Longest River Cruise Journey: વિશ્વની સૌથી લાંબી રિવર ક્રૂઝ યાત્રા શરૂ થઈ. આ પ્રસંગે PM મોદીએ વિદેશી પ્રવાસીઓને ભારત આવવા અપીલ કરી, વડાપ્રધાન નરેન્દ્ર મોદીએ વારાણસીને બે ભેટ આપી. પહેલી ભેટ ગંગા વિલાસ ક્રૂઝ અને બીજી 5 સ્ટાર ટેન્ટસિટી. ગંગા વિલાસ ક્રૂઝ દુનિયાની સૌથી લાંબી રિવર ક્રૂઝ યાત્રા પર નીકળી. આ દરમિયાન એ 3200 કિલોમીટરની સફર કરશે. એ વારાણસીથી આસામના ડિબ્રુગઢ સુધી જશે,  આવો જાણીએ વિશ્વની સૌથી લાંબી રિવર ક્રૂઝ યાત્રા વિશે…

ભારતને રિવર ક્રૂઝની ભેટ આપતા સમયે PM મોદીએ જણાવ્યું કે, હું આ ક્રૂઝ પર સવાર વિદેશી પ્રવાસી સાથીઓને કહીશ કે ભારત પાસે બધું જ છે. ભારતને શબ્દોમાં વ્યાખ્યાયિત કરી શકાતું નથી. ભારતને અનુભવી શકાય છે. આ ક્રૂઝ પ્રવાસ નવા અનુભવો લાવવા જઈ રહ્યો છે. ક્રૂઝમાં સવાર પ્રવાસીઓને ભારતનાં ધર્મ, કલા, સંસ્કૃતિ, પર્યાવરણ, નદીઓ અને સમૃદ્ધ ભોજનથી પરિચિત થવાની તક મળશે. આ ક્રૂઝ જ્યાંથી પસાર થશે ત્યાં વિકાસની નવી લાઇન બનાવશે. શહેરો વચ્ચે લાંબી રિવર ક્રૂઝની યાત્રા ઉપરાંત અમે નાના ક્રૂઝને પણ પ્રોત્સાહન આપીશું. આ માટે દેશમાં તમામ પ્રકારની સુવિધાઓ વિકસાવવામાં આવી રહી છે. માતા ગંગાની ગોદમાં નવી ટેન્ટસિટી કાશી આવતા પ્રવાસીઓ અને શ્રદ્ધાળુઓને એક નવો અનુભવ આપશે.

તેમણે જણાવ્યું કે, નદીના જળમાર્ગો હવે ભારતની નવી તાકાત બનશે. ગંગા વિલાસ ક્રૂઝની શરૂઆત કોઈ સામાન્ય વાત નથી. 3200 કિલોમીટરથી વધુની આ યાત્રા ભારતમાં આંતરદેશીય જળમાર્ગોના વિકાસનું ઉદાહરણ છે. પહેલાં જળમાર્ગોનો દેશમાં એનો બહુ ઓછો ઉપયોગ હતો. ભારતમાં જળમાર્ગોનો પ્રાચીન ઇતિહાસ હતો. અમે દેશની મુખ્ય નદીઓમાં જળમાર્ગોના વિકાસ માટે કાયદો બનાવ્યો. દેશમાં આજે 24 રાજ્યમાં 111 જળમાર્ગો વિકસાવવાનું કામ ચાલી રહ્યું છે. ગંગા આપણા માટે માત્ર એક જળપ્રવાહ નથી. એ ભારતની તપસ્યાની સાક્ષી છે. આનાથી વધુ કમનસીબી શું હોઈ શકે કે ગંગા કિનારે વિકાસને બદલે એ પછાત થઈ ગઈ. આ જ કારણ છે કે લાખો લોકોએ ગંગા કિનારેથી સ્થળાંતર કર્યું, તેથી જ અમે નમામિ ગંગે શરૂ કર્યું. બીજી તરફ, અર્થ ગંગા દ્વારા, ગંગાના કિનારે રાજ્યોમાં આર્થિક પ્રવૃત્તિઓ વધારવાનું કામ શરૂ કરવામાં આવ્યું છે. ગંગા વિલાસ રિવર ક્રૂઝ ઉત્તરપ્રદેશ, બિહાર, ઝારખંડ, પશ્ચિમ બંગાળ આસામ અને બાંગ્લાદેશની યાત્રા દ્વારા એક નવું પરિમાણ બનાવશે.

