National News: રાષ્ટ્રીય ધોરીમાર્ગ પર મુસાફરી કરતા લાખો વાહનચાલકો માટે નેશનલ હાઇવે ઓથોરિટી ઓફ ઇન્ડિયા (NHAI) એ બે નવી ડિજિટલ સેવાઓ શરૂ કરી છે. ‘રાજમાર્ગયાત્રા’ (Rajmarg Yatra) મોબાઇલ એપ્લિકેશનમાં હવે ‘લોકલ પાસ’ અને ‘માર્ગમિત્ર’ નામની (NHAI Local Pass) નવી સુવિધાઓ ઉમેરવામાં આવી છે. આ પહેલનો મુખ્ય હેતુ ટોલ સંબંધિત પ્રક્રિયાને સંપૂર્ણપણે ડિજિટલ બનાવવાનો, FASTag સેવાઓને વધુ સરળ બનાવવાનો અને હાઇવે પર મુસાફરોને ઝડપી સહાય પૂરી પાડવાનો છે. આ યોજના ભારત સરકારના ‘ડિજિટલ ઇન્ડિયા‘ અને ‘Ease of Living’ અભિયાનને વધુ મજબૂત બનાવે છે.
શું છે ‘લોકલ પાસ’?
‘લોકલ પાસ’ એવી નવી ડિજિટલ સુવિધા છે, જેના દ્વારા ટોલ (NHAI Local Pass) પ્લાઝાની નજીક રહેતા લોકો હવે ટોલ પ્લાઝા પર ગયા વિના પોતાના મોબાઇલમાંથી જ લોકલ ટોલ પાસ મેળવી શકશે. અત્યાર સુધી આ સુવિધા માટે લોકોને જરૂરી દસ્તાવેજો સાથે ટોલ પ્લાઝા પર રૂબરૂ જવું પડતું હતું, પરંતુ હવે સમગ્ર પ્રક્રિયા ઓનલાઈન પૂર્ણ થશે.આ સુવિધાનો પ્રથમ અમલ દિલ્હીના મુંડકા-બક્કરવાલા ટોલ પ્લાઝા (UER-II) પર કરવામાં આવ્યો છે. આગામી મહિનાઓમાં દેશભરના અન્ય ટોલ પ્લાઝા પર પણ આ સેવા ઉપલબ્ધ કરવામાં આવશે.
કોને મળશે લોકલ પાસનો લાભ?
NHAIના નિયમો અનુસાર જે લોકો કોઈ લાયક ટોલ પ્લાઝાથી 20 કિલોમીટરની ત્રિજ્યામાં રહે છે, તેઓ આ સુવિધાનો લાભ લઈ શકશે. ‘રાજમાર્ગયાત્રા’ એપ્લિકેશન (Rajmarg Yatra App) દ્વારા અરજી કર્યા (NHAI Local Pass) બાદ પાત્રતા ચકાસવામાં આવશે અને મંજૂરી મળ્યા પછી લોકલ પાસ ડિજિટલ રીતે જારી કરવામાં આવશે.આ પાસની મદદથી સંબંધિત ટોલ પ્લાઝા પરથી એક મહિના દરમિયાન અમર્યાદિત વખત અવરજવર કરી શકાશે, જેના કારણે રોજિંદા મુસાફરોને મોટી રાહત મળશે.
હવે આખી પ્રક્રિયા થશે ઓનલાઈન
નવી ડિજિટલ સિસ્ટમ હેઠળ લોકલ પાસ મેળવવા માટે કોઈપણ પ્રકારના કાગળો લઈને ટોલ પ્લાઝા જવાની જરૂર નહીં રહે. એપ્લિકેશન DigiLocker, VAHAN અને FASTag જેવી સરકારી ડિજિટલ સેવાઓ સાથે જોડાયેલી હોવાથી વપરાશકર્તાનું સરનામું, વાહનની વિગતો અને FASTagની માહિતી આપમેળે ચકાસી લેવામાં આવશે.સાથે જ GIS આધારિત લોકેશન વેરિફિકેશન દ્વારા એ પણ ખાતરી કરવામાં આવશે કે અરજદાર ખરેખર ટોલ પ્લાઝાથી 20 કિલોમીટરની અંદર રહે છે. આથી પ્રક્રિયા વધુ ઝડપી, પારદર્શક અને સરળ બનશે.
‘માર્ગમિત્ર’ શું છે?
