Vadodara News: ઈન્સ્ટિટ્યૂટ ઓફ ચાર્ટર્ડ એકાઉન્ટન્ટ્સ ઓફ ઈન્ડિયા (ICAI) દ્વારા સપ્ટેમ્બર મહિનામાં લેવાયેલી CA ઈન્ટર પરીક્ષાનું પરિણામ (Vadodara CA Result) જાહેર થયું છે. આ પરિણામમાં વડોદરાના ત્રણ વિદ્યાર્થીઓએ ઓલ ઈન્ડિયા ટોપ-50માં સ્થાન મેળવ્યું છે. હર્ષ સરવૈયાએ દેશભરમાં 16મો, વ્રજેશ પરમારે 46મો અને માનુષ શર્માએ 49મો રેન્ક મેળવ્યો છે.
Vadodara CA Result: વડોદરાના ત્રણ વિદ્યાર્થીઓએ ટોપ-50માં સ્થાન મેળવ્યું
જાહેર થયેલા પરિણામ મુજબ, હર્ષ સરવૈયા (Harsh Sarvaiya)એ 468 માર્ક્સ સાથે ઓલ ઈન્ડિયા રેન્ક (AIR) 16 મેળવી વડોદરામાં પ્રથમ સ્થાન મેળવ્યું છે. વ્રજેશ પરમારે 438 માર્ક્સ સાથે દેશભરમાં 46મો અને શહેરમાં બીજો ક્રમ મેળવ્યો છે. જ્યારે માનુષ શર્માએ 435 માર્ક્સ સાથે AIR 49 મેળવી વડોદરામાં ત્રીજું સ્થાન મેળવ્યું છે.
વડોદરાનું CA ઈન્ટરનું પરિણામ 23.09 ટકા
આપેલી વિગતો અનુસાર, વડોદરામાંથી 1,325 વિદ્યાર્થીઓએ CA ઈન્ટરના એક અથવા બંને ગ્રુપની પરીક્ષા આપી હતી. તેમાંથી 306 વિદ્યાર્થીઓ પાસ થતાં પરિણામ 23.09 ટકા નોંધાયું હતું. આશરે 200 વિદ્યાર્થીઓ હવે CA ફાઈનલ માટે ક્વોલિફાય થયા છે.
બંને ગ્રુપની પરીક્ષા આપનારા 473 વિદ્યાર્થીઓમાંથી 70 વિદ્યાર્થીઓએ બંને ગ્રુપમાં સફળતા મેળવી હતી. જ્યારે 56 વિદ્યાર્થીઓ પ્રથમ ગ્રુપ અને 9 વિદ્યાર્થીઓ બીજા ગ્રુપમાં પાસ થયા હતા. પ્રથમ ગ્રુપની પરીક્ષા આપનારા 584માંથી 113 અને માત્ર બીજા ગ્રુપની પરીક્ષા આપનારા 268માંથી 58 વિદ્યાર્થીઓ પાસ થયા હતા.
હર્ષ સરવૈયા: અભ્યાસ સાથે બ્રેક પણ જરૂરી
હર્ષ સરવૈયાએ જણાવ્યું કે તેઓ દરરોજ 8થી 10 કલાક અભ્યાસ કરતા હતા, પરંતુ વચ્ચે બ્રેક પણ લેતા હતા. મગજને તાજગી આપવા માટે તેઓ ફિલ્મો જોતા અને વોલીબોલ રમતા હતા. તેમના મતે, સારી રીતે અભ્યાસ કરવા માટે વચ્ચે વિરામ લેવો જરૂરી છે. CA ફાઉન્ડેશનમાં પણ તેમણે દેશભરમાં 11મો રેન્ક મેળવ્યો હતો. હવે CA ફાઈનલમાં પણ રેન્ક મેળવવાનું તેમનું લક્ષ્ય છે. તેમના ભાઈ પણ CA છે, જ્યારે પિતા બેંકમાં નોકરી કરે છે.
વ્રજેશ પરમાર: અભ્યાસ સાથે માતાના વ્યવસાયમાં મદદ
વ્રજેશ પરમારે (Vrajesh Parmar) 438 માર્ક્સ મેળવી AIR 46 મેળવ્યો છે. તેમના પિતાનું 2011માં અવસાન થયા બાદ માતાએ લેબર કોન્ટ્રાક્ટરનો વ્યવસાય સંભાળ્યો હતો. વ્રજેશ અભ્યાસની સાથે માતાને વ્યવસાયમાં મદદ પણ કરે છે. તેઓ જરોદમાં રહે છે અને CAના અભ્યાસ માટે દરરોજ વડોદરા આવનજાવન કરે છે. સાથે B.Comનો અભ્યાસ પણ ચાલુ રાખ્યો છે. તેમના જણાવ્યા મુજબ, મોક ટેસ્ટથી આત્મવિશ્વાસ વધ્યો હતો. કોરોના બાદ પરિવારનો વ્યવસાય લગભગ ઠપ થઈ ગયો હોવા છતાં તેમણે અભ્યાસ ચાલુ રાખ્યો હતો.
માનુષ શર્મા: ભૂલોનું વિશ્લેષણ કરવા AIની મદદ
માનુષ શર્મા (Manush Sharma)એ 435 માર્ક્સ મેળવીને દેશભરમાં 49મું સ્થાન હાંસલ કર્યું છે. તેઓ દરરોજ આશરે 10 કલાક અભ્યાસ કરતા અને રોજના અભ્યાસનું નિયમિત રિવિઝન કરતા હતા. તેમણે મોક ટેસ્ટ પણ આપ્યા હતા. અભ્યાસ દરમિયાન થતી ભૂલોનું વિશ્લેષણ કરવા માટે તેઓ AIનો ઉપયોગ કરતા હતા. તેમના જણાવ્યા મુજબ, તેમના પરિવારમાં CAનો અભ્યાસ કરનાર તેઓ પ્રથમ વ્યક્તિ છે. તેમના પિતા કોન્ટ્રાક્ટર તરીકે કામ કરે છે.
વડોદરાના ત્રણેય વિદ્યાર્થીઓની સફળતાથી શહેરના CAના વિદ્યાર્થીઓ અને તેમના પરિવારોમાં ઉત્સાહનો માહોલ છે. હવે ત્રણેય વિદ્યાર્થીઓની નજર CA ફાઈનલની તૈયારી પર છે.
આ પણ વાંચો: સુરતમાં CAનો વિદ્યાર્થી મોપેડના ડીકીમાંથી ચોરી કરતા ઝડપાયો
આ પણ વાંચો: Sree Charani એ રચ્યો ઈતિહાસ, ICC રેન્કિંગમાં તોડ્યો રેકોર્ડ