જાણો શું છે ખાસ

કાશીમાં ગંગાના કિનારે 30 હેક્ટરમાં 265 ટેન્ટ લગાવીને પ્રવાસીઓ માટે લક્ઝરી ટેન્ટસિટી બનાવવામાં આવી છે, જેમાં રહીને તમે 5 સ્ટાર હોટલની લક્ઝરી સુવિધાઓનો આનંદ માણી શકો છો. ઊગતા સૂર્યનો નજારો અને ગંગા આરતી, રમતો અને ઘોડેસવારી તમને સુકૂન આપશે. PMના ઉદઘાટન બાદ અહીં પ્રવાસીઓ આવવાનું શરૂ થશે. ટેન્ટસિટીનો આ પ્રવાસન પ્રોજેક્ટ પાંચ વર્ષ માટે છે. દર વર્ષે પૂર દરમિયાન ટેન્ટસિટી થોડા મહિનાઓ માટે દૂર કરવામાં આવશે. ગંગાના જળસ્તર સામાન્ય થતાં જ ટેન્ટસિટી ફરી વસાવવામાં આવશે.

ફિટનેસ માટે ખાસ વ્યવસ્થા

યોગ, સ્પા, લાઇબ્રેરી અને આર્ટ ગેલરીની સુવિધાઓનો આનંદ લેવા ઉપરાંત અહીં ઊંટ અને ઘોડેસવારી પણ કરી શકાશે. અહીં 32 ફૂટ ઊંચો ગંગા ટાવર બનાવવામાં આવશે, જ્યાંથી પ્રવાસીઓ ઘાટનો અદભુત નજારો જોઈ શકશે. ગંગામાં પ્રવાસીઓના સુરક્ષિત સ્નાન માટે અહીં ફ્લોટિંગ બાથ જેટી બનાવવામાં આવી છે.

હેન્ડિક્રાફ્ટ પ્રોડક્ટનું થશે માર્કેટ

ઉત્તરપ્રદેશના GI અને ODOP ઉત્પાદનો સહિત અન્ય હેન્ડિક્રાફ્ટ પ્રોડક્ટનું નવું માર્કેટ જોવા મળશે. ટેન્ટસિટીમાં એક મોટો ડાઈનિંગ હોલ અને કોન્ફરન્સ માટે પણ સુવિધાયુક્ત હોલ છે, જ્યાં 800 પ્રતિનિધિ એકસાથે જઈ શકે છે.

51 દિવસની વિશ્વની સૌથી લાંબી નદીની યાત્રા

MV ગંગા વિલાસ વિશ્વની સૌથી લાંબી નદી ક્રૂઝ યાત્રા પર જવા માટે તૈયાર છે. તે વારાણસીના રામનગર બંદર પર છે. વડાપ્રધાન નરેન્દ્ર મોદી 3,200 કિલોમીટરની લાંબી યાત્રા માટે તેને ફ્લેગ ઓફ કરાવી. આ ક્રૂઝ વારાણસીથી શરૂ થશે અને બાંગ્લાદેશ થઈને આસામના ડિબ્રુગઢ પહોંચશે. 5 સ્ટાર હોટલ જેવી લક્ઝરી સુવિધાઓ સાથેના આ રિવર ક્રૂઝમાં 32 વિદેશી પ્રવાસીઓ 51 દિવસ સુધી ગંગાની યાત્રા કરશે.

ક્રુઝમાં શું ખાસ છે, ભાડું કેટલું છે? રૂટ મેપ શું છે?

ક્રૂઝનો રૂટ- ગંગા-ભાગીરથી-હુગલી રિવર સિસ્ટમ એટલે કે નેશનલ વોટર વે 1, કોલકાતાથી ધુબરી એટલે કે ઇન્ડો બાંગ્લા પ્રોટોકોલ રૂટ અને બ્રહ્મપુત્રા એટલે કે નેશનલ વોટર વે 2. માર્ગમાં 27 નદીઓ આવશે. મુખ્ય નદીઓ જે માર્ગમાં આવશે તેમાં- ગંગા, ભાગીરથી, હુગલી, વિદ્યાવતી, માટલા, સુંદરવન નદી સિસ્ટમ – 5, મેઘના, પદ્મા, જમુના અને બ્રહ્મપુત્રા નદીનો સમાવેશ થાય છે. આ ક્રૂઝ 5 રાજ્યો – UP, બિહાર, ઝારખંડ, પશ્ચિમ બંગાળ, આસામમાંથી અને બાંગ્લાદેશમાંથી પસાર થશે. ક્રુઝના માર્ગમાં મુખ્ય સ્ટોપઓવર – વારાણસી, પટના, કોલકાતા, ઢાકા, ગુવાહાટી, ડિબ્રુગઢ સહિત 50 મુખ્ય પ્રવાસન સ્થળો રહેશે. ક્રુઝમાં 18 સ્યુટ, રેસ્ટોરન્ટ, બાર, સ્પા, સનડેક, જીમ અને લાઉન્જ રહેશે. મુખ્ય ડેક પરની તેની 40 સીટવાળી રેસ્ટોરન્ટમાં કોન્ટિનેન્ટલ અને ભારતીય ફૂડ સાથે બુફે કાઉન્ટર્સ છે. ઉપલા ડેકની આઉટડોર બેઠકમાં સ્ટીમર ચેર અને કોફી ટેબલ સાથેનો બાર છે. બાથટબવાળા બાથરૂમ, કન્વર્ટિબલ બેડ, ફ્રેન્ચ બાલ્કની, એલઇડી ટીવી, સેફ, સ્મોક એલાર્મ, લાઇફ વેસ્ટ અને સ્પ્રિંકલર પણ છે.

