અમદાવાદના કુબેરનગર વિસ્તારમાં ગઈ કાલે માત્ર ચાર કલાકના ગાળામાં બે આત્મહત્યાના બનાવો બની જતા સમગ્ર વિસ્તારમાં ભારે શોકની લાગણી ફેલાઈ ગઈ હતી. પોલીસે બંને બનાવોમાં અકસ્માતમાં મોતનો ગુનો નોંધીને કાયદેસરની કાર્યવાહી હાથ ધરી હતી.

ગઈ કાલે બપોરે 12 વાગ્યાની આસપાસ કુબેરનગરમાં એફ વૉર્ડમાં ઘર નંબર 15ની અંદર રહેતા રાહુલ છાબડાએ ગઈ કાલે અગમ્ય કારણસર પોતાના રૂમના પંખાની સાથે દુપટ્ટો બાંધીને ગળે ફાસો ખાઈને આપઘાત કર્યો હતો. ઘરના સભ્યોએ રાહુલને પંખા ઉપરથી ઉતારીને તાબડતોડ હોસ્પિટલ પહોંચાડવાની કોશિશ કરી હતી. જોકે, રાહુલે દમ તોડી દેતા ડોક્ટરોએ મૃત જાહેર કરીને પોલીસને જાણ કરી હતી. સરદારનગર પોલીસે અકસ્માતનો ગુનો નોંધીને રાહુલના મૃતદેહને પોસ્ટમોર્ટમ માટે મોકલી દેવામાં આવ્યું હતું.

બીજી તરફ ચાર કલાકના ટૂંકા ગાળામાં ફરીથી કુબેર નગરમાં આત્મહત્યાનો બનાવ સામને આવ્યો હતો. એ વૉર્ડમાં 159 નંબરના મકાનમાં રહેતા કિશોરભાઈ ચારણે પોતાની કરિયાણાની દુકાનમાં ગળે ફાંસો લગાવીને આપઘાત કરી લેતા તેમનું મોત નીપજ્યું હતું.સરદાર નગર પોલીસે આ બનાવની પણ અકસ્માતના ગુનાની ફરિયાદ નોંધીને આગળની તપાસ હાથ ધરી હતી.

બંને બનાવોમાં આપઘાત કરવાનું કારણ પોલીસને પ્રાપ્ત થયું નથી. આ મામલે પોલીસ દ્વારા સઘન તપાસ હાથ ધરવામાં આવી રહી છે. માત્ર ચાર કલાકના સમયગાળામાં બે આત્મહત્યાના બનાવો બનતા સમગ્ર વિસ્તારમા ભારે અરેરાટી ફેલાઈ ગઈ હતી.

મંતવ્ય ન્યૂઝ દ્વારા જાહેર અપીલ –