વડાપ્રધાન નરેન્દ્રભાઈ મોદીએ આજે શુક્રવારે ગાંધીનગર રેલ્વે સ્ટેશનથી ‘વંદે ભારત એક્સપ્રેસ’ ટ્રેનને લીલીઝંડી આપી શુભારંભ કરાવ્યો હતો.આ નવીન ટ્રેન ગાંધીનગરથી મુંબઈ સેન્ટ્રલ વચ્ચે દોડશે. વડાપ્રધાન મોદીએ આ પ્રસંગે રેલવે સ્ટેશન ખાતે વંદે ભારત એક્સપ્રેસ ટ્રેનનું તલસ્પર્શી નિરીક્ષણ કરીને ગાંધીનગરથી અમદાવાદ સુધી ટ્રેનની સફર માણી હતી.
અત્રે ઉલ્લેખનીય છે કે, દિલ્હીના બે રૂટ્સ પર મોટી સફળતા પછી ભારતની પહેલી સ્વદેશી સેમી હાઈ સ્પીડ ટ્રેન હવે ગુજરાતના પાટા પર પણ દોડતી જોવા મળશે. ઉલ્લેખનીય છે કે થોડાક દિવસ પહેલા જ ગુજરાતમાં વંદે ભારત ટ્રેનનું સફળ ટ્રાયલ પણ કરવામાં આવ્યું હતું.
આવો જાણીએ આ ટ્રેનની વિશેષતા
1. નવી વંદે ભારત ટ્રેનો પ્રથમ બે વંદે ભારત ટ્રેનો કરતાં વધુ આરામદાયક હશે.
2. કોઈપણ અપ્રિય ઘટનાના કિસ્સામાં ટ્રેનના દરેક કોચમાં ચાર ઈમરજન્સી વિન્ડો છે.
3. નવી વંદે ભારત ટ્રેનોમાં ટ્રેન અથડામણ ટાળવા માટે સ્વદેશી ઓટોમેટિક ટ્રેન પ્રોટેક્શન સિસ્ટમ હશે.
4. નવી વંદે ભારત ટ્રેનોમાં સારી હીટ વેન્ટિલેશન અને એર કન્ડીશનીંગ કંટ્રોલ સિસ્ટમ પણ હશે.
5. પેસેન્જર ઇન્ફોર્મેશન અને ઇન્ફોટેનમેન્ટ સિસ્ટમમાં અગાઉની ટ્રેનોમાં જોવા મળતી 24 ઇંચની જગ્યાએ 32 ઇંચની ડિસ્પ્લે હશે.
6. GSM/GPRS દ્વારા કંટ્રોલ સેન્ટર/મેન્ટેનન્સ સ્ટાફને એર કન્ડીશનીંગ, કોમ્યુનિકેશન અને ફીડબેક પર દેખરેખ રાખવા માટે ટ્રેનમાં સુધારેલ કોચ કંટ્રોલ મેનેજમેન્ટ સિસ્ટમ પણ હશે.
7. નવી ટ્રેનમાં ચાર પ્લેટફોર્મ સાઇડ કેમેરા હશે, જેમાંથી બે કોચની અંદર અને રીઅરવ્યુ કેમેરા હશે.
8. ડ્રાઈવર-ગાર્ડ કોમ્યુનિકેશનમાં વોઈસ રેકોર્ડિંગની સુવિધા પણ ઉપલબ્ધ હશે.
9. કોચના પાવર સપ્લાયમાં નિષ્ફળતાના કિસ્સામાં, ટ્રેનને ચાર ઈમરજન્સી લાઈટોથી સજ્જ કરવામાં આવી છે.
10. આગજનીના કેસમાં સલામતી સ્તરને વધારવા માટે ટ્રેન તમામ કોચમાં એરોસોલ ફાયર સપ્રેશન સિસ્ટમથી સજ્જ છે.
ગુજરાતમાં શરૂ થયેલી આ વંદે ભારત ટ્રેનને પહેલી વખત ‘KAVACH’ (ટ્રેન કોલાઇઝન અવોઇડન્સ સિસ્ટમ) ટેક્નીકથી લોન્ચ કરવામાં આવી રહી છે. આ ટેક્નીકની મદદથી બે ટ્રેનની સામસામે થનારી અથડામણ જેવી દુર્ઘટનાઓને હવે અટકાવી શકાશે. આ ટેક્નીકને દેશમાં જ વિકસિત કરવામાં આવી છે, જેના કારણે તેનો ખર્ચ ઘણો ઓછો છે.
