Uttar Pradesh Rain Incident: ઉત્તર ભારતના અનેક રાજ્યોમાં ભારે વરસાદે જનજીવનને અસર પહોંચાડી છે. હિમાચલ પ્રદેશમાં વરસાદ દરમિયાન થયેલા અકસ્માતમાં ત્રણ મહિનાના બાળક સહિત એક જ પરિવારના પાંચ સભ્યોએ જીવ ગુમાવ્યો છે. જમ્મુ-કાશ્મીરના બાંદીપોરા જિલ્લામાં વાદળ ફાટતાં અચાનક પૂર જેવી સ્થિતિ સર્જાઈ છે. ઉત્તરાખંડમાં ખરાબ હવામાનને કારણે ચારધામ યાત્રા પણ અસ્થાયી રીતે રોકી દેવામાં આવી છે.
હિમાચલ પ્રદેશના ચંબા જિલ્લામાં સોમવારે મોડી રાત્રે પઠાણકોટ-ભરમૌર હાઇવે પર એક કાર કાબૂ ગુમાવી ઊંડી ખાડીમાં ખાબકી હતી. કારમાં સવાર પરિવાર પીજીઆઈ ચંદીગઢથી બાળકની સારવાર કરાવી ઘરે પરત ફરી રહ્યો હતો. અકસ્માત એટલો ગંભીર હતો કે કારમાં રહેલા પાંચેય લોકોનાં મોત થયા હતા.
ભારે વરસાદને કારણે ચંબા સહિત હિમાચલના અનેક વિસ્તારોમાં ભૂસ્ખલનની ઘટનાઓ નોંધાઈ છે. કેટલાક સ્થળોએ કાટમાળ રસ્તાઓ પર આવી જતાં વાહનવ્યવહાર ખોરવાયો છે. ભૂસ્ખલનથી આશરે 20 વાહનો દટાઈ ગયા હોવાનું સામે આવ્યું છે. અનેક મુખ્ય અને આંતરિક માર્ગો બંધ થતાં લોકોને અવરજવરમાં મુશ્કેલી પડી રહી છે.
ચંબાના કેટલાક વિસ્તારોમાં વરસાદી પાણી અને કાટમાળ રહેણાંક વિસ્તારોમાં ઘૂસી ગયા હતા. અનેક ઘરોને નુકસાન પહોંચ્યું હોવાનું સામે આવ્યું છે. ભારે વરસાદ વચ્ચે કેટલાક લોકોને રાત્રે પોતાના ઘર છોડીને સુરક્ષિત સ્થળે જવું પડ્યું હતું.
બીજી તરફ, ઉત્તર કાશ્મીરના બાંદીપોરા જિલ્લામાં વાદળ ફાટવાની ઘટનાએ ચિંતા વધારી છે. અચાનક આવેલા પૂરના કારણે નીચાણવાળા વિસ્તારોમાં પાણી ભરાઈ ગયું હતું. રહેણાંક મકાનો, ખેતીની જમીન અને સ્થાનિક માળખાકીય સુવિધાઓને નુકસાન થવાની શક્યતા વ્યક્ત કરવામાં આવી છે. અસરગ્રસ્ત વિસ્તારોમાં બચાવ અને રાહત કામગીરી પર નજર રાખવામાં આવી રહી છે.
ઉત્તર પ્રદેશમાં પણ ભારે વરસાદને કારણે દુર્ઘટનાઓ સર્જાઈ છે. બુલંદશહેરમાં ધોરણ 4માં ભણતી ચારુ નામની વિદ્યાર્થિની શાળાએથી ઘરે જતી વખતે ખુલ્લા ગટરમાં પડી ગઈ હતી. વરસાદ બાદ રસ્તાઓ પર પાણી ભરાઈ જતાં તેને રસ્તા અને ગટર વચ્ચેનો તફાવત સમજાયો નહોતો.
ઘટના બાદ મોડી સાંજ સુધી વિદ્યાર્થીનીનો કોઈ પત્તો લાગ્યો નહોતો. જિલ્લા તંત્ર દ્વારા સમગ્ર મામલે તપાસ શરૂ કરવામાં આવી છે. જિલ્લા મેજિસ્ટ્રેટે પ્રાથમિક તબક્કે શાળા સંચાલનની જવાબદારી અંગે સવાલ ઉઠાવ્યા હતા. તેમણે જણાવ્યું હતું કે ભારે વરસાદની સ્થિતિમાં બાળકીને સુરક્ષિત રીતે તેના વાલીઓ સુધી પહોંચાડવાની વ્યવસ્થા થવી જોઈએ હતી. તપાસ બાદ જવાબદારો સામે કાર્યવાહી કરવામાં આવશે.
