Ahmedabad News : એર ઇન્ડિયા ફ્લાઇટ AI-171 દુર્ઘટના (Air India Plane Crash)ની તપાસ હવે તેના નિર્ણાયક તબક્કામાં પહોંચી ગઈ છે, પરંતુ અકસ્માતના એક વર્ષ બાદ પણ અંતિમ અહેવાલ જાહેર થયો નથી. આ વચ્ચે એરક્રાફ્ટ એક્સિડન્ટ ઇન્વેસ્ટિગેશન બ્યુરો (AAIB)એ સ્પષ્ટતા કરી છે કે તપાસ પ્રક્રિયા અત્યંત જટિલ અને પુરાવા આધારિત હોવાથી સમય લાગી રહ્યો છે.
એર ઇન્ડિયા પ્લેન દુર્ઘટના (Air India Plane Crash)ની તપાસ હવે તેના નિર્ણાયક તબક્કામાં
AAIBના જણાવ્યા અનુસાર, તપાસ ટીમ છેલ્લા એક વર્ષથી સતત કામ કરી રહી છે. અકસ્માતના દરેક પાસાની વિગતવાર સમીક્ષા કરવામાં આવી રહી છે, જેમાં ભારત તેમજ વિદેશના એવિએશન નિષ્ણાતો અને ટેકનિકલ સલાહકારો પણ જોડાયેલા છે. તપાસ દરમિયાન વિમાનના બ્લેક બોક્સ, ફ્લાઇટ ડેટા રેકોર્ડર, કોકપિટ વોઇસ રેકોર્ડર અને એન્જિનના વિવિધ ભાગોનું વૈજ્ઞાનિક વિશ્લેષણ કરવામાં આવ્યું છે.
તપાસ એજન્સીએ મીડિયા અને જનતાને અપીલ કરી છે કે અંતિમ અહેવાલ જાહેર થાય તે પહેલાં કોઈપણ પ્રકારની અટકળો અથવા નિષ્કર્ષો પર ન પહોંચવું જોઈએ. હાલમાં પાઇલટની ભૂલ (Pilot Error) હતી કે કોઈ ટેકનિકલ ખામી (Technical Failure)હતી તે અંગે કોઈ સત્તાવાર નિર્ણય લેવાયો નથી.
AAIBએ જણાવ્યું કે માત્ર વિમાનના ભંગારનું નિરીક્ષણ પૂરતું નથી હોતું. અકસ્માત પાછળના વાસ્તવિક કારણો સુધી પહોંચવા માટે પ્રયોગશાળામાં અનેક પ્રકારના પરીક્ષણો, ડેટા ડીકોડિંગ અને સિસ્ટમ એનાલિસિસ કરવાની જરૂર પડે છે. ખાસ કરીને બ્લેક બોક્સમાંથી મળેલા વિશાળ ડેટાને સમજવો અને માનવીય તેમજ સંગઠનાત્મક પરિબળો વચ્ચેના સંબંધોને ચકાસવા માટે લાંબો સમય લાગે છે.
એજન્સીનું કહેવું છે કે તપાસનો હેતુ કોઈ વ્યક્તિ કે સંસ્થાને દોષી ઠેરવવાનો નથી, પરંતુ ભવિષ્યમાં આવી દુર્ઘટનાઓ અટકાવવા માટે સલામતીમાં સુધારો લાવવાનો છે. તેથી દરેક પુરાવાની સંપૂર્ણ ચકાસણી કર્યા બાદ જ અંતિમ નિષ્કર્ષ જાહેર કરવામાં આવશે.
AAIBએ વિશ્વાસ વ્યક્ત કર્યો છે કે તપાસ સંપૂર્ણપણે નિષ્પક્ષ, પારદર્શક અને આંતરરાષ્ટ્રીય એવિએશન ધોરણો મુજબ કરવામાં આવી રહી છે. તમામ ટેકનિકલ સમીક્ષાઓ પૂર્ણ થયા બાદ અંતિમ અહેવાલ જાહેર કરવામાં આવશે, જેનાથી એર ઈન્ડિયા પ્લેન દુર્ઘટના (Air India Plane Crash)ના સાચા કારણો સામે આવશે.
