New Delhi News : ભારતનું અર્થતંત્ર (Economy)અટકાવી શકાય તેવું નથી અને આગામી નાણાકીય વર્ષ 2026માં તે 7.4 ટકાની મજબૂત વૃદ્ધિ નોંધાવવાની શક્યતા છે. 7 જાન્યુઆરીએ જાહેર કરાયેલા સરકારી આંકડા મુજબ, આ વૃદ્ધિ દર ગત નાણાકીય વર્ષના 6.5 ટકા કરતા નોંધપાત્ર ઊંચો છે.
ભારતીય અર્થતંત્ર (Economy) ની ગતિ યથાવત
વૈશ્વિક દબાણો અને અમેરિકામાં નિકાસમાં મંદી હોવા છતાં ભારતીય અર્થતંત્ર (Economy) ની ગતિ યથાવત છે.આ વૃદ્ધિ પાછળ મજબૂત રોકાણ, રોકાણકારોનો વિશ્વાસ, નીતિગત સુધારા, વધતી સ્થાનિક માંગ અને મજબૂત આર્થિક માળખું મુખ્ય કારણ બન્યા છે. ઉત્પાદન અને સેવા ક્ષેત્રોએ આ આર્થિક પુનરુત્થાનમાં મહત્વની ભૂમિકા ભજવી છે.
આંકડા અને કાર્યક્રમ અમલીકરણ મંત્રાલય (MoSPI) દ્વારા જાહેર કરાયેલા રાષ્ટ્રીય આવકના પ્રથમ આગોતરા અંદાજ મુજબ, ઉત્પાદન અને બાંધકામ ક્ષેત્રોમાં આશરે 7 ટકાની વૃદ્ધિ થવાની અપેક્ષા છે. સેવા ક્ષેત્ર મજબૂત ચાલકબળ તરીકે સામે આવ્યું છે, જેના કારણે 2025-26માં વાસ્તવિક ગ્રોસ વેલ્યુ એડેડ (GVA) વૃદ્ધિ દર 7.3 ટકા રહેવાનો અંદાજ છે.
જોકે, કૃષિ તથા સંલગ્ન ક્ષેત્રો તેમજ વીજળી, ગેસ, પાણી પુરવઠા અને અન્ય ઉપયોગિતા સેવાઓમાં મધ્યમ વૃદ્ધિ નોંધાવાની શક્યતા છે. મંત્રાલયે વધુમાં જણાવ્યું છે કે નાણાકીય વર્ષ 2025-26માં નોમિનલ જીડીપી 8 ટકા વધશે.
આર્થિક વૃદ્ધિમાં રોકાણ મુખ્ય ચાલકબળ બન્યું છે. નાણાકીય વર્ષ 2026માં ગ્રોસ ફિક્સ્ડ કેપિટલ ફોર્મેશન (GFCF) 7.8 ટકા વધવાનો અંદાજ છે, જે ગત વર્ષના 7.1 ટકા કરતા વધારે છે. ઇન્ફ્રાસ્ટ્રક્ચર, મશીનરી અને લાંબા ગાળાના પ્રોજેક્ટ્સમાં વધતા ખર્ચથી આ વૃદ્ધિ સ્પષ્ટ થાય છે.
સરકારના નીતિગત પગલાંઓ, જેમ કે આવકવેરામાં રાહત અને GST દરોની તર્કસંગતતા, કારણે સ્થાનિક માંગમાં વધારો થયો છે. વૈશ્વિક વેપાર તણાવ અને ટેરિફ પડકારો છતાં મજબૂત સ્થાનિક બજારે આ અસરને સંતુલિત કરી અર્થતંત્રને (Economy) નવી ગતિ આપી છે.