તેમજ ઉત્તર પ્રદેશના સંભલમાં વરસાદ દરમિયાન એક મકાનની દિવાલ તૂટી પડતાં કાકી અને ભત્રીજીનાં મોત થયા હતા. રાજ્યમાં વરસાદને લગતી વિવિધ ઘટનાઓમાં ત્રણ લોકોના મોત થયાની માહિતી સામે આવી છે.
ઉત્તરાખંડમાં સતત વરસાદ અને ખરાબ હવામાનને ધ્યાનમાં રાખીને ચારધામ યાત્રાને બે દિવસ માટે રોકવાનો નિર્ણય લેવામાં આવ્યો છે. યાત્રાળુઓને તેમના નિર્ધારિત રોકાણ સ્થળોએ જ રહેવા સૂચના આપવામાં આવી છે. હવામાનની સ્થિતિની સમીક્ષા કર્યા બાદ યાત્રા ફરી શરૂ કરવા અંગે નિર્ણય લેવામાં આવશે.
દહેરાદૂનના પ્રેમનગર વિસ્તારમાં ભારે વરસાદને કારણે માટી ધોવાઈ જતાં નંદા કી ચોકી પુલ તરફ જતા રસ્તાનો એક ભાગ તૂટી પડ્યો હતો. આ ઘટનાને કારણે સ્થાનિક વાહનવ્યવહારને અસર પહોંચી છે.
હવામાન વિભાગે આગામી દિવસોમાં હિમાચલ પ્રદેશ, જમ્મુ-કાશ્મીર, લદ્દાખ, ઉત્તરાખંડ, પશ્ચિમ ઉત્તર પ્રદેશ અને પૂર્વી રાજસ્થાનમાં ભારેથી અતિભારે વરસાદની શક્યતા દર્શાવી છે. જમ્મુ-કાશ્મીરના અનેક જિલ્લાઓ માટે ઓરેન્જ એલર્ટ પણ જાહેર કરવામાં આવ્યું છે. હરિયાણા, પંજાબ અને ચંદીગઢમાં પણ ભારે વરસાદની સંભાવનાને કારણે વહીવટી તંત્રને સતર્ક રહેવા સૂચના આપવામાં આવી છે.
આસામમાં પણ પૂરનો પ્રકોપ યથાવત છે. વધુ સાત લોકોના મોત નોંધાતાં રાજ્યમાં પૂરને કારણે મૃત્યુઆંક 75 સુધી પહોંચ્યો છે. પૂરની તીવ્રતા ઓછી થઈ હોવા છતાં હજુ પણ 3.32 લાખથી વધુ લોકો અસરગ્રસ્ત હોવાનું સત્તાવાર માહિતીમાં જણાવાયું છે.
રાજ્યના શિવસાગર, ચરાઈદેવ, ગોલાઘાટ, જોરહાટ, નાગાંવ, સોનિતપુર અને કામરૂપ મેટ્રોપોલિટન સહિતના જિલ્લાઓમાં પૂરનું સંકટ યથાવત છે. કુલ 21 મહેસૂલ વર્તુળો અને 622 ગામડાઓ પૂરથી પ્રભાવિત થયા છે. ચરાઈદેવ જિલ્લામાં સૌથી વધુ લોકો અસરગ્રસ્ત હોવાનું સામે આવ્યું છે.
પૂરગ્રસ્ત લોકો માટે રાજ્યમાં 81 રાહત શિબિરો શરૂ કરવામાં આવી છે. વિસ્થાપિત પરિવારોને આ શિબિરોમાં આશ્રય અને જરૂરી સહાય આપવામાં આવી રહી છે. મુખ્યમંત્રી હિમંતા બિસ્વા શર્માએ જણાવ્યું છે કે પૂર પીડિતોને તાત્કાલિક સરકારી મદદ મળી રહે તે માટે જરૂરી નિયમોમાં છૂટછાટ આપવામાં આવી છે.
ઉત્તર ભારતથી લઈને પૂર્વોત્તર ભારત સુધી ભારે વરસાદ, ભૂસ્ખલન અને પૂરની સ્થિતિને કારણે અનેક વિસ્તારોમાં જનજીવન પ્રભાવિત થયું છે. હવામાન વિભાગની આગાહીને ધ્યાનમાં રાખીને લોકોને સાવચેતી રાખવા અને જોખમી વિસ્તારોમાં જવાનું ટાળવા અપીલ કરવામાં આવી છે.
