Ahmedabad News: ગુજરાતના અમદાવાદ શહેરમાં બ્લેકમેલિંગનો એક ચોંકાવનારો કેસ સામે આવ્યો છે, જેમાં એક યુવકને તેના મારામારીના વીડિયોનો ઉપયોગ કરીને બ્લેકમેલ કરવામાં આવ્યો હતો. આરોપીઓએ સોશિયલ મીડિયા પ્લેટફોર્મ ઈન્સ્ટાગ્રામ અને યુટ્યુબનો ઉપયોગ કરીને વીડિયો વાયરલ કર્યો અને યુવક પાસેથી ખંડણીની માંગ કરી. ગાયકવાડ હવેલી પોલીસે આ મામલે ચાર આરોપીઓ સામે ગુનો નોંધીને તપાસ શરૂ કરી છે.
આપને જણાવી દઈએ ફરિયાદી યુવકનો એક મારામારીનો વીડિયો આરોપીઓએ ઈન્સ્ટાગ્રામ પર “journalist_auzef” અને “aabeda_pathan” નામના આઈડી પરથી અપલોડ કર્યો હતો. આ ઉપરાંત, ‘પાવર ઓફ ટ્રુથ’ નામના યુટ્યુબ ચેનલ પર પણ આ વીડિયો શેર કરવામાં આવ્યો હતો. આરોપીઓએ આ વીડિયોનો ઉપયોગ કરીને યુવકને બ્લેકમેલ કર્યો અને ખંડણીની માંગ કરી. આરોપીઓમાંથી એકે વોટ્સએપ કોલ દ્વારા યુવક પાસેથી ₹10,000ની ખંડણી માંગી હતી. ડરના કારણે ફરિયાદીએ ₹5,000ની રકમ આરોપીઓને ચૂકવી દીધી હતી, પરંતુ આરોપીઓએ વીડિયો ડિલીટ કરવાને બદલે વધુ પૈસાની માંગ કરી.
જાણવા મળ્યું છે કે આ ઘટનાનું મૂળ કારણ પૈસાની લેતીદેતીનો વિવાદ હતો, જેના કારણે યુવક અને આરોપીઓ વચ્ચે ઝપાઝપી થઈ હતી. આ ઝઘડાનો વીડિયો આરોપીઓએ રેકોર્ડ કરી લીધો હતો અને તેનો ઉપયોગ યુવકને બ્લેકમેલ કરવા માટે કર્યો. આરોપીઓએ યુવકને ધમકી આપી હતી કે જો તેમની માંગણીઓ પૂરી નહીં કરવામાં આવે તો વીડિયો વધુ વાયરલ કરવામાં આવશે.
પોલીસે આ મામલે ચાર આરોપીઓ – ઓજેફ તિરમીઝી, આબેદા પઠાણ, અજીમખાન અને સાબિર શેખ સામે ગુનો નોંધ્યો છે. આ આરોપીઓએ સંગઠિત રીતે આ બ્લેકમેલિંગનું કૃત્ય આચર્યું હોવાનું પોલીસનું પ્રાથમિક અનુમાન છે. ગાયકવાડ હવેલી પોલીસે આરોપીઓની ધરપકડ માટે તપાસ તેજ કરી છે અને સોશિયલ મીડિયા એકાઉન્ટ્સની પણ તપાસ કરી રહી છે.
આ પણ વાંચો:અમદાવાદમાં મિત્રએ જ મિત્રની કરી હત્યા, સમાધાનને બહાને બોલાવી ગળે અસ્ત્રો મારી દીધો
આ પણ વાંચો:અમદાવાદમાં બોક્સ ક્રિકેટ પર નિયમોનો શરૂ,સુરતની દુર્ઘટના બાદ AMCએ તૈયાર કરી ડ્રાફ્ટ પોલિસી
આ પણ વાંચો:અમદાવાદ વિમાન દુર્ઘટનાની તપાસ વધુ તીવ્ર, AAIB એ નાગરિક ઉડ્ડયન મંત્રાલયને પ્રાથમિક અહેવાલ સોંપ્યો