સમગ્ર પ્રવાસનું ભાડું એક વ્યક્તિ માટે 19 લાખ રૂપિયા. સ્યુટનું ભાડું 38 લાખ છે. આ ભાડુ જગ્યા પ્રમાણે વધી કે ઘટાડી શકે છે. 62.5 મીટર લાંબી અને 12.8 મીટર પહોળી ગંગા વિલાસ ક્રૂઝમાં 40 હજાર લિટરની ફ્યુઅલ ટેન્ક અને 60 હજાર લિટરની પાણીની ટાંકી છે. ‘ગંગા વિલાસ’ ક્રૂઝ લક્ઝરી સુવિધાઓથી સજ્જ છે. અપ સ્ટ્રીમમાં ક્રૂઝની સ્પીડ 10 થી 12 કિલોમીટર પ્રતિ કલાક છે. ડાઉન સ્ટ્રીમમાં ક્રૂઝની ઝડપ 15 થી 20 કિમી પ્રતિ કલાક છે. કોલકાતાથી ક્રૂઝ 22 ડિસેમ્બરે કાશી માટે રવાના થઈ હતી. કાશીથી ડિબ્રુગઢ માટે આ ક્રૂઝ 13 જાન્યુઆરીએ રવાના થઈ.

પ્રવાસીઓ સુંદરવન અને રોયલ બંગાળ ટાઈગર જોશે

ક્રૂઝ ડિબ્રુગઢ જવાના રસ્તે મેઘના નદીમાંથી પસાર થશે. પ્રવાસીઓ અહીં સુંદરવન પણ જોશે. તે યુનેસ્કો દ્વારા પ્રમાણિત વર્લ્ડ હેરિટેજ સાઇટ છે. રોયલ બંગાળ વાઘ પણ સુંદર જંગલમાં રહે છે. કાઝીરંગા નેશનલ પાર્ક પણ રસ્તામાં પડશે. જ્યાં વિશ્વ વિખ્યાત એક શિંગડાવાળો ગેંડા અને હાથી જોવા મળે છે. માજુલી ટાપુ પણ અહીં છે. તે વિશ્વનો સૌથી મોટો નદી ટાપુ છે.

ક્રુઝ પરથી ચંદ્રની રાતનો નજારો અદ્ભુત હશે

ક્રુઝ ઓપરેટર રાજ સિંહે કહ્યું કે ક્રુઝમાંથી ચંદ્રની રાતનો નજારો અદ્ભુત હશે. જ્યાં ધુમ્મસ દેખાશે ત્યાં ક્રુઝ રોકાશે. ક્રુઝની આગળ એક જહાજ રહેશે. તે ક્રુઝની સુરક્ષામાં તૈનાત છે.

જહાજ પર એક પાઈલટ હશે, જે ક્રુઝ કેપ્ટનને માર્ગદર્શન આપશે. કોલકાતામાં ક્રૂઝના પાયલટ અને માસ્ટર બદલાશે. બાકીનો સ્ટાફ યથાવત રહેશે.

ક્રુઝ સ્યુટમાં સલામતી માટે લાઈફ જેકેટ્સ, ફાયર એલાર્મ વગેરે હોય છે. તે જ સમયે, ઇમરજન્સી માટે ક્રૂઝ સાથે 4 નાના સ્ટીમર પણ જોડાયેલા છે. ક્રુઝમાં 51 દિવસ માટે ખાવા-પીવાની સુવિધા ઉપલબ્ધ છે.

ક્રુઝના તમામ 18 સ્યુટ 5 વર્ષ માટે બુક કરવામાં આવ્યા છે

રાજ સિંહે મંતવ્યની ટીમ સાથેની વાતચીતમાં જણાવ્યું કે ગંગા વિલાસનું એડવાન્સ બુકિંગ આખા 5 વર્ષ માટે કરવામાં આવ્યું છે. વિશ્વના વિવિધ પ્રવાસી જૂથો દ્વારા તેનું બુકિંગ કરવામાં આવ્યું છે. 13 જાન્યુઆરીથી શરૂ થયેલી યાત્રાનું ભાડું 19 લાખ રૂપિયા છે. વારાણસીથી સવાર તમામ 32 મુસાફરો ડિબ્રુગઢ સુધી મુસાફરી કરશે. આ રૂટ પર હવે કોઈ બુકિંગ થશે નહીં.

