તેમાંથી ભારતે આઠ વખત ટોસ જીત્યો છે. સાત વખત ટીમ ઈન્ડિયા પ્રથમ બેટિંગ કરીને મેચ જીતી છે. 2007 ના વર્લ્ડકપમાં ગ્રુપ રાઉન્ડ દરમિયાન ટાઈ થયેલી ભારત-પાકિસ્તાન મેચમાં ટીમ ઈન્ડિયાએ પ્રથમ બેટિંગ કરી હતી.
હવામાન પરિસ્થિતિઓ
ઓક્ટોબર મહિનામાં દુબઈનું હવામાન બહુ ગરમ નથી. આવી સ્થિતિમાં ભારત-પાકિસ્તાન મેચ દરમિયાન રવિવારે સમાન હવામાનની અપેક્ષા છે. આ દિવસે દુબઈમાં મહત્તમ તાપમાન 34 અને લઘુત્તમ તાપમાન 26 ડિગ્રી રહેવાનું છે. હવામાન સ્પષ્ટ રહેશે અને વરસાદની કોઈ શક્યતા નથી. પરંતુ રાત્રિની મેચમાં ઝાકળ એક મોટું પરિબળ બની રહેશે.
પિચ રિપોર્ટ
આઈપીએલ 2021 ના બીજા તબક્કાની કેટલીક મેચો પણ વર્લ્ડ કપ પહેલા આ મેદાન પર રમાઈ હતી. લીગની ફાઈનલ પણ અહીં જ થઈ હતી. તે દરમિયાન દુબઈની પીચ થોડી ધીમી હતી. ટીમ ઈન્ડિયાએ આ બંને ગ્રાઉન્ડ પર પોતાની પ્રેક્ટિસ મેચ પણ રમી હતી અને ત્યારબાદ પણ પિચમાં બહુ ફેરફાર જોવા મળ્યો ન હતો. જોકે, ભારતીય બેટ્સમેનોએ અહીં સારું પ્રદર્શન કર્યું અને ટીમની જીતમાં ચાવીરૂપ ભૂમિકા ભજવી.
