Vadodara Water Crisis: ઉનાળાની કાળઝાળ ગરમી વચ્ચે સંસ્કારી નગરી વડોદરાના નાગરિકો માટે અત્યંત ચિંતાજનક અને મુશ્કેલીભર્યા સમાચાર સામે આવ્યા છે. વડોદરા શહેરમાં પીવાના પાણીનો પ્રશ્ન વધુ ગંભીર બનવા જઈ રહ્યો છે. મહીસાગર નદીમાં આવેલા ફ્રેન્ચવેલમાં ભારે પ્રમાણમાં રેતી ભરાઈ જતાં આગામી એક મહિના સુધી શહેરના અડધા ભાગમાં મોટો પાણીકાપ ઝીંકવામાં આવ્યો છે. ખાસ કરીને છાણી, ફતેગંજ અને પાણીગેટ સહિતના વિસ્તારોમાં હવે 24 કલાકમાં માત્ર એક જ સમય પાણી આપવાનો વહીવટી તંત્રે નિર્ણય કર્યો છે, જેને પગલે સ્થાનિક નાગરિકોમાં પાલિકા સામે ભારે રોષ જોવા મળી રહ્યો છે.
રાયકા અને દોડકા ફ્રેન્ચવેલમાંથી રેતી કાઢવાની કામગીરી શરૂ
વડોદરા શહેરના મોટાભાગના વિસ્તારોને પીવાનું પાણી પૂરું પાડતી મહીસાગર નદીની ફ્રેન્ચવેલ સિસ્ટમમાં છેલ્લા કેટલાક સમયથી અસાધારણ પ્રમાણમાં રેતી ભરાઈ ગઈ છે. રેતી જમા થઈ જવાના કારણે કુવાઓમાંથી પાણી ઉપાડવાની મશીનરીની ક્ષમતામાં મોટો ઘટાડો નોંધાયો છે. આ સમસ્યાના કાયમી ઉકેલ માટે પાણી પુરવઠા વિભાગ દ્વારા રાયકા અને દોડકા વિસ્તારમાં આવેલી ફ્રેન્ચવેલમાંથી રેતી દૂર કરવાની વિશેષ અને અત્યંત જરૂરી કામગીરી હાથ ધરવામાં આવી છે. અધિકારીઓના જણાવ્યા અનુસાર, આ સફાઈ અભિયાન પૂર્ણ થવામાં અંદાજે એક મહિના જેટલો લાંબો સમય લાગી શકે છે.
Vadodara : છાણીથી પાણીગેટ સુધી માત્ર એક ટાઈમ પાણી
આ મેઈન્ટેનન્સની કામગીરીના કારણે વડોદરાના અનેક મોટા વિસ્તારોમાં પાણીનો સપ્લાય ઘટાડી દેવામાં આવ્યો છે. છાણી, ફતેગંજ અને પાણીગેટ જેવા ગીચ વસ્તી ધરાવતા વિસ્તારોમાં હવેથી માત્ર એક જ વખત પાણી વિતરણ કરવામાં આવશે. જો કે, આ કટોકટી શરૂ થતાંની સાથે જ સ્થાનીક લોકોની મુશ્કેલીઓ બેવડાઈ ગઈ છે. અનેક સોસાયટીઓ અને એપાર્ટમેન્ટ્સમાંથી પૂરતા દબાણથી પાણી ન મળવાની ફરિયાદો ઉઠી છે. કેટલાક છેવાડાના વિસ્તારોમાં તો લોકોના ઘરો સુધી પાણી બિલકુલ પહોંચી રહ્યું નથી, જેના કારણે ગૃહિણીઓ, બાળકો અને વડીલોને ભારે હાલાકી ભોગવવી પડી રહી છે.
રોષે ભરાયેલા નાગરિકો ઝોન કચેરીએ પહોંચ્યા
પાણીની તીવ્ર અછતથી પરેશાન બનેલા નાગરિકોનો પિત્તો ગયો હતો અને તેમણે પાણીગેટ વિસ્તારની ઝોન કચેરી ખાતે પહોંચીને ગરમી વચ્ચે તંત્ર સામે ઉગ્ર રજૂઆતો કરી હતી. સ્થાનિક રહિશ નિર્મળાબેન પાંડેએ ભારે આક્રોશ સાથે જણાવ્યું કે, “અહીં પહેલાથી જ ખૂબ જ ઓછા ફોર્સથી પાણી મળતું હતું અને હવે વળી આ નવો પાણીકાપ ઝીંકી દેવાતા અમારી સ્થિતિ નરક જેવી બની ગઈ છે.” નાગરિકોએ માગ કરી છે કે તંત્ર દ્વારા તાત્કાલિક ટેન્કરો દ્વારા વૈકલ્પિક વ્યવસ્થા ઊભી કરવામાં આવે.
બીજી તરફ, પાણી પુરવઠા વિભાગના કાર્યપાલક ઈજનેર હેમલસિંહ રાઠોડે આ મામલે બચાવ કરતા જણાવ્યું કે, “ભવિષ્યમાં વડોદરાને પૂરતો અને શુદ્ધ પાણી પુરવઠો મળતો રહે તે માટે ફ્રેન્ચવેલમાંથી રેતી દૂર કરવાનું કામ અત્યારે કરવું ખૂબ જ અનિવાર્ય છે. વિભાગ દ્વારા નાગરિકોને ઓછામાં ઓછી તકલીફ પડે તે રીતે આખું આયોજન ગોઠવવામાં આવ્યું છે.”
