Surat Crime News: સુરત શહેરમાં લોન અપાવવાના બહાને ભોળા નાગરિકો સાથે લાખો રૂપિયાની છેતરપિંડી આચરવાના કિસ્સાઓ સતત વધી રહ્યા છે. ત્યારે સુરત પોલીસે એક એવી મોટી કાર્યવાહી કરી છે, જેમાં નકલી દસ્તાવેજો બતાવીને 17 લાખ રૂપિયાની ઠગાઈ કરનાર એક કાપડ વેપારીને ઝડપી પાડવામાં આવ્યો છે. સૌથી ચોંકાવનારી વાત એ છે કે આ આરોપી છેલ્લા 4 વર્ષથી પોલીસને થાપ આપીને ફરાર હતો અને આખરે સુરત કોર્ટ પરિસરમાંથી જ તે પોલીસના સકંજામાં આવી ગયો છે.
નકલી વિદેશી બેન્કના દસ્તાવેજો બતાવી ફસાવ્યા
પોલીસ સૂત્રો પાસેથી મળતી માહિતી મુજબ, પકડાયેલા આરોપીનું નામ સંજીવ તનેજા છે, જે વ્યવસાયે કાપડનો વેપારી છે. સંજીવ તનેજાએ ફરિયાદીને મોટી લોન અપાવવાની લાલચ આપી હતી. ફરિયાદીનો વિશ્વાસ જીતવા માટે આરોપીએ અત્યંત ચાલાકીપૂર્વક નકલી વિદેશી બેન્કના ડોક્યુમેન્ટ્સ (Fake Foreign Bank Documents) તૈયાર કર્યા હતા અને તે બતાવીને કુલ રૂ. 17 લાખની માતબર રકમ પડાવી લીધી હતી. રકમ મળ્યા બાદ આરોપી ફરાર થઈ ગયો હતો.
4 વર્ષથી પોલીસને આપતો હતો થાપ
આરોપી સંજીવ તનેજા વિરુદ્ધ ગુનો નોંધાયા બાદ તે છેલ્લા 4 વર્ષથી ભૂગર્ભમાં ઉતરી ગયો હતો અને પોલીસ પકડથી દૂર હતો. પોલીસ તેની સતત શોધખોળ કરી રહી હતી, પરંતુ તે હાથ લાગતો ન હતો.
Surat કોર્ટમાં આવતા જ પોલીસે દબોચી લીધો
પોલીસને ચોક્કસ બાતમી મળી હતી કે 4 વર્ષથી વોન્ટેડ આરોપી સંજીવ તનેજા કોઈ કામ અર્થે સુરત કોર્ટમાં આવવાનો છે. બાતમીના આધારે પોલીસે કોર્ટ પરિસરમાં વોચ ગોઠવી હતી અને જેવો આરોપી કોર્ટમાં પહોંચ્યો, કે તરત જ પોલીસે તેને દબોચી લીધો હતો. હાલ પોલીસે તેની ધરપકડ કરીને 17 લાખની ઠગાઈ અને નકલી દસ્તાવેજો બનાવવાના મામલે વધુ સઘન પૂછપરછ હાથ ધરી છે.
આ પણ વાંચો: સુરતમાં રાંદેરમાં નજીવી બાબતે જીવલેણ હુમલો, ઇજાગ્રસ્તની સ્થિતિ ગંભીર
આ પણ વાંચો: સુરતમાં લગ્નના એક જ વર્ષમાં પતિ-પત્નીએ ગળે ફાંસો ખાઈ જીવન ટૂંકાવ્યું
આ પણ વાંચો: સુરતમાં કાપડના વેપારીએ વ્યાજખોરના ત્રાસથી ફિનાઇલ પીધુ
