Mehsana News : શેરબજાર(stock market fraud)માં રોકાણ કરવાથી મોટો નફો મળશે તેવી લાલચ આપીને લોકો સાથે કથિત છેતરપિંડી કરતી ગેંગ સામે મહેસાણા લોકલ ક્રાઇમ બ્રાન્ચે કાર્યવાહી કરી છે. વડનગર તાલુકાના સુલીપુર ગામમાં પાડવામાં આવેલા દરોડા દરમિયાન ત્રણ શખ્સોને પકડવામાં આવ્યા છે, જ્યારે આ કેસમાં મુખ્ય સૂત્રધાર હોવાનું જણાવાતો એક શખ્સ સ્થળ પરથી ફરાર થઈ ગયો હતો. પોલીસ તપાસમાં સંબંધિત બેંક ખાતાઓમાં રૂ. 12 કરોડથી વધુના વ્યવહારો થયાની વિગતો સામે આવી છે.

stock market fraudના ગુનામાં 3 ની ધરપકડ

મહેસાણા LCB (LCB Mehsana)ને માહિતી મળી હતી કે સુલીપુર ગામમાં મુકેશજી દુધાજી ઠાકોરના ઘર પાછળ આવેલી ખુલ્લી જગ્યામાં કેટલાક લોકો ભેગા થઈ શેરબજારમાં રોકાણના નામે લોકોને ઊંચા વળતરની લાલચ આપી રહ્યા છે. આ બાતમીના આધારે પોલીસે સ્થળ પર દરોડો પાડ્યો હતો.

આ કાર્યવાહી દરમિયાન ત્રણ શખ્સોને ઝડપી લેવામાં આવ્યા હતા. તેમની ઓળખ રાહુલજી દિનેશજી ઠાકોર (સુલતાનપુર, વડનગર), અરવિંદજી ગાંડાજી ઠાકોર (ગોઠવા, વિસનગર) અને રામાજી લવજીજી ઠાકોર (છાબલીયા, વડનગર) તરીકે થઈ છે. પોલીસને જોઈને મુકેશજી દુધાજી ઠાકોર (સુલીપુર) ત્યાંથી ભાગી ગયો હોવાનું જણાવાયું છે. તેને પકડવા માટે પોલીસે તપાસ અને શોધખોળ શરૂ કરી છે.

મોબાઇલ, લેપટોપ અને કાર સહિત રૂ. 4.25 લાખનો મુદ્દામાલ જપ્ત

દરોડા દરમિયાન પોલીસને પાંચ એન્ડ્રોઇડ મોબાઇલ ફોન, એક લેપટોપ અને એક સ્વિફ્ટ કાર મળી આવી હતી. જપ્ત કરાયેલા પાંચ મોબાઇલની કિંમત રૂ. 1 લાખ, લેપટોપની કિંમત રૂ. 25 હજાર અને કારની કિંમત રૂ. 3 લાખ આંકવામાં આવી છે. આ ઉપરાંત અલગ-અલગ મોબાઇલ નંબર લખેલા કાગળો પણ મળી આવ્યા છે.

પોલીસે કુલ રૂ. 4.25 લાખનો મુદ્દામાલ કબજે કર્યો છે.

Market Pulse એપથી લોકોનો સંપર્ક કરાતો હોવાનો ખુલાસો

પોલીસની પ્રાથમિક તપાસ અનુસાર, આરોપીઓ પોતાના મોબાઇલમાં Market Pulse એપનો ઉપયોગ કરતા હતા. શેરબજારની હિલચાલના આધારે તેઓ ફોન કોલ અને વોટ્સએપ દ્વારા ગુજરાત સહિત દિલ્હી, મહારાષ્ટ્ર અને રાજસ્થાનના લોકોને સંપર્ક કરતા હતા.

