Kutch News: ગ્રામ્ય વિસ્તારોમાં તલાટીઓ ગામના સરકારી કામકાજનો આધારસ્તંભ હોય છે, પરંતુ કચ્છ (Kutch) જિલ્લામાં 13 તલાટીઓની ગેરહાજરીએ લોકોની મુશ્કેલીઓ વધારી દીધી છે. ફરજ દરમિયાન ગેરહાજર રહેવાની ફરિયાદો બાદ જિલ્લા વિકાસ અધિકારી (DDO) અને તાલુકા વિકાસ અધિકારી (TDO)ના માર્ગદર્શન હેઠળ ખાસ ટીમો દ્વારા આકસ્મિક તપાસ હાથ ધરવામાં આવી હતી. આ તપાસમાં 13 તલાટીઓ ગેરહાજર જણાતાં તેમની સામે કડક કાર્યવાહી કરવામાં આવી છે.
આકસ્મિક તપાસ દરમિયાન 13 તલાટીઓ તેમની ફરજ પર હાજર નહોતા, જેના કારણે ગામના લોકોના રોજિંદા સરકારી કામકાજમાં અવરોધ ઉભો થયો હતો. આ તલાટીઓને કારણદર્શક નોટિસ ફટકારી ખુલાસો માગવામાં આવ્યો છે જો યોગ્ય જવાબ નહીં મળે તો પગાર કપાત સહિતની કડક કાર્યવાહી કરવાની ચીમકી પણ આપવામાં આવી છે. આ ઘટનાએ ગ્રામ્ય વહીવટની કાર્યક્ષમતા પર સવાલો ઉભા કર્યા છે.
ગામના વિકાસ અને સરકારી કામકાજમાં તલાટીની ભૂમિકા અનિવાર્ય છે. પરંતુ જ્યારે તલાટીઓ ફરજ પર ગેરહાજર રહે છે, ત્યારે ગ્રામજનોને દસ્તાવેજો, પ્રમાણપત્રો અને અન્ય જરૂરી કામો માટે ભારે હાલાકીનો સામનો કરવો પડે છે. ખેડૂતો, ગામના વૃદ્ધો અને સામાન્ય નાગરિકોના કામો અટકી પડે છે, જેનાથી તેમનો સમય અને શ્રમ બંને વેડફાય છે.
આ ઘટનામાં એવું પણ સામે આવ્યું છે કે, કેટલાક સરપંચોને તલાટીઓની ગેરહાજરીની જાણ હોવા છતાં તેઓ આવા તલાટીઓને છાવરતા હતા. આ બાબતે પણ હવે તપાસનો દોર શરૂ થયો છે, જે ગ્રામ્ય વહીવટની પારદર્શિતા પર પ્રશ્નો ઉભા કરે છે.કચ્છમાં શરૂ થયેલી આ તપાસ અન્ય જિલ્લાઓમાં પણ ફેલાઈ શકે છે, કારણ કે ગુજરાતભરમાં તલાટીઓની ગેરહાજરીની ફરિયાદો સામે આવતી રહે છે. આ ઘટનાએ ગ્રામ્ય વહીવટને વધુ કાર્યક્ષમ અને જવાબદાર બનાવવાની જરૂરિયાત પર ભાર મૂક્યો છે.
આ પણ વાંચો:કચ્છ પોલીસે દારૂ પર ફેરવ્યું બુલડોઝર, કરોડોના માલનો કરાયો નાશ
આ પણ વાંચો:કચ્છના કોરી ક્રીકમાં BSFની મોટી કાર્યવાહી, 15 પાકિસ્તાની ઘૂસણખોરો બે બોટ સાથે ઝડપાયા