હાલમાં દેશમાં વારાણસી અને કોલકાતા વચ્ચે 8 રિવર ક્રૂઝ કાર્યરત છે. આ ઉપરાંત બીજા રાષ્ટ્રીય જળમાર્ગ બ્રહ્મપુત્રા નદી પર પણ ક્રુઝનો ટ્રાફિક ચાલુ છે. જ્યારે ઇંધણની ટાંકી ભરાઈ જાય છે, ત્યારે તે એક જ વારમાં 40 દિવસ સુધી મુસાફરી કરી શકે છે.

ગંગા વિલાસ ક્રૂઝની ફ્યુઅલ ટેન્કની ક્ષમતા 40 હજાર લિટર છે. આટલા ઇંધણમાં તે 40 દિવસ સુધી મુસાફરી કરી શકે છે.

ક્રુઝનો પોતાનો STP પ્લાન્ટ પણ છે. આના કારણે ગંગામાં ઘન કચરો જોવા મળશે નહીં. જ્યારે ગંદા પાણીને ફિલ્ટર કરીને ગંગામાં છોડવામાં આવશે.

તાજા પાણીના ટેન્કરની ક્ષમતા 60 હજાર લીટર છે. જહાજમાં જ એક વોટર ટ્રીટમેન્ટ પ્લાન્ટ છે, જે નિયમિત ગંગાજળને સાફ કરશે. આ પાણીનો ઉપયોગ વોશરૂમ અને રસોડામાં થશે. તે જ સમયે, બાંગ્લાદેશના કેટલાક ભાગોમાં, નદીમાં ખારું પાણી જોવા મળે છે. આવી સ્થિતિમાં 60 હજાર લીટર શુદ્ધ પાણીનો સંગ્રહ કામમાં આવશે. આ ક્રુઝની તકનીકી વ્યવસ્થા છે.

 ‘ગંગા વિલાસ’ ક્રૂઝમાં કેટલા મુસાફરો પ્રવાસ કરી શકશે?

સત્તાવાર વેબસાઇટ અનુસાર, ‘ગંગા વિલાસ’ ક્રૂઝમાં એક સાથે 80 મુસાફરો મુસાફરી કરી શકશે. ‘ગંગા વિલાસ’ એ લક્ઝરી ક્રુઝ છે જેમાં 18 સ્યુટ અને અન્ય તમામ સંબંધિત સુવિધાઓ છે. સ્યુટ્સનું આર્કિટેક્ચર શાહી શૈલીમાં ડિઝાઇન કરવામાં આવ્યું છે. આ ક્રૂઝ કોલકાતાની હુગલી નદીથી વારાણસીમાં ગંગા નદીના કિનારે સ્થિત વિવિધ મુખ્ય સ્થળોએ જશે.

 ‘ગંગા વિલાસ’નું ટાઇમ-ટેબલ

પહેલેથી જ જાહેર કરાયેલા ટાઈમ ટેબલ મુજબ, ‘ગંગા વિલાસ’ ક્રૂઝ વારાણસીથી તેની યાત્રા શરૂ કરશે. આ ક્રૂઝ તેના પ્રવાસના આઠમાં દિવસે બક્સર, રામનગર અને ગાઝીપુર થઈને પટના પહોંચશે. પટનાથી આ ક્રુઝ કોલકાતા માટે રવાના થશે. આ ક્રૂઝ 20માં દિવસે ગંગા વિલાસ ફરક્કા અને મુર્શિદાબાદ થઈને પશ્ચિમ બંગાળના પાટનગર કોલકાતા પહોંચશે. ત્યારબાદ બીજા દિવસે બાંગ્લાદેશની રાજધાની ઢાકા જવા માટે રવાના થશે અને બાંગ્લાદેશની સરહદમાં પ્રવેશ કર્યા પછીના આગામી 15 દિવસ સુધી આ લક્ઝરી રિવર ક્રૂઝ બાંગ્લાદેશની જળસીમામાં રહેશે. અંતે આ રિવર ક્રૂઝ ગુવાહાટી થઈને ભારતમાં પ્રવેશ કરશે અને શિવસાગર થઈને ડિબ્રુગઢ પહોંચીને પ્રવાસ સમાપ્ત કરશે.

ગંગા નદી એ ભારતની સૌથી પ્રાચીન અને મહત્વપૂર્ણ નદી છે. તેનું ધાર્મિક મહાત્મયની સાથે સાથે આર્થિક દ્રષ્ટિએ પણ ઘણું મહત્વ છે. હવે ગંગા નદીમાં લક્ઝરી ક્રૂઝની મુસાફરી પણ માણી શકાય તે માટે ભારત સરકારે વિશ્વની સૌથી લાંબી રિવર ક્રૂઝ ‘ગંગા વિલાસ’ શરૂ કરી.