પોલીસના જણાવ્યા પ્રમાણે, આ શખ્સો પોતાને અંબિકા ટ્રેડિંગ કંપની(Ambika Trading Company)ના સલાહકાર, એજન્ટ અથવા બ્રોકર તરીકે ઓળખાવતા હતા. હિન્દીમાં વાતચીત કરીને રોકાણ સામે ઊંચું વળતર આપવાની વાત કરવામાં આવતી હતી.

લોકોનો વિશ્વાસ જીત્યા બાદ તેમની પાસેથી પોતાના અથવા અન્ય સંબંધિત વ્યક્તિઓનાં બેંક ખાતાંમાં નાણાં જમા કરાવાતા હોવાનો આરોપ છે. પોલીસને શંકા છે કે રોકાણ માટે મેળવવામાં આવેલી રકમ શેરબજારમાં લગાવવાને બદલે અન્ય હેતુ માટે વપરાતી હતી.

બેંક ખાતાં અને ઓનલાઈન ફરિયાદોની તપાસ

ઝડપાયેલા શખ્સોના મોબાઇલ અને લેપટોપની પ્રાથમિક તપાસ દરમિયાન IDBI બેંક, સર્વોદય બેંક અને કાલુપુર મર્કેન્ટાઈલ બેંકનાં ખાતાંમાં રૂ. 28,07,820ની રકમ મળ્યાની વિગતો સામે આવી છે.

સમન્વય પોર્ટલ પર તપાસ કરતાં આ બેંક ખાતાં સંબંધિત દેશના વિવિધ વિસ્તારોમાંથી કુલ રૂ. 57,30,000ની ઓનલાઈન ફરિયાદો નોંધાયેલી હોવાનું પણ તપાસમાં જાણવા મળ્યું છે.

ત્રણ બેંક ખાતાંમાં રૂ. 12 કરોડથી વધુના વ્યવહારો

પોલીસે સંબંધિત બેંક ખાતાંની વધુ તપાસ કરતાં મોટા પ્રમાણમાં શંકાસ્પદ વ્યવહારોની વિગતો મેળવી છે. તપાસમાં IDBI બેંકના ખાતામાં રૂ. 2.19 કરોડથી વધુ, સર્વોદય કોમર્શિયલ કો-ઓપરેટિવ બેંક (ડીસા)ના ખાતામાં રૂ. 2.01 કરોડથી વધુ અને તમિલનાડુ મર્કેન્ટાઈલ બેંકના ખાતામાં રૂ. 8.32 કરોડથી વધુના વ્યવહારો નોંધાયા હોવાનું જણાવાયું છે.

આ ત્રણેય ખાતાંમાં થયેલા વ્યવહારોની કુલ રકમ રૂ. 12.52 કરોડથી વધુ થાય છે. જોકે, આ વ્યવહારોની સંપૂર્ણ વિગતો અને તેમાં કોની ભૂમિકા હતી તે અંગે વધુ તપાસ જરૂરી છે.

આ કેસમાં પકડાયેલા ત્રણ શખ્સો, ફરાર મુકેશજી ઠાકોર અને તપાસ દરમિયાન સંડોવણી સામે આવનારા અન્ય વ્યક્તિઓ સામે વડનગર પોલીસ સ્ટેશનમાં ગુનો નોંધવામાં આવ્યો છે. પોલીસ દ્વારા હાલ વધુ તપાસ અને કાયદેસરની કાર્યવાહી હાથ ધરવામાં આવી રહી છે.

આ પણ વાંચો: શેરબજાર કૌભાંડમાં EDના દરોડા, ગુજરાત-મુંબઈમાં 29 સ્થળે તપાસ

આ પણ વાંચો: શેરબજારમાં તેજી, સેન્સેક્સ 321 પોઈન્ટ ઉછળ્યો, નિફ્ટી 22,300ને પાર

આ પણ વાંચો: સુરતમાં શેરબજારમાં 15 લાખ ડૂબતાં યુવકનું અપહરણ, 30 લાખની ખંડણી માગી