મોદી સરકારે કેન્દ્રિય કર્મચારીઓને દિવાળીની ગિફ્ટ આપી છે. કેન્દ્રિય કેબિનેટની આજે યોજાયેલી બેઠકમાં કેન્દ્રિય કર્મચારીઓનું મોંઘવારી ભથ્થું અને પેન્શનર્સ માટે મોંઘવારી રાહત વધારવાનો નિર્ણય કરાયો છે. જુલાઈથી ડિસેમ્બર માટે કેન્દ્રિય કર્મચારીઓના મોંઘવારી ભથ્થામાં 3 ટકાનો વધારો કરાયો છે. કેન્દ્રિય કર્મચારીઓના મૂળ વેતનમાં હવે ડીએ વધીને 31 ટકા થઈ ગયું છે. વધેલું ભથ્થું તારીખ 1 જુલાઈ, 2021થી લાગુ થશે.
દેશના વડાપ્રધાન નરેન્દ્ર મોદીની અધ્યક્ષતામાં થયેલી કેન્દ્રિય મંત્રીમંડળની બેઠકમાં કેન્દ્રિય કર્મચારીઓનું ડીએ વધારવાનો નિર્ણય કરાયો છે. આ નિર્ણયથી 1 કરોડથી વધારે કેન્દ્રિય કર્મચારીઓ અને પેન્શનર્સને ફાયદો થશે. બેઠક બાદ કેન્દ્રિય મંત્રી અનુરાગ ઠાકુરે જણાવ્યું કે આ નિર્ણયથી દર વર્ષે સરકારી ખજાના પર 9488.74 કરોડ રૂપિયાનો બોજ પડશે. જાન્યુઆરી 2020માં મોંઘવારી ભથ્થું 4 ટકા વધ્યું હતું. પછી જૂન 2020માં 3 ટકાનો વધારો થયો અને જાન્યુઆરી 2021માં 4 ટકાનો વધારો થયો. પરંતુ, કોરોનાના કારણે સરકારે જાન્યુઆરી 2020થી જૂન 2021 સુધીના 3 મોંઘવારી ભથ્થાના વધારાને ફ્રીઝ કર્યો હતો. જુલાઈમાં સરકારે આ રોક હટાવી લીધી હતી અને કર્મચારીઓને 28 ટકાના દરે મોંઘવારી ભથ્થું મળી રહ્યું છે.
કેબિનેટ બેઠકમાં આજે કેન્દ્ર સરકારના કર્મચારીઓ અને પેન્શન મેળવતા લોકોનું મોંઘવારી ભથ્થામાં 3 ટકાનો વધારો કરવાની મંજૂરી આપવામાં આવી છે. કેન્દ્રિય કર્મચારીઓના મોંઘવારી ભથ્થામાં વર્ષમાં 2 વખત વધારો થાય છે. જો કોઈ કર્મચારીનું મૂળ વેતન 18 હજાર રૂપિયા છે તો તેને મોંઘવારી ભથ્થારૂપે અત્યારે 5,040 રૂપિયા મળી રહ્યા છે. જે રકમ મૂળ વેતનના 28 ટકા છે. ડીએમાં 3 ટકા વધારા બાદ કર્મચારીને ડીએ તરીકે 5,580 રૂપિયા મળશે. એટલે કે તેમાં 540 રૂપિયાનો વધારો થશે. મૂળ વેતન વધતા મોંઘવારી ભથ્થાની કુલ રકમમાં પણ વધારો થઈ જશે. DAમાં 3 ટકાનો વધારો થવાનો અર્થ છે કે હવે મોંઘવારી ભથ્થું 31% થશે. સરકારના આ નિર્ણયથી 1 કરોડથી વધારે કેન્દ્રીય કર્મચારીઓ અને પેન્શનર્સને ફાયદો મળશે
