Gandhinagar News : ગુજરાતમાં વાહનચાલકો માટે વધુ એક ખર્ચનો બોજ આવી રહ્યો છે. ગુજરાત રાજ્ય માર્ગ વાહનવ્યવહાર નિગમ (GSRTC) દ્વારા એસટી બસના ભાડામાં વધારો કર્યા બાદ, હવે રાજ્યના અનેક ટોલ પ્લાઝા પર 1 એપ્રિલથી ભાવ વધારો લાગુ થવા જઈ રહ્યો છે. આ વધારાને કારણે વાહનચાલકોને ટોલ ટેક્સ પેટે વધુ ચૂકવણી કરવી પડશે.
અમદાવાદ-વડોદરા એક્સપ્રેસ વે અને અમદાવાદ-વડોદરા વચ્ચેના નેશનલ હાઇવે 48 પર પણ ટોલ ફીમાં વધારો જાહેર કરવામાં આવ્યો છે. વિવિધ ટોલ પ્લાઝા પર રૂ. 5 થી લઈને રૂ. 40 સુધીનો વધારો કરવામાં આવ્યો છે, જે વાહનચાલકોના ખિસ્સા પર સીધી અસર કરશે.
અમદાવાદ-વડોદરા એક્સપ્રેસ વે પર મુસાફરી કરનારા કાર અને જીપ જેવા વાહનો માટે હવે રૂ. 135 ના બદલે રૂ. 140 ટોલ ટેક્સ ચૂકવવો પડશે. જ્યારે બસ અને ટ્રક જેવા મોટા વાહનો માટે ટોલ ફી રૂ. 465 થી વધીને રૂ. 480 થશે. આ વધારો એક્સપ્રેસ વે પર મુસાફરી કરનારા લોકો માટે ખર્ચમાં વધારો કરશે.
આ ઉપરાંત, વડોદરાથી આણંદ વચ્ચે કાર માટેનો ટોલ ટેક્સ રૂ. 50 થી વધીને રૂ. 55 અને વડોદરાથી નડિયાદ વચ્ચે રૂ. 70 થી વધીને રૂ. 75 કરવામાં આવ્યો છે. રઘવાણજ ટોલ પ્લાઝા પર કાર અને જીપ માટેની ફી રૂ. 110 થઈ ગઈ છે, જ્યારે વાસદથી વડોદરા સુધીના કાર અને જીપ માટે રૂ. 160 ટોલ વસૂલવામાં આવશે. ભરથાણા ટોલપ્લાઝા પર કાર અને જીપની ટોલ ફી રૂ. 155 થી વધીને રૂ. 160 પર પહોંચી ગઈ છે.
આ ટોલ ટેક્સમાં વધારો એવા સમયે થઈ રહ્યો છે જ્યારે તાજેતરમાં જ GSRTC દ્વારા એસટી બસના ભાડામાં 10 ટકાનો વધારો ઝીંકવામાં આવ્યો છે. આ વધારો ગત મધરાત્રિથી અમલમાં આવી ચૂક્યો છે, જેના કારણે રાજ્યભરના આશરે 27 લાખ મુસાફરો પર સીધી અસર પડી છે. ઉલ્લેખનીય છે કે વર્ષ 2014 બાદ પહેલીવાર 2023 માં એસટી નિગમ દ્વારા ભાડામાં વધારો કરવામાં આવ્યો હતો, અને હવે ફરીથી વધારો થતાં મુસાફરો પર વધુ બોજ પડશે.
GSRTC દ્વારા લાગુ કરાયેલા નવા ભાડા દરોમાં 48 કિમી સુધીના પ્રવાસ માટે રૂ. 1 થી લઈને રૂ. 6 સુધીનો વધારો કરવામાં આવ્યો હતો. અને હવે ટોલ ટેક્સમાં વધારો થવાથી મુસાફરી વધુ મોંઘી સાબિત થશે.
આમ, ગુજરાતમાં એસટી બસના ભાડા બાદ હવે ટોલ ટેક્સમાં વધારો થવાથી સામાન્ય નાગરિકોની મુસાફરી વધુ ખર્ચાળ બનશે. 1 એપ્રિલથી લાગુ થનારા આ નવા દરો વાહનચાલકોના બજેટ પર અસર કરશે તે નિશ્ચિત છે.
આ પણ વાંચો: ટોલ ઓપરેટરોને જેલમાં મોકલીશું, મારા વિભાગમાં તમને ભૂલ લાગે તો મને પણ છોડશો નહી-નીતિન ગડકરી
આ પણ વાંચો: રાજકોટ અને જેતપુર વચ્ચેના ટોલ ટેક્સમાં નોંધપાત્ર ઘટાડો, આંદોલન પહેલા સરકારે લીધો નિર્ણય
આ પણ વાંચો: ટોલ ટેક્સ અને ફાસ્ટેગથી જોડાયેલા નિયમો આજથી લાગૂ, વધારાનો ચાર્જ પણ ચુકવવો પડશે