ઉલ્લેખનીય છે કે કેન્દ્ર સરકાર દ્વારા 2022ના બજેટમાં 2000 કિલોમીટર સુધીના રેલ નેટવર્કને ‘કવચ’ હેઠળ લાવવાની યોજના વિશે એલાન કરવામાં આવ્યું હતું અને માર્ચ 2022માં રેલવે મંત્રી અશ્વિની વૈષ્ણવે તેનું સફળ પરીક્ષણ પણ કર્યું હતું.
સ્વદેશી સેમી-હાઇ સ્પીડના નામથી પ્રસિદ્ધ આ ટ્રેન 0 થી 100 કિમી પ્રતિ કલાક સુધીની ઝડપ માત્ર 52 સેકંડમાં પ્રાપ્ત કરી લે છે. આ ટ્રેનમાં મુસાફરોની સુવિધા માટે સ્લાઇડિંગ ફૂટસ્ટેપ્સ, ઉપરાંત ટચ ફ્રી સ્લાઇડિંગ ડોરની સાથે સ્વચાલિત પ્લગ દરવાજાઓ પણ લગાવવામાં આવ્યા છે.
એસીના મોનિટરિંગ માટે કોચ કંટ્રોલ મેનેજમેન્ટ સિસ્ટમ, અને કંટ્રોલ સેન્ટર તેમજ મેઇન્ટેનન્સ સ્ટાફની સાથે કોમ્યુનિકેશન તેમજ ફીડબેક માટે GSM / GPRS જેવી આધુનિક ટેક્નીકનો ઉપયોગ કરવામાં આવે છે.
દિવ્યાંગ મુસાફરો માટે વિશેષ પ્રકારના શૌચાલય અને સામાન્ય મુસાફરો માટે ટચ-ફ્રી એમેનિટિસ વાળા બાયો વેક્યુમ ટોયલેટ્સની વ્યવસ્થા કરવામાં આવી છે.
આ જ રીતે,દિવ્યાંગ મુસાફરોની સુવિધા માટે સીટોમાં બ્રેલ લિપિની સાથે સીટની સંખ્યા પણ કોતરવામાં આવી છે,જેથી આવા મુસાફરો પોતાની સીટ્સ સુધી સરળતાથી પહોંચી શકે.
એટલું જ નહીં,આધુનિક ટેક્નિકની વાત કરીએ તો આ ટ્રેનમાં વધુ સારા ટ્રેન નિયંત્રણ વ્યવસ્થાપન માટે લેવલ-II સેફ્ટી ઇન્ટિગ્રેશન સર્ટિફિકેશન, કોચની બહાર રિયર વ્યૂ કેમેરા સહિત 4 પ્લેટફોર્મ સાઇડ કેમેરા, તમામ કોચમાં એસ્પિરેશન આધારિત ફાયર ડિટેક્શન અને સપ્રેશન સિસ્ટમ અને ઇલેક્ટ્રિકલ ક્યૂબિકલ્સ તેમજ શૌચાલયોમાં એરોસોલ આધારિત ફાયર ડિટેક્શન એન્ડ સપ્રેસ સિસ્ટમ જેવા બહેતર અગ્નિશામક સુરક્ષા ઉપાયો કરવામાં આવ્યા છે.
આયાતી ટ્રેનના અડધા ખર્ચમાં તૈયાર થઈ જાય છે વંદે ભારત ટ્રેન
વંદે ભારત એક્સપ્રેસે ભારતમાં મુસાફરીના એક નવા યુગની શરૂઆત કરી છે. માત્ર રૂ.100 કરોડના ખર્ચે બનનારી આ ટ્રેન સમાન સુવિધાઓ ધરાવતી આયાતી ટ્રેન કરતા લગભગ અડધા ખર્ચે બનીને તૈયાર થઈ જાય છે.વડાપ્રધાનશ્રી ના ‘મેક ઇન ઇન્ડિયા’દ્રષ્ટિકોણને ધ્યાનમાં રાખીને ટ્રેનની મુખ્ય સિસ્ટમ્સને ભારતમાં ડિઝાઇન અને નિર્માણ કરવામાં આવી છે.