NHAIએ બીજી મહત્વપૂર્ણ સેવા તરીકે ‘માર્ગમિત્ર’ હેલ્પડેસ્ક પણ શરૂ કર્યો છે. આ એક સ્માર્ટ ડિજિટલ સહાય પ્લેટફોર્મ છે, જે હાઇવે વપરાશકર્તાઓને એક જ જગ્યાએ તમામ માહિતી અને સહાય ઉપલબ્ધ કરાવે છે.માર્ગમિત્ર દ્વારા મુસાફરો પોતાના પ્રશ્નો પૂછી શકે છે, ફરિયાદ નોંધાવી શકે છે, સૂચનો આપી શકે છે અને વિવિધ સેવાઓ અંગે માહિતી મેળવી શકે છે.માર્ગમિત્રની સૌથી ખાસ વાત એ છે કે તેમાં વપરાશકર્તા 22 ભારતીય ભાષાઓમાં લખીને અથવા બોલીને પોતાના પ્રશ્નો પૂછી શકે છે. પ્લેટફોર્મ તરત જ સંબંધિત માહિતી આપે છે અથવા જરૂરી હોય તો યોગ્ય વિભાગ સુધી વપરાશકર્તાને માર્ગદર્શન આપે છે.આ સુવિધા દેશના વિવિધ રાજ્યોના લોકો માટે ઉપયોગમાં સરળ બને તે રીતે તૈયાર કરવામાં આવી છે.
FASTag સંબંધિત તમામ સમસ્યાઓનો મળશે ઉકેલ
માર્ગમિત્ર દ્વારા FASTag સાથે જોડાયેલી અનેક સેવાઓ એક જ જગ્યાએ ઉપલબ્ધ થશે. વપરાશકર્તા FASTag રિચાર્જ, KYC, રિફંડની સ્થિતિ, વાર્ષિક પાસ, લોકલ પાસ અને અન્ય સામાન્ય પ્રશ્નોના જવાબ સરળતાથી મેળવી શકશે.જો કોઈ ટેકનિકલ અથવા વહીવટી સમસ્યા હોય તો એપ્લિકેશન દ્વારા સીધી ફરિયાદ પણ નોંધાવી શકાશે.જો મુસાફર કોઈ ફરિયાદ નોંધાવે છે તો તે આપમેળે સંબંધિત વિભાગને મોકલી આપવામાં આવશે. ત્યારબાદ વપરાશકર્તા પોતાની ફરિયાદની સ્થિતિ રિયલ ટાઇમમાં જોઈ શકશે. જો ઉકેલથી સંતોષ ન હોય તો એપ્લિકેશનમાં જ અપીલ કરવાની સુવિધા પણ આપવામાં આવી છે.
સરકારનો શું છે હેતુ?
NHAIનો ઉદ્દેશ્ય માત્ર રસ્તાઓનું નિર્માણ કરવાનો નથી, પરંતુ હાઇવે મુસાફરીને વધુ સ્માર્ટ, સુરક્ષિત અને ટેક્નોલોજી આધારિત બનાવવાનો પણ છે. ‘રાજમાર્ગયાત્રા’ એપ્લિકેશન દ્વારા અત્યાર સુધી 80 લાખથી વધુ વાર્ષિક ટોલ પાસ ડિજિટલ રીતે જારી કરવામાં આવ્યા છે.નવી ‘લોકલ પાસ’ અને ‘માર્ગમિત્ર’ સેવાઓ સાથે હવે ટોલ (Toll Pass) મેનેજમેન્ટ, FASTag સેવા અને મુસાફરોને મળતી સહાય વધુ ઝડપી અને પારદર્શક બનવાની આશા છે.
આ પણ વાંચો: જંતર-મંતર પર CJPના સમર્થકોને પોલીસે હટાવ્યા, સંસદ નજીક હંગામા બાદ સુરક્ષા કડક
આ પણ વાંચો: ‘એજ્યુકેશન પોલિસીમાં ગડબડ, સરકાર ચર્ચાથી ભાગી રહી છે’: પ્રિયંકા ગાંધીના સરકાર પર આકરા પ્રહાર
આ પણ વાંચો: રામ મંદિર દાન ચોરી કેસમાં સુપ્રીમ કોર્ટનું કડક વલણ: નવી SIT બનાવવાનો આદેશ, વરિષ્ઠ IPS અધિકારી કરશે તપાસ
