PM Modi Parliament Speech West Asia Crisis: પશ્ચિમ એશિયા (મિડલ ઈસ્ટ) માં વધી રહેલા સંઘર્ષ અને તેના કારણે સર્જાયેલા ઉર્જા સંકટ વચ્ચે વડાપ્રધાન નરેન્દ્ર મોદી આજે લોકસભામાં ભારત સરકારનું વલણ સ્પષ્ટ કરશે. ઈરાન અને ઈઝરાયેલ વચ્ચે છેડાયેલા જંગના 24મા દિવસે સ્થિતિ વધુ ભયાવહ બની છે, ત્યારે પીએમ મોદી ભારત પર તેની અસરો અને સરકારની તૈયારીઓ વિશે દેશને માહિતગાર કરશે.
24 દિવસથી દઝાડતું યુદ્ધ અને ભારતની ચિંતા
પશ્ચિમ એશિયામાં ચાલી રહેલો સંઘર્ષ હવે નિર્ણાયક તબક્કામાં પહોંચ્યો છે. અમેરિકા અને ઈઝરાયેલના હુમલા સામે ઈરાને પણ વળતો પ્રહાર શરૂ કર્યો છે. ખાડી દેશોમાં આવેલા અમેરિકી સૈન્ય ઠેકાણાઓ પર મિસાઈલ અને ડ્રોન હુમલાના કારણે સમગ્ર વિશ્વમાં ઉર્જા સપ્લાય (ક્રૂડ ઓઈલ અને ગેસ) ખોરવાઈ રહ્યો છે. ભારત માટે આ ચિંતાનો વિષય છે કારણ કે ભારત તેની જરૂરિયાતનું મોટું પ્રમાણ અહીંથી આયાત કરે છે.
PM Modi આજે શું કહી શકે છે?
વડાપ્રધાન મોદી આજે લોકસભામાં વિવિધ મુદ્દાઓ પર સરકારનો પક્ષ રાખી શકે છે, જેમાં ખાસ કરીને શાંતિ માટેની અપીલ અને ભારતના રાજદ્વારી સંબંધો અંગે સરકારનું સ્પષ્ટ વલણ રજૂ કરવામાં આવી શકે છે. આ ઉપરાંત, તેલ અને ગેસના વધતા ભાવો તેમજ સપ્લાય ચેઈન ખોરવાતા ભારત પાસે ઉર્જા સુરક્ષા માટે શું ‘પ્લાન-બી’ છે તેની માહિતી પણ આપવામાં આવી શકે છે. સાથે જ, ખાડી દેશોમાં વસતા લાખો ભારતીયોની સુરક્ષા માટે લેવાયેલા પગલાં અને આ યુદ્ધથી ભારતીય અર્થતંત્ર તેમજ મોંઘવારી પર પડનારી આર્થિક અસરો અંગે પણ ચર્ચા થવાની પૂરેપૂરી શક્યતા છે.
ભારતની સાવધ રણનીતિ
ભારત અત્યાર સુધી ખૂબ જ સાવચેતીપૂર્વક આગળ વધી રહ્યું છે. એક તરફ ઈઝરાયેલ સાથેના મજબૂત વ્યૂહાત્મક સંબંધો અને બીજી તરફ ઈરાન તથા આરબ દેશો સાથેના મહત્વના વ્યાપારી સંબંધો વચ્ચે સંતુલન જાળવવું ભારત માટે પડકારરૂપ છે. વડાપ્રધાન મોદી આ પડકાર સામે ભારતની રણનીતિ અને ભાવિ પગલાંઓ વિશે સંસદને વિશ્વાસમાં લેશે.
ભારતના કરોડો લોકોની નજર આજે સંસદમાં પીએમ મોદીના સંબોધન પર છે, કારણ કે આ યુદ્ધની અસર આપણા ખિસ્સા (પેટ્રોલ-ડીઝલના ભાવ) થી લઈને વૈશ્વિક શાંતિ સુધી પહોંચવાની છે.
આ પણ વાંચો: લોકસભા અધ્યક્ષ ઓમ બિરલા વિરુદ્ધ અવિશ્વાસ પ્રસ્તાવ 9 માર્ચે શક્ય
આ પણ વાંચો: PM મોદી સાથે અણધારી ઘટના થવાની આશંકા, લોકસભા સ્પીકર ઓમ બિરલાનો ખુલાસો
આ પણ વાંચો: આજે લોકસભામાં વંદે માતરમના 150 વર્ષ પર રાજકીય ગરમાવો, PM–વિપક્ષ આમને–સામને